Albulena Haxhiu bleu sivjet banesë në vlerë 128 mijë euro

Ushtruesja e detyrës së Presidentes, njëherit Kryeparlamentarja Albulena Haxhiu ka blerë sivjet banesë në vlerë 128 mijë e 740 euro bashkë me bashkëshortin e saj, sipas deklarimit të pasurisë të publikuar në Agjencinë për Parandalimin e Korrupsionit,

Haxhiu ka deklaruar se këtë banesë, me sipërfaqe prej 128.74 metër katror, e kanë blerë me kredi. Tek detyrimet financiare figuron një kredi në vlerë 160 mijë euro në emër të saj, ku vlera e mbetur është 159 mijë e 89 euro.

Në emër të bashkëshortit, i cili është anëtar i VV-së në KQZ, ka deklaruar një banesë në vlerë 60 mijë euro dhe një tokë 15 mijë euro.

Tek pasuritë e luajtshme, Haxhiu ka deklaruar një veturë në vlerë 9 mijë e 700 euro, në pronësi të përbashkët.

Si para të gatshme, Haxhiu i ka deklaruar 1 mijë e 531 euro.

Tek detyrimet financiare, ka renditur edhe 1 mijë e 100 euro, në emër të bashkëshortit.

Si të hyra vjetore, Haxhiu ka renditur pagën nga Kuvendi në vlerë 22 mijë e 658 euro, mëditje në vlerë 234 euro, 1 mijë e 140 euro tjera nga shtesat dhe kompensimet tjera.

Ndërkohë në emër të bashkëshortit figuron paga në vlerë prej 16 mijë e 739 euro nga KQZ, dhe mëditje në vlerë 1 mijë e 747 euro nga udhëtimet jashtë vendit.

Naim Murseli: Jam plotësisht i pafajshëm, ju betohem!

Naim Murseli nuk e ka pranuar asnjë akuzë të hedhur ndaj tij për vrasjen e Liridona Ademajt. Murseli ka thënë se nuk ka kryer dhe nuk ka organizuar vrasje.

“Në momentin e vrasjes unë dhe fëmijët e mi kemi qenë duke ikur. Natën e vrasjes, fëmijët i dorëzova te familja Ademaj. Dy ditë pas ngjarjes, unë me fëmijët e mi isha në prokurori. Ju betohem që Naim Murseli nuk ka paguar për vrasjen. Liridona Meriton drejtësi të plotë dhe ju e keni në duar këtë”, ka thënë Naim Murseli.

Kjo është pasuria aktuale e kryeministrit Albin Kurti

Agjencia për Parandalimin e Korrupsionit ka publikuar deklarimin vjetor të pasurisë së kryeministrit Albin Kurti.

Kurtit duket se i është shtrenjtuar qiraja e banesës për 100 euro, teksa i kanë rënë kursimet.

Tek pasuritë e paluajtshme dhe të luajtshme nuk ka ndonjë ndryshim. Si pasuri të paluajtshme, Kurti ka përmendur banesën e bashkëshortes, në vlerë 530 mijë euro.

Para të gatshme në emër të tij i ka deklaruar 16.41 centë, në emër të bashkëshortes 19 mijë e 500 me prejardhje nga paga dhe trashëgimi nga prindi, 2 mijë euro kursime të vajzës dhe 50 euro tjera të vajzës, që thotë se e kanë prejardhjen nga familjarët.

Vjet ai i kishte deklaruar si kursime 1800 euro.

Si borxhe, ka deklaruar kredinë e bashkëshortes në vlerë të mbetur 160 mijë euro, dhe ka renditur qiranë e banesës që tash e paguan 350 euro, nga 250 sa e paguante vjet.

Tek të hyrat vjetore, Kurti ka renditur 21 mijë e 315 euro nga paga si Kryeministër dhe 51 mijë euro të bashkëshortes.

Prokurorja kërkon burgim të përjetshëm për Naim Murselin dhe të akuzuarit e tjerë

Prokurorja Javorka Perlinqeviq ka kërkuar dënim maksimal me burgim të përjetshëm për Naim Murselin dhe të akuzuarit e tjerë në rastin e vrasjes së Liridona Ademajt.

