Rama paralajmëron bizneset për vitin tjetër: S’ka plazhe për restorantet, shezllone për hotelet vetëm për aq sa kanë dhoma

Nga viti tjetër turizmi shqiptar do jetë përballë ndryshimeve thelbësore. Kryeministri Edi Rama paralajmëroi bizneset private, restorantet dhe beach baret se nuk do të kenë më leje për të vendosur çadra në hapësirat e plazheve.

“Përveçse se ata kanë hotele nuk mund të jepen më leje plazhesh për të ardh një individ, një person juridik apo fizik, për të thënë dua këtë plazhin këtu do të vë beach bar e do të vë shezllone. Mund të vësh beach bar por nuk ke shezllone. Mund të kesh restorant por nuk ke shezllone. Plazhi duhet shijuar në mënyrën më të mirë të mundshme. Dhe shijimi i plazhit mes atyre krevateve të ngjitur me njëri tjetrin është e pamundur”.

Hotelet që do të vendosin shezllone, do të duhet të respektojnë disa rregulla.

“Nuk mund të kesh një hotel me 40 dhoma dhe të vësh 200 shezllone e të marrësh popull aty e ti detyrosh të paguajnë. Do të vësh shezllone për aq sa ke kapacitet! Natyrisht jo një për dhomë, dhe do të lësh distancë nga shezlloni në shezllon”.

Njësitë e pushtetit vendor do të kenë  rol kryesor në menaxhimin e sektorit turistik, me caktimin e hapësirave publike për qytetarët.

“Do ta fillojmë me bashkitë, që bashkitë të marrin hapësira e të vendosin bashkitë çadra. Aty ku është e arsyeshme e shezlloneve, por me çmim tavan të detyruar.  E kemi filluar prej disa vitesh, këtë vit e shtymë më përpara që bashkitë ta administrojnë”.

Duke u kthyer në një nga sektorët më potencialë për ekonominë e vendit, kryeministri ju bën thirrje bizneseve për të vlerësuar punonjësit dhe për të rritur pagat e tyre.

“Tani kam kuptuar që kur nuk ka njerëz, ti duhet të ngresh rrogën se nuk ke ku shkon. Do t’i konsiderosh ata njerëz që punojnë për ty, gjënë më të çmuar që ke.

Këtë vit Shqipëria u vizitua nga 7.2 milionë turistë vetëm në tetë muaj, duke pësuar rritje me 60 përqind krahasuar me vitin e kaluar.

Këtë vit kam dëgjuar nga disa që kanë marrë njerëz që janë kthyer nga Greqia dhe më thonë që kemi interesim nga ata që janë në Greqi. Nuk ka më asnjë krahasim, të punosh kamerier në Greqi dhe Shqipëri, ke më shumë përfitime në Shqipëri”.

Katër vjet nga vdekja e aktorit, Adem Mikullovci

Bien temperaturat, parashikimi i motit për javën e ardhshme

Në Kosovë për pesë ditët e ardhshme do të mbajë mot me diell, vranësira të shpërndara dhe riga lokale shiu.

Instituti Hidrometeorologjik i Kosovës bën të ditur se minimalja do të jetë nga gjashtë gradë  Celsius, kurse maksimalja do të jetë 23 gradë Celsius.

Më poshtë e keni motin e plotë për të gjitha ditët:

E hënë- Mot  me diell dhe vranësira të shpërndara. Vranësirat gjatë ditës vende-vende mund të sjellin riga të dobëta shiu. Temperaturat minimale do të lëvizin ndërmjet 6-9 gradë Celsius, ndërsa maksimalet e ditës parashihen të lëvizin ndërmjet 15-18 gradë Celsius. Do të fryjë erë kryesisht nga drejtimi i veriperëndimit e lehtë deri mesatare.

E martë- Mot me diell dhe vranësira të shpërndara. Temperaturat minimale do të lëvizin ndërmjet 5-8 gradë Celsius, ndërsa maksimalet e ditës parashihen të lëvizin ndërmjet 15-21 gradë Celsius. Do të fryjë erë kryesisht nga veriperëndimi me shpejtësi 1-5m/s.

