Suedia nis trupa për në Grenlandë

Oficerë të armatosur suedezë u nisën të mërkurën drejt Grenlandës me kërkesë të Danimarkës, njoftoi kryeministri i Suedisë, Ulf Kristersson.

Nuk është e qartë se sa oficerë do të dërgojë Stokholmi, por kryeministri suedez tha se ata janë pjesë e një grupi që përbëhet nga pjesëtarë të forcave të vendeve aleate, raporton televizioni BBC.

“Së bashku, ata do të përgatiten për elementet në ardhje brenda kornizës së ushtrimit danez, Operacioni Qëndresa Arktike” – tha Kristerssoni në një deklaratë të publikuar në internet.

Ditëve të fundit, Suedia i ka dalë në mbrojtje vendit fqinj, Danimarkës, pasi presidenti amerikan, Donald Trump, i përtëriu planet për ta marrë nën kontroll Grenlandën, territor autonom i Mbretërisë së Danimarkës.

Në një deklaratë të re, Danimarka tha se forcat e saj të armatosura “do ta zgjerojnë praninë e tyre” në Grenlandë dhe se një gjë e tillë do të bëhet “në bashkëpunim të ngushtë me aleatët”.

Ministri i Mbrojtjes i Danimarkës, Troels Lund Poulsen, tha se “siguria në Arktik është me rëndësi jetike” për vendin e tij dhe se, së bashku me aleatët evropianë dhe të Arktikut, Danimarka “do të eksplorojë në javët në vijim se si prania e shtuar dhe aktiviteti me ushtrime në Arktik mund të zbatohet në praktikë”.

Ministria e Mbrojtjes e Gjermanisë tha se do të dërgojë 13 trupa në një mision zbulimi me vende të tjera evropiane. Misioni do të realizohet nga e enjtja deri të shtunën, me kërkesë të Danimarkës.

Peci e nis ditën me tri vendime e “kërcënime”

Kryetari i Komunës së Mitrovicës Faton Peci, ka nisur sot ditën me tri vendime. Peci ka bërë të ditur se objektet e ndërtuara pa leje do të rrënohen. Ndërkaq lejet ndërtimore të dhëna kundërligjshëm gjatë fushatës, por edhe të tjera, do të revokohen.
Peci po ashtu ka thënë se do të lirohen dhe pronat komunale të uzurpuara.

“Objektet e ndërtuara pa leje do të rrënohen. Lejet ndërtimore të dhëna kundërligjshëm gjatë fushatës, po edhe të tjera, do të revokohen. Pronat komunale të uzurpuara do të lirohen”, ka thënë Peci.

Merret vendimi: 350 euro në muaj për këto familje

Komuna e Obiliqit ka marrë një vendim të rëndësishëm në mbështetje të fëmijëve pa përkujdesje prindërore dhe familjeve që kujdesen për ta.

Dje është nënshkruar vendimi që familjet strehuese në këtë komunë të përfitojnë mbështetje financiare prej 350 eurosh në muaj.

Ky vendim i kryetarit Halil Thaçi, synon të forcojë sistemin e kujdesit familjar dhe të lehtësojë barrën financiare për familjet që hapin derën dhe zemrën e tyre për fëmijët në nevojë.

“Kam nënshkruar vendimin që familjet strehuese në Komunën e Obiliqit, ato që hapin derën dhe zemrën për fëmijët pa përkujdesje prindërore, të mbështeten me 350 euro në muaj. Kujdesi për fëmijët nuk është bamirësi, por përgjegjësi institucionale. Komuna do të jetë pranë atyre që bëjnë më shumë për shoqërinë”, ka njoftuar Thaçi në Facebook.

Arrestohet i dyshuari për sulmin në Zveçan ndaj KFOR-it dhe Policisë, i sekuestrohen telefona e pajisje (EMRI)

Policia e Kosovës ka arrestuar dje në Zveçan një person të dyshuar për pjesëmarrje aktive në sulmin e 29 majit 2023 ndaj KFOR-it dhe zyrtarëve të Policisë së Kosovës, para objektit të komunës në Zveçan.

Gazeta Sinjali mëson nga burime të besueshme se i dyshuari është Slobodan Radenkoviç, i lindur në vitin 1989, ndaj të cilit po zhvillohet procedurë penale për vepra të rënda që lidhen me cenimin e rendit kushtetues dhe sigurisë në Republikën e Kosovës.

Sipas informacioneve, Drejtoria për Hetimin e Krimit të Organizuar dhe Krimeve të Rënda, Sektori për Hetimin e Krimeve të Rënda në DPP-Prishtinë, ka pranuar të dhëna operative se i dyshuari ndodhej në shtëpinë e tij në Zveçan, ndërsa për shkak të rrezikut të arratisjes dhe mundësisë për manipulim apo zhdukje të provave, është vlerësuar e domosdoshme ndërhyrja për arrestim.