Sipas Perlinqeviq, është vërtetuar se Naim Murseli ka vepruar për përfitim financiar apo moral, duke e simuluar një grabitje në të cilën viktima është trajtuar si “dëm kolateral”, ndërsa sipas pretendimeve të aktakuzës, ai ka marrë pjesë në organizimin dhe planifikimin e vrasjes.

Në seancë është theksuar se vrasja është kryer nga i akuzuari Granit Plava, i cili ka shtënë me armë që dyshohet se është siguruar përmes Naim Murselit, ndërsa një tjetër i akuzuar ka ndërmjetësuar në sigurimin e armës dhe kontaktin mes personave të përfshirë.

Ajo thekson se të akuzuarit ngarkohen edhe për moslajmërim të veprës penale dhe kryerësve të saj, sipas dispozitave të Kodit Penal të Republikës së Kosovës.

Në kërkesën përfundimtare, Perlinqeviq i ka propozuar gjykatës shpalljen fajtorë të të akuzuarve, duke vlerësuar se veprimi, mënyra e kryerjes, sjellja pas ngjarjes dhe tentativat për manipulim publik rëndojnë pozitën e tyre, ndërsa sipas saj nuk ekzistojnë rrethana lehtësuese.

Prokurorja ka kërkuar që të shqiptohet dënimi maksimal i paraparë për veprën penale “vrasje e rëndë”, respektivisht burgim i përjetshëm.

Shkencëtarët ngrenë alarmin, rryma kryesore e Atlantikut mund të pësojë kolaps, rreziqet që do të sillte për miliona njerëz

Një shembje e sistemit kryesor të rrymës Atlantike është shumë më e mundshme nga sa mendohej më parë, sipas një studimi të ri që tregon se modelet klimatike në rastin më të keq janë gjithashtu më realiste. Shkencëtarët e kanë quajtur zbulimin “thellësisht shqetësues” sepse shembja e sistemit do të kishte pasoja katastrofike për Evropën, Afrikën dhe Amerikën, shkruan The Guardian.

Qarkullimi Meridional i Përmbysjes së Atlantikut (AMOC) është një pjesë kyçe e sistemit global të klimës dhe, për shkak të krizës klimatike, ai është tashmë në nivelin e tij më të dobët në 1,600 vitet e fundit. Shkencëtarët panë shenja të një pike të mundshme kthese që në vitin 2021 dhe dihet se AMOC është shembur në të kaluarën e Tokës.

Pasiguria e reduktuar në parashikime

Klimatologët përdorin dhjetëra modele të ndryshme kompjuterike për të vlerësuar klimën e ardhshme, por në rastin e sistemit kompleks Amoc, rezultatet e tyre deri më tani kanë ndryshuar në mënyrë drastike. Parashikimet kanë variuar nga ato që nuk tregojnë ngadalësim të mëtejshëm deri në vitin 2100 deri në ato që sugjerojnë një ngadalësim masiv prej rreth 65 përqind, madje edhe me ulje graduale të emetimeve të karbonit në zero neto.

Hulumtimi i ri, i botuar në revistën Science Advances, kombinoi vëzhgimet aktuale të oqeanit me modelet për të përcaktuar se cilat janë më të besueshmet, duke zvogëluar ndjeshëm gamën e pasigurisë. Rezultatet sugjerojnë një ngadalësim prej 42 deri në 58 përqind deri në vitin 2100, një nivel që pothuajse me siguri çon në kolaps.

Amoc luan një rol kyç në sistemin global të klimës duke sjellë ujë të ngrohtë tropikal drejt Evropës dhe Arktikut, ku ftohet dhe fundoset, duke krijuar një rrymë të thellë të kundërt. Rënia e tij do të zhvendoste brezin e shiut tropikal nga i cili varen miliona njerëz për të siguruar ushqim, do ta zhytste Evropën Perëndimore në dimra jashtëzakonisht të ftohtë dhe thatësira verore, dhe do të rriste më tej nivelin e detit përgjatë bregdetit të Atlantikut me 50 deri në 100 centimetra.