E mërkurë- Do të mbajë mot i vranët dhe me intervale të shkurta me diell. Vranësirat gjatë ditës parashihen që vende-vende të sjellin riga shiu. Temperaturat minimale do të lëvizin ndërmjet 6-9 gradë Celsius, ndërsa maksimalet e ditës parashihen të lëvizin ndërmjet 16-20 gradë Celsius. Do të fryjë erë nga drejtimi i verilindjes me shpejtësi    1-6/m/s.

E enjte- Do të mbajë mot me diell dhe vranësira të pakta. Vranësirat gjatë ditës vende-vende parashihen  të sjellin riga  shiu . Temperaturat minimale do të lëvizin ndërmjet 8-11gradë Celsius, ndërsa maksimalet e ditës parashihen të lëvizin ndërmjet 17-21gradë Celsius. Do të fryjë erë kryesisht nga veriperëndimi e lehtë  deri mesatare.

E premte- Mot me diell dhe vranësira të shpërndara .Temperaturat minimale do të lëvizin ndërmjet 7-10gradë Celsius, ndërsa maksimalet e ditës parashihen të lëvizin ndërmjet 18-23gradë Celsius. Do të fryjë erë nga drejtimi i jugperëndimit  me shpejtësi    1-5m/s.

Kushtet agrometeorologjike dhe biometeorologjike do të jenë të mira, kur kemi parasysh cilësinë e ajrit dhe  përgatitjen e tokave për mbjelljen e kulturave vjeshtore.

Kurti i pranishëm në takimin e grave të Vetëvendosjes

LVV kërkon miratimin e Projektligjit për konfiskim të pasurisë, opozita e quan të pamundur

Pushteti e opozita kanë qëndrime të ndara sa i përket projektligjit për Byronë Shtetërore për Verifikimin dhe Konfiskimin e Pasurisë së Pajustifikueshme. Lëvizja Vetëvendosje konsideron se nuk ka asnjë arsye që ky projektligj të mos përkrahet nga partitë opozitare.

Ndërkaq, PDK e LDK thonë se pushteti po e shfrytëzon për lojë politike e fushatë elektorale, për çka kërkojnë sërish interpretimin e Komisionit të Venecias. Po ashtu, konsiderojnë se çdo nismë që vjen tani e tutje në parlament, e ka proceduralisht të pamundur të miratohet.

Deputeti i Lëvizjes Vetëvendosje, Adnan Rrustemi thotë se ky projektligj ka qenë gjithmonë një nga prioritetet e qeverisë.

“Shumë shpejt në radhë të parë si Komision për Legjislacion ditëve të ardhshme, nëse jo, javën e ardhshme do ta trajtojmë në parim në komision dhe do ta rekomandojmë për seancë për shqyrtim dhe miratim në lexim të parë. Ndërkohë, personalisht mendoj se duhet ta trajtojmë me procedura të përshpejtuara në kuptimin që duke qenë se bëhet fjalë vetëm për tre nene, nuk ka asnjë arsye që të trajtohet në procedura të rregullta për të humbur kohë. Edhe ashtu është sesioni i fundit i legjislaturës. Unë besoj shumë që brenda këtij sesioni do të miratohet përfundimisht para se të hyjë në fuqi, në kuptimin e themelimit të byrosë dhe fillimit të punës”, deklaron Rrustemi për KosovaPress.

Sipas tij, pasuria e zyrtarëve të lartë shtetërorë duhet të verifikohet, për çka konsideron se nuk ka arsye që të mos ndodhë miratimi i këtij projektligji.

“Nuk ka asnjë arsye për ta mos votuar, në kuptimin as profesional e as politik, përveç atyre natyrisht që janë kundër konfiskimit të pasurisë të pajustifikueshme. Këtë bindje dhe këtë interes nuk mund të ju heqësh atyre që veç e kanë. Në të shkuarën e ka votuar LDK, tash me adresimin e gjetjeve të Gjykatës Kushtetuese do të duhej ta votonin të gjithë.

