Shkrimtari e analisti Albatros Rexhaj ka reaguar edhe njëherë tjetër për “sherrin” me analistin Berat Buzhala.

Përmes një video-selfie, Rexhaj ka sqaruar në detaje ngjarjen, duke potencuar se nuk ka pasur asnjë lloj kontakti fizik mes tij dhe analistit Buzhala.

Sipas Rexhajt, ai vetëm se e ka larguar kokën anash ndërsa nuk ka marrë asnjë goditje nga Buzhala.

“Pavarësisht se si duket në video situata në studio ishte ndryshe, nuk ka pasur kontakt mes meje dhe Beratit, ai thjesht i nervozuar ngritet nga karrige e tij dhe vjen në drejtim timin rrin aty nja dy sekonda dhe shkon, unë thjesht e largoj kokën anash. Ju e keni parë që unë nuk kam lëvizur fare”, thuhet në sqarimin e Rexhajt.

51-vjeçari Rexhaj ka thënë se nuk i ka dëgjuar fyerjet e Buzhalës në studion e Opinion, megjithatë shprehet i bindur se edhe nëse do t’i dëgjonte do të vepronte po njësoj.

“Në video i dëgjova edhe disa të shara por në studio skam pasur mundësi por më mirë që nuk i kam dëgjuar por edhe nëse do t’i kisha dëgjuar do të kisha vepruar njësoj. Ne jemi intelektual, arma jonë është fjala, në studio ishim për të debatuar, unë konsiderova se nuk ishte vendi të diskutohej për Albin Kurtin dhe Berati e mori emocionale, por kjo është çështje e tij”, ka thënë Rexhaj.

Ai ka sqaruar më pas se me Buzhalën janë pajtuar dhe ka thënë se për të kjo është çështje e mbyllur.

“Në pauzë pati sqarim dhe unë ia shtriva dorë, unë nuk jam njeri i konflikteve, koha e përpalasjeve fizike i takon rirnisë sime. Të gjithë kemi probleme, kërkoj ndihmë dhe trajtohem për ato probleme, por në debat tregohem i përmbajtur. Njerëzit duhet të jenë të lirë të shprehen ashtu si mendojnë. Për të gjithë ata që më kanë shkruar, ju them se kjo për mua është çështje e mbyllur”, ka përfunduar Rexhaj.