I dyshuari është lokalizuar gjatë mëngjesit në rrugën “Kral Patri” në Zveçan dhe, në koordinim me Prokurorin e rastit, është ndaluar.

Pas arrestimit, në shtëpinë dhe objektet përcjellëse të tij është realizuar kontroll, me asistencën e Sektorit Rajonal të Hetimeve Mitrovicë Veri, me qëllim të sigurimit të provave dhe dëshmive.

Gjatë kontrollit, Policia ka sekuestruar disa prova materiale, përfshirë:

•           Dy telefona mobilë

•           Një trenerkë sportive “Underarmour”, ngjyrë hiri me të zezë

•           Një leje qëndrimi në emër të Milorad Bulatoviç

Me vendim të Prokurorit të çështjes, i dyshuari është dërguar në mbajtje për 48 orë.

Rasti po trajtohet në kuadër të dyshimeve për veprat penale: bashkim për veprimtari kundërkushtetuese me qëllim të sulmit kundër rendit kushtetues të Republikës së Kosovës, rrezikim i personave nën mbrojtje ndërkombëtare, sulm ndaj personit zyrtar, si dhe pjesëmarrje në turmë që kryen vepra penale dhe huliganizëm.

Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.

Rinumërohen gati 99% e 108 vendvotimeve, këto janë rezultatet

Në Qendrën e Numërimit dhe Rezultateve është duke vazhduar procesi i rinumërimit të fletëvotimeve sipas listës së vendvotimeve për të cilat KQZ ka marrë vendim që të rinumërohen.

Sipas të dhënave të publikuara nga KQZ, aktualisht janë numëruar 96 nga 108 vendvotime, apo 88,68 për qind.

Në bazë të këtyre rezultateve, VV-ja prin me 43.99 për qind, pastaj është PDK-ja me 18.85, LDK-ja me 15.11 dhe AAK-ja me 8.74 për qind.

Bekë Berisha zgjedhet kryetar i KB Sigal Prishtina

Bekë Berisha është zgjedhur kryetar i klubit të basketbollit Sigal Prishtina, duke marrë shumicën e votave në Kuvendin Zgjedhor të klubit.

KB Prishtina ka mbajtur Kuvendin Zgjedhor, ku tashmë klubi i basketbollit ka një president të ri, Bekë Berishën, që ka fituar shumicën e votova.

Hallakama në LDK, Abdhixhiku i përgjigjet Hykmete Bajramit

Kryetari i Lidhjes Demokratike të Kosovës (LDK), Lumir Abdixhiku, ka reaguar pasi nënkryetarja e këtij subjekti politik, Hykmete Bajrami, ka ofruar dorëheqjen e saj.

Abdixhiku, pos tjerash, ka deklaruar se “më shumë se dorëheqja nuk kam çfarë të ofroj”, teksa ka shtuar se LDK’ja nuk është “vendim i rrjeteve sociale e duartroktijeve të kundërshtarëve”.

Reagimi i plotë:

Më shumë se dorëheqja nuk kam çfarë të ofroj!

Kam dëgjuar dhe jemi dëgjuar me njëri-tjetrin me vëmendje. Çdo zë, çdo kritikë dhe çdo shqetësim, me orë të tëra. Pesë orë e gjysmë. Në fund kemi dalur me përgjegjësi të plotë dhe me dinjitet para qytetarëve për të shprehur jo mendimin e një individi, as timin, por të shumicës dërmuese, ashtu siç u pajtuam pas pesë orë diskutimi.

Nuk i shmangemi asnjë përgjegjësie dhe nuk i ikim asnjë reflektimi. Unë, edhe më pak.

Kam marrë hapin më moral që një kryetar mund ta marrë: kam ofruar dorëheqjen time. Kam hapur rrugën për secilin që ka pretendime. Jeni të lirë të garoni; në Kuvend e keni mundësinë. Tani vendimi nuk është më i imi, është i LDK-së.

Dua ta them qartë; nuk jam i lidhur pas pozitës. Jam i lidhur pas shtëpisë. Dhe shtëpia ruhet me rregull, me dinjitet dhe me besim në anëtarësinë e saj dhe në secilën kërkesë të tyre.

Më shumë se dorëheqja nuk ka çfarë të ofrojë një politikan. Eliminimet politike mund të jenë legjitime si aspiratë, por edhe për to vendos anëtarësia si tërësi, jo ne individualisht.