Por, është në interes të gjithë qytetarëve të Kosovës, shtetit të Kosovës, luftimi i krimit të organizuar dhe korrupsionit, e adreson një nga plagët e vazhdueshme të zyrtarëve të lartë publikë dhe të shpërdorimit të pasurisë publike, në kuptimin e pasurisë së pajustifikueshme të zyrtarëve të lartë. Duke u bërë milioner pa pasur asnjë angazhim tjetër, përveç se duke qenë zyrtarë të lartë të shtetit dhe kjo nënkupton keqpërdorim të pasurisë së shtetit”, tha kryetari i Komisionit për Legjislacion.

Deputeti i Lidhjes Demokratike të Kosovës, Driton Selmanaj konsideron se veprimet e partisë në pushtet janë kryesisht për fushatë elektorale.

“Kjo qeveri ka treguar që në krejt mandatin e vet nuk e ka interes këtë, nuk e ka pasur qëllim dhe nuk ka pasur idenë e qartë se a duhet të bëhet Kosova apo jo. Por, krejt këtë e ka pasur në funksion të qëllimeve populiste elektorale, për të thënë që ne jemi të interesuar për ta bërë këtë. Po të ishin të interesuar për ta bërë këtë do ta dëgjonin me përpikëri Komisionin e Venecias. Këta qëllimshëm nuk e kanë dëgjuar Komisionin e Venecias dhe prandaj në fund Gjykata Kushtetuese e rrëzoi.

Prandaj, duke e parë tani, e rikthyen edhe një herë, e shoh në funksion të interesit përsëri për qëllime të ngushta elektorale por jo për qëllime për ta realizuar idenë e kamotshme që të shihet mundësia e konfiskimit të pasurisë që njerëzit e kanë marrë në mënyrë të pabazë. Ne si LDK e shohim lojë politike, e cila nuk e ka për qëllim sikurse nuk e ka pasur asnjëherë qëllimin që vërtetë të vendoset një sistem i konfiskimit të pasurisë së pabazë në Kosovë”, shprehet Selmanaj.

Lidhja Demokratike e Kosovës konsideron se drafti i ri duhet të dërgohet sërish për interpretim në Komisionin e Venecias.

“Ne si LDK do ta lexojmë me kujdes edhe draftin e ri që ka ardhur, por jam i bindur që përsëri ky duhet të shkojë në Komisionin e Venecias, sepse Komisioni i Venecias ka dhënë mendim dhe rekomandim për këtë çështje dhe tash nëse kemi një draft tjetër duhet ta konfirmojmë edhe një herë për të parë Komisioni i Venecias se a është në përputhje me standardet ndërkombëtare, sidomos në kontekst të lirive dhe të drejtave të njeriut”, tha ai.

Deputeti i Partisë Demokratike të Kosovës (PDK), Hajdar Beqa konsideron se është e pamundur teknikisht që të procedohet ky projektligj në këtë legjislaturë.

“Çdo nismë që tani e tutje vjen në Kuvendin e Kosovës, proceduralisht e ka të pamundur të kalojë, sepse i duhet një kohë të kalojë në lexim të parë, që të kaluar në grupe punuese, në trupa të kuvendit, komisione, që të dëgjohen palët e interesit dhe të ketë një transparencë se çka duam të arrijmë me këtë ligj.

Kjo i bie që qeveria në shkuarje këtë propozim sikur e ka pasur në fillim në fushatë vetëm për sy e faqe, ose sa për të marrë vota të qytetarëve. Prapë e ka vetëm për fushatë, sepse nuk e ka qëllimin që të ketë një ligj të tillë. Për këtë ligj dhe për ligjet tjera të cilat nuk kanë kaluar në këtë legjislacion dhe nuk kanë ardhur ende në këtë kuvend mund të flasim në legjislaturën e ardhshme, qeverinë e ardhshme të udhëhequr nga zotëri Hamza”, deklaron Beqa.