Shkencëtarët: “Një rezultat shumë shqetësues”

Dr. Valentin Portmann nga qendra franceze e kërkimit Inria, i cili udhëhoqi studimin, tha: “Ne zbuluam se Amoc do të dobësohet më shumë se sa pritej krahasuar me mesataren e të gjitha modeleve klimatike. Kjo do të thotë se Amoc është më afër pikës së kthesës.”

Profesori Stefan Rahmstorf i Institutit Gjerman për Kërkime mbi Ndryshimet Klimatike në Potsdam i quajti rezultatet të rëndësishme dhe shumë shqetësuese. “Kjo tregon se modelet ‘pesimiste’, të cilat parashikojnë një dobësim të fortë të Amoc deri në vitin 2100, për fat të keq janë realiste sepse përputhen më mirë me të dhënat vëzhguese”, tha ai.

“Jam gjithnjë e më i shqetësuar se mund të arrijmë atë pikë kthese të mbylljes së Amoc, pas së cilës kolapsi bëhet i pashmangshëm, që në mesin e këtij shekulli, gjë që është shumë afër”, shtoi Rahmstorf.

Rahmstorf, i cili ka studiuar Amoc-in për 35 vjet, thotë se shembja e tij duhet të shmanget “me çdo kusht”. “E thashë këtë kur menduam se probabiliteti i zhdukjes së Amoc-it ishte ndoshta 5 përqind, dhe atëherë thamë se rreziku ishte shumë i lartë duke pasur parasysh pasojat e mëdha. Tani duket se është më shumë se 50 përqind. Ndryshimet më dramatike të klimës në 100,000 vitet e fundit të historisë së Tokës ndodhën pikërisht kur Amoc kaloi në një gjendje tjetër”, paralajmëroi ai.

Si ndikon ngrohja globale në Amoc

Ngadalësimi i Amoc po ndodh sepse temperaturat e ajrit në Arktik po rriten me shpejtësi për shkak të ngrohjes globale. Kjo bën që oqeani atje të ftohet më ngadalë. Uji më i ngrohtë është më i hollë dhe për këtë arsye zhytet më ngadalë në thellësi. Ky ngadalësim lejon që më shumë reshje të grumbullohen në ujërat sipërfaqësore, gjë që zvogëlon kripësinë dhe dendësinë e tyre dhe ngadalëson më tej fundosjen e tyre.

Sistemi Amoc është jashtëzakonisht kompleks dhe i nënshtrohet variacioneve natyrore, duke i bërë parashikimet e sakta të pamundura. Megjithatë, shkencëtarët tani presin një dobësim të ndjeshëm, i cili në vetvete mund të ketë pasoja serioze në dekadat e ardhshme.

Në analizën e re, ulja e pasigurisë erdhi nga identifikimi i modeleve që kapin më mirë kripësinë sipërfaqësore në Atlantikun Jugor, të cilën shkencëtarët e dinin më parë se ishte një faktor i rëndësishëm. Kjo, sipas Rahmstorf, e bën punën “shumë të besueshme”.

Rahmstorf më në fund paralajmëroi se ngadalësimi i Amoc deri në vitin 2100 mund të jetë edhe më i madh se ky vlerësim i ri pesimist. Arsyeja është se modelet kompjuterike nuk përfshijnë ujin e shkrirë nga shtresa e akullit të Grenlandës, gjë që gjithashtu zvogëlon kripësinë e ujërave të oqeanit. “Ky është një faktor shtesë që do të thotë se realiteti është ndoshta edhe më i keq”, përfundoi ai.

‘Atë gishtin fute…’, Grida humb qetësinë, nxjerr të ftuarin nga studio

Vjosa Osmani drejt rikthimit në LDK, konfirmohen bisedimet

Nënkryetarja e Lidhja Demokratike e Kosovës, Doarsa Kica-Xhelili, ka deklaruar se partia e saj vazhdon të funksionojë si një “shtëpi e hapur politike”.

Kica-Xhelili theksoi se është e informuar për bisedimet e LDK-së me ish-presidenten Vjosa Osmani, por theksoi se asgjë nuk duhet të konsiderohet zyrtare pa një konfirmim publik.