Kemi thirrur Kuvendin. Aty flasim hapur. Aty propozojmë hapur. Aty vendosim hapur. Le ta presim Kuvendin. Le ta mbajmë debatin para shtëpisë sonë, me orë të tëra, me ditë të tëra po qe nevoja. Jemi të njohur për demokraci dhe liri veprimi. Le të sillemi me përgjegjësi. Sepse LDK nuk është reagim i çastit, nuk është as protagonizëm i ditëve të vështira; edhe më pak vendim i rrjeteve sociale e duartroktijeve të kundërshtarëve. LDK është institucion.

Ta keni të qartë. Jo sot, jo dje po gjithëherë: Fatin tim politik e vendos përballë LDK-së, jo mbi LDK-në. Dhe çfarëdo vendimi që merr Kuvendi, do ta respektoj me nder dhe qetësi

Deri atëherë, le të sillemi si mbrëmë e si deri tash, pa dramë e pa protagonizëm, ballëhapur e me dinjitet.

Sepse mbi çdo emër është LDK.

Dhe kështu na takon të gjithëve.

Gjykata merr vendim për Ismet Zukaj, i dyshuar për plagosjen e dy serbëve dhe një avokati kosovar

Gjykata Themelore në Pejë – Departamenti për Krime të Rënda, ka caktuar masën e paraburgimit prej një muaji ndaj Ismet Zukajt, i dyshuar për veprën penale vrasje e rëndë në tentativë dhe mbajtje të paautorizuar të armëve.

Sipas njoftimit të Gjykatës, vendimi është marrë nga gjyqtari i procedurës paraprake Sh.C., pas shqyrtimit të kërkesës së Prokurorisë Themelore në Pejë.

Paraburgimi ndaj të dyshuarit fillon nga data e arrestimit më 13 janar 2026, në ora 00:17, dhe do të zgjasë deri më 12 shkurt 2026, në ora 16:00.

Ismet Zukaj dyshohet për veprën penale vrasje e rëndë në tentativë, nga neni 173 paragrafi 1 pika 1.1 lidhur me nenin 28 të Kodit Penal të Republikës së Kosovës, si dhe për mbajtje të paautorizuar të armëve, nga neni 366 paragrafi 1 i KPRK-së.

Rasti lidhet me plagosjen e trefishtë që ndodhi dje në Deçan, ku tre persona mbetën të plagosur si pasojë e të shtënave me armë zjarri. I dyshuari u arrestua pak orë pas incidentit, ndërsa bëhet e ditur se ai ka pasur edhe histori të mëparshme kriminale.

Palët kanë të drejtë ankese ndaj këtij vendimi në afat prej 48 orësh, përmes Gjykatës Themelore në Pejë, pranë Gjykatës së Apelit në Prishtinë.

NISMA do të marrë pjesë në çdo palë zgjedhje: Do jemi në strukturat e PDK-së

Artan Nimani, NISMA, ka deklaruar se Kosova rrezikon sërish të përballet me krizë institucionale, pasi sipas tij Lëvizja Vetëvendosje nuk është e kënaqur as me 51 për qind të fituar në zgjedhjet e 28 dhjetorit.

Nimani ka theksuar se Nisma ka vendim politik që të jetë pjesë e strukturave të PDK-së dhe se do të marrë pjesë në secilën palë të zgjedhjeve.

Ai shtoi se elektorati i Nismës dhe i PDK-së është i njëjtë dhe se, pavarësisht situatës, do të bëhen përpjekje për përafrim të qëndrimeve mes dy subjekteve.

“Prapë do të kemi krizë institucionale sepse VV;ja nuk është e kënaqur as me 51% e fituar. Nisma do të jetë pjesë e secilës palë të zgjedhjeve, ne kemi vendim politik që do të jemi pjesë e strukturave të PDK-së.Elektorati ynë dhe i PDK-së është i njëjti, sido që jetë situata ne do të bëjmë përpjeke që sërish të kemi një përafrim të qëndrimeve”, tha Nimani për GazetaBlic.

Dhimbje pa fund – u varros foshnja që humbi jetën në aksidentin në Gjermani

DHIMBJE PA FUND NË RATKOC, U VARROS FOSHNJA E FAMILJES MORINA

Sot, në fshatin Ratkoc, u bë varrimi i njërit prej binjakëve të familjes Morina, i cili humbi jetën si pasojë e një aksidenti trafiku në Gjermani.

Sipas informatave, në momentin e aksidentit në veturë ndodheshin prindërit së bashku me tre fëmijët e tyre: një fëmijë 3-vjeçar dhe binjakët 6-muajsh. Fatkeqësisht, njëri prej binjakëve, Teo, nuk arriti t’u mbijetojë plagëve të marra.

Familjarë, të afërm dhe qytetarë të shumtë i dhanë lamtumirën e fundit vogëlushit, ndërsa anëtarët e tjerë të familjes janë jashtë rrezikut për jetë.

Redaksia jonë shpreh ngushëllimet më të sinqerta për familjen e Mendim (Vllaznim) Morinës. 🕊️