Javën e kaluar, ekzekutivi ka miratuar projektligjin e ri për byronë, ku sipas ekzekutivit, janë adresuar vetëm katër nenet që janë rrëzuar nga Gjykata Kushtetuese./KP

Nga Qeveria i përgjigjen Vuçiqit: Zgjedhjet lokale në veri janë në tetor 2025

Ministri i Administrimit të Pushtetit Lokal, Elbert Krasniqi, ka thënë për RTKlive se zgjedhjet në komunat veriore mund të mbahen vetem në afatet e regullta zgjedhore.

“Udhëzimi parasheh që në bazë të udhëzimit adminstrativ kur dështon votimi për largimin e kryetarëve, qytetarët mund të iniciojnë një peticion të ri, por votimi mund të bëhet vetëm pas 1 viti, e pasi prill 2025 është në afatet kohore të regullta, zgjedhjet mund të mbahen vetëm në afatet e regullta zgjedhore në tetor 2025”, tha Krasniqi.

Ndryshe presidenti i Serbisë, Aleksandër Vuçiq, dje ka kërkuar organizimin e menjëhershëm të zgjedhjeve në komunat në veri të Kosovë

Operacion i rrallë te një paciente 29-vjeçare në Shqipëri

Realizohet me sukses në vendin tonë një ndërhyrje komplekse tek një paciente 29-vjeçare, e cila kishte një malformacion kongenital të rrallë (meningocele lumbare), dhe i ishte refuzuar kirurgjia për vite për shkak të problemeve të rënda në lëvizshmëri dhe ndjeshmëri.

Lajmin e ka ndarë ministrja e Shëndetësisë Albana Koçiu në rrjetet sociale, e cila shprehet se kjo ndërhyrje e rrallë i dha 29-vjeçares një shans për një jetë më të mirë.

“Neurokirurgu Prof. Kita Sallabanda, pas një vlerësimi të kujdesshëm, ndërhyri për heqjen e një qeseje të madhe të mbushur me lëng, e cila pengonte jetën normale. Operacioni u zhvillua në dy faza: fillimisht u vendos një derivacion ventrikulo-peritoneal për uljen e presionit të lëngut trushpinor, dhe në bashkëpunim me Neurokirurgun Prof. Artur Xhumarin dhe kirurgun plastik-rikonstruktiv Prof. Nardi Kolën, u realizua me sukses mbyllja kirurgjikale e meningoceles.

Një operacion i rrallë për shkak të moshës së pacientes përfundoi me sukses të plotë, pa dëmtuar funksionet nervore dhe duke i dhënë 29-vjeçares një shans për një jetë më të mirë”, shkruan ministrja.

Mielomeningocele është një keqformim kongjenital i shkaktuar nga një defekt zhvillimor i strukturave të palcës kurrizore.

Ky është moti për sot

Sot në Kosovë na pret mot i vranët dhe me reshje shiu. Temperaturat do të shënojnë ulje të mëtutjeshme. Në mëngjes dhe paradite ende mund të ketë ndonjë interval kohor me diell, ndërsa vranësira të dendura dhe reshjet vijnë kryesisht gjatë ditës ose orëve të pasdites dhe mbrëmjes, vende-vende nganjëherë intensive. Temperatura maksimale vetëm rreth 16 gradë Celsius. Në malet më të larta mund të ketë fjolla bore.

Në Shqipëri, Maqedoninë Veriore, Luginë të Preshevës dhe Mal të Zi sot pritet të mbajë mot i vranët e në disa vise paradite me intervale kohore me diell. Priten reshje të reja shiu e në bregdet rrebeshe lokale me vetëtima dhe bubullimë.

“Ligji për Pagën Minimale ka dëmtuar qytetarët”

Avokati i Popullit, Naim Qelaj, në një intervistë për Ekonomia Online ka thënë se brenda shtat muajve të këtij vit është vërejtur një rënie e ndjeshme në numrin e ankesave krahasuar me vitin e kaluar, ku kjo rënie ai ka thënë se ndërlidhet si rezultat i ngjarjeve që kanë ndodhur brenda viteve, ku gjatë vitit 2023 pati një fluks të madh ankesash për shkak të ndryshimeve ligjore, si ligji i pagave, që ndikuan në të drejtat e qytetarëve.