“Në politik, partitë qëndrojnë si shtëpi të hapura apo të mbyllura politike. Kjo varet për mënyrën se si funksionojnë ato parti. Ndërkaq LDK-ja vazhdon të mbetet shtëpi e hapur politike.

Unë jam plotësisht e informuar për bisedimet që po zhvillohen në ish-presidenten apo presidenten Vjosa Osmani. Sikurse jam e bindur që në momentin që ka diçka zyrtare ajo juve do të iu kumtohet nga kryetari i LDK-së. Derisa një gjë e tillë nuk kumtohet direkt nga ai de LDK-ja në platformat e saj zyrtare. Atëherë asgjë nuk është zyrtare, nëse mund ta përmbyll me kaq”, ka thënë Kica-Xhelili.

Mblidhet Kuvendi, ky është rendi i ditës

Kuvendi i Kosovës sot do të mbajë seancën e radhës. Pikë e rendit të ditës do të jetë vendimi i Qeverisë së Kosovës për dërgimin e Forcës së Sigurisë së Kosovës jashtë vendit, si pjesë e Forcës Ndërkombëtare Stabilizuese në Gaza.

Gjithashtu, gjatë seancës do të shqyrtohet edhe projektligji për Byronë për Konfiskimin dhe Sekuestrimin e Pasurisë së Pajustifikueshme.

Po ashtu, në rend dite është edhe propozimi i dy kandidatëve për gjyqtarë në Gjykatën Kushtetuese të Republikës së Kosovës.

Çmimet e naftës bien pas armëpushimit Izrael-Liban

Çmimet e naftës ranë pak të premten në mëngjes në Azi, pasi hyri në fuqi një armëpushim midis Libanit dhe Izraelit.

Konflikti tensionoi një armëpushim të kushtëzuar dyjavor midis ShBA-së dhe Iranit, me Teheranin që tha se sulmet e Izraelit ndaj Libanit ishin një shkelje e marrëveshjes.

Çmimi i naftës së papërpunuar Brent ra me gati 1% në 98.50 dollarë (72.86 paund) për fuçi, ndërsa nafta e tregtuar në ShBA ra me 1.2% në 93.60 dollarë, shkruan BBC.

Tregjet kryesore aziatike shënuan rënie të premten në mëngjes, pasi u rritën gjatë javës. Indeksi Nikkei 225 i Japonisë ra me 0.8%, ndërsa Kospi në Korenë e Jugut ra me 0.3%.

Familjarja e viktimave rrëfen tragjedinë në Malishevë: Fëmijët s’kishin puls, s’munda t’i përqafoj për herë të fundit

Një familjare e viktimave ka rrëfyer momentet e rënda pas zjarrit tragjik në një banesë në Malishevë, ku humbën jetën një baba dhe dy fëmijët e tij.

Ajo ka treguar se ishte ndër të parat që ka hyrë në banesë dhe ka tentuar t’u japë ndihmë fëmijëve, por sipas saj, ata nuk kishin më shenja jete.

“Nuk është asgjë në rregull në këtë banesë, absolut… Unë dola te dera e banesës, në dorë të kunatës ishin fëmijët, njëri në një anë e tjetri në tjetrën. U mundova t’i prek nëse kishin puls, por nuk pashë që kishin shenja jete. I mora menjëherë fëmijët, i futa në veturë dhe i dërgova në ambulancë. Nuk munda as t’i puth e t’i përqafoj për herë të fundit. E kam djalë të dajës këtë, dhe fëmijët i kam pasur thuajse të mijtë. Nuk kishin puls, të dy ishin pa shenja jete, kanë qenë të djegur krejt”, ka deklaruar ajo, transmeton Dukagjini.

Sipas banorëve të zonës, banesat ku ndodhi rasti janë të dedikuara për familje me asistencë sociale dhe janë ndërtuar para rreth tre vitesh.

Mësohet se fëmijët jetonin me babanë e tyre, i cili gjithashtu humbi jetën si pasojë e zjarrit.

Shkaqet e zjarrit ende nuk dihen.