Qelaj ka thënë se me Ligjin për rritjen e pagës minimale, nuk është arritur të harmonizohet paga me koston e jetesës, inflacionin dhe rritjen e çmimeve, kështu duke ndikuar që qytetarët të jetojnë më keq se sa që kanë jetuar para disa viteve.

Qelaj ka thënë se për këtë vit ankesat që vazhdojnë të dominojnë janë për zvarritjet në procedurat gjyqësore.

“Këtë vit është vërejt një rënie e numrit të ankesave krahasuar me vitin paraprak, kjo vjen edhe si rezultat i ngjarjeve që kanë ndodhur brenda viteve. E zëmë se në vitin 2023 ka pasur një fluks të madh të ankesave në fillim të vitit, për shkak të ligjit të pagave dhe disa ndryshimeve të tjera ligjore që kanë afektuar dhe kanë prekur të drejtat e shumë qytetarëve dhe ka pas një numër jashtëzakonisht të madh të ankesave. Dhe këtë vit kemi rënë në nivelin normal të standardit të pranimit të ankesave si dhe para vitit 2023. Vazhdojnë të vijnë ankesa me çështje dhe shqetësime që lidhen me të drejtat e njeriut në sektorë dhe fusha, edhe vitet e tjera kemi pas më shumë ankesa, për nga natyra e ankesave vazhdojnë me dominuar ankesat për zvarritjet në procedura gjyqësore”, ka thënë ai.

Qelaj theksoi se, ndonëse ka një rënie në numrin e përgjithshëm të ankesave, shqetësimet e raportuara vazhdojnë të jenë të ndjeshme, sidomos në lidhje me zvarritjet në procedurat gjyqësore të cilat zgjasin me vite.

Ai tha se këto çështje lidhet edhe me reformën në drejtësi dhe me vetë performancën e gjyqësorit si dhe me performancën e autoriteteve publike, që në situata të caktuara kanë prodhuar numër të madh të rasteve gjyqësore për shkak të çështjeve që nuk janë zgjidhur në procedurë administrative mirë.

“Është një shqetësim shumë vjeçar që e kemi përsëritë vazhdimisht, këtë vit kemi nxjerr një numër të madh të raporteve sepse kemi parë që janë raste gjyqësore që kanë zgjatë shumë vite dhe nuk kanë marrë një epilogë dhe nuk ka një veprim të gjykatave në drejtim të procedimit të atyre çështjeve dhe në këto raste konstatojmë se ka diskriminim dhe kërkojë nga gjykata me i’u dhënë prioritet atyre rasteve dhe me filluar procedurat gjyqësore. Është inkurajuese fakti që gjykata vazhdimisht përgjigjet dhe është bashkëpunuese me institucionet e Avokatit të Popullit në këtë drejtim por që problemi në thelb nuk po zgjidhet edhe pse që shumë vite është si problematikë që e dinë të gjithë, dhe kjo ndërlidhet edhe me reformën në drejtësi dhe me vetë performancën e gjyqësorit si dhe me performancën e autoriteteve publike, që në situata të caktuara e kanë prodhuar numër të madh të rasteve gjyqësore për shkak të çështjeve që ndoshta nuk janë zgjidhur në procedurë administrative mirë, dhe kemi pas një numër shumë të madh të padive në procedurë gjyqësore për shkak të kontratës kolektive, mos zbatim të kontratës kolektive”, ka shtuar ai.

Avokati i Popullit tha se kanë pranuar ankesa nga qytetarët edhe shqetësimet e tyre në lidhje me ofrimin e shërbimeve shëndetësore, që lidhen me mungesa të barnave në listën esenciale, ku qytetarët detyrohen të paguajnë për terapitë që duhet të ishin falas.

Probleme me ofrimin e shërbimeve esenciale, sipas Qelajt, janë duke pasur edhe personat me aftësi të kufizuara.

“Një shqetësim tjetër që kemi mundur të kuptojmë nga ankesat që kemi pranuar e që është shqetësim i qytetarëve është ofrimi i shërbimeve shëndetësore, kryesisht mungesa e barnave në listën esenciale, barna që përshkruhen nga mjekët dhe qytetarët nuk arrijnë me i marrë falas edhe pse janë terapi të përshkruara dhe ata detyrohen me i paguar vetë. Shpeshherë këto janë shuma të papërballueshme për familjen dhe vendosin në një situatë shumë të rëndë, kemi informacion nga Ministria e Shëndetësisë që është bërë këtë vit shikimi i listës esenciale të barnave që kompensohen ose sigurohen nga shteti, por që një numër i madh i medikamenteve kanë mbetur jashtë kësaj liste dhe qytetarët detyrohen me i siguruar vetë dhe kjo i paraqet vështirësi shumë të madhe”.

“Përveç kësaj një shqetësim tjetër që mundemi me konstatuar nga ankesat e qytetarëve lidhet me ofrimet e shërbimeve esenciale sidomos për personat me aftësi të kufizuara, fëmijë dhe persona të tjerë kemi pas ankesa për shkak të mungesës së ofrimit të shërbimeve sociale nga ana e shtetit, pamundësimi me i marrë këto shërbime në organizata ose në forma të tjera dhe që në disa raste qytetarët kanë mbetur pa këto shërbime. Qytetarët në momentin që i shtjerrin këto mundësi dhe mjetet e tjera juridike dhe nuk arrijnë me i realizuar drejtat e tyre, ankohen edhe për raste të tjera nuk janë vetëm këto”, ka thënë ai.

Avokati ka theksuar se Ligji për rritjen e pagës minimale ka dëmtuar qytetarët dhe i ka lenë në një situatë të pa trajtuar mirë, sipas tij, si shkak i politikave jo të harmonizuara dhe të pamenduara ka bërë që grupe të caktuara që marrin kompensim nga shteti, pagat që marrin nuk janë të harmonizuar me koston e jetesës, me inflacionin e me rritjen e çmimeve duke bërë që këta qytetarë të jetojnë më keq se sa që kanë jetuar para disa viteve.

“Tek ofrimi i shërbimeve sociale mendoj që zvarritja e aprovimit të Ligjit për financimin e Pushtetit Lokal ku është përcaktuar edhe granit specifik për çështjen sociale, pastaj mos përfshirja me Ligj i rritjes së kompensimeve që e marrin kategoritë  e financuara nga shteti. Përmes Ligjit për rritjen e pagës minimale besoj që i ka dëmtuar qytetarët dhe i ka lenë në një situatë të pa trajtuar dhe besoj që është dashtë me rregulluar çështja e këtyre qytetarëve pastaj me vazhduar me procedura për hartim të dispozitave që lejojnë edhe rritjen e pagës minimale. Aktualisht jemi në një situatë ku grupe të caktuara që financohen nga shteti ose marrin kompensim nga shteti për vite të tëra nuk ka pas një lëvizje që harmonizon ato mjete financiare që i marrin me koston e jetesës me inflacionin me rritjen e çmimeve dhe rritjen e standardit, dhe kjo e bënë që këta qytetarë me jetuar më keq se sa që kanë jetuar para disa viteve, pikërisht për shkak të politikave jo të harmonizuara dhe të pamenduara që të kemi mundësi me i trajtua këta qytetarë me dinjitetshëm dhe në proporcion me nevojat që ata i kanë”, ka thënë Qelaj. /EO/

Musliu për Veselin: Uroj ta kemi së shpejti në mesin tonë, nuk kurseu asgjë për lirinë e Kosovës

Deputetja e Partisë Demokratike të Kosovës, Ganimete Musliu, ka uruar që të kthehet sa më shpejtë  nga Haga ish kreu i kësaj partie, Kadri Veseli.

Përmes një postimi në Facebook, Musliu ka publikuar një fotografi me Veselin, ajo ka thënë  se uron që të kthehet në mesin tonë, njeriu që nuk kurseu asgjë për lirinë e Kosovës.

“Duke uruar që seshpejti ta kemi në mesin tonë njëriun që nuk kurseu asgjë për lirinë e Kosovës, Kryetarin Kadri Veseli, ju urojmë një fundjavë të mbarë”, ka thënë Musliu.