Osmani: Alternativa e vetme është LDK-ja, mos ta lëmë Kosovën të shkojë drejt katrahurës

Kandidatja për presidente nga Lidhja Demokratike e Kosovës, Vjosa Osmani, ka bërë thirrje për unitet dhe mbështetje për LDK-në, duke thënë se vendi nuk duhet të lejohet të shkojë drejt “katrahurës”, raporton Ekonomia Online.

Në një tubim zgjedhor në Klinë, Osmani tha se sakrifica për Kosovën do të ketë kuptim vetëm nëse ruhet shpresa dhe bashkimi për të ardhmen e të rinjve.

“Por natyrisht që tërë ajo sakrificë do të ketë kuptim vetëm kur secili prej nesh, secili dhe jo vetëm ne që jemi në politikë, e kuptojmë se e kemi mision kombëtar, e mision historik madje, që për hir të këtyre fëmijëve që i pamë pak më herët në skenë, të të gjithë fëmijëve, të gjithë vajzave dhe djemve të këtij vendi, mos ta lëmë shtetin tonë të shkojë drejt katrahurës. Mos lejojmë që shpresa të vdesë për secilin të ri e të re në vendin tonë. Mos lejojmë që përçarja t’i zë vend bashkimit. Mos lejojmë që ofendimet e fyerjet ndaj nënave shqiptare, përfshirë edhe nënave që i dhanë bijtë e bijat e veta për këtë komb, të zënë vend në moralin e shoqërisë sonë”, tha ajo.

Osmani tha se qytetarët duhet të zgjedhin rrugën e bashkimit dhe të vizionit euroatlantik, duke vlerësuar se alternativa e vetme është LDK-ja.

“Por ta zgjedhim pikërisht të kundërtën. Ta zgjedhim atë forcë e atë vizion që gjithmonë e ka shtyrë shtetin tonë e kombin tonë aty ku duhet: në rrugën e bashkimit, në rrugën e vizionit euroatlantik, në rrugën e bashkimit të shqiptarëve rreth vlerave familjare në njërën anë dhe vlerave më të larta kombëtare në anën tjetër. Dhe ju e dini cila është ajo alternativë. Sepse ka qenë gjithmonë vetëm një, dhe edhe sot është vetëm një. Dhe ajo është lëvizja më e madhe që ka njohur populli shqiptar për liri, pavarësi e demokraci. Ajo është pikërisht Lidhja Demokratike e Kosovës”, tha ajo.

Ajo u bëri thirrje qytetarëve që të vazhdojnë angazhimin për të ardhmen e fëmijëve dhe mirëqenien e familjeve në Kosovë.

“Prandaj ju ftoj, unë ju ftoj në këto momente vendimtare për të ardhmen e këtyre fëmijëve si drita, ju ftoj që mos ta ndalim kurrë mundin, mos ta ndalim kurrë punën, mos ta ndalim madje as sakrificën e nevojshme që duhet secili ta bëjë. Sepse ju e dini shumë mirë çka bën nëna për fëmijën, çka bën babai për fëmijën është gjithçka. Nuk ka kufi. Prandaj për këta fëmijë, që ata të kenë perspektivë, që të kenë shkollim që e meritojnë, që të kenë shërbime cilësore shëndetësore, që të kenë punësim të garantuar, që të kenë edhe praktikë e specializim të garantuar, që familja të ketë mirëqenien e nevojshme që mos të ketë nevojë të mendojë që buxhetin familjar ta shpenzojë për ushqimin e fëmijëve, apo për veshmbathjen e tyre, apo për shpenzimet e tjera, apo për pagesën e rrymës, por të ketë mirëqenie e cila e ndien edhe dorën e shtetit, ju lus që mos ta ndalni punën, t’ia japim fëmijëve tanë, fëmijëve të Republikës së Kosovës këtë alternativë të cilën e meritojnë”, tha ajo.

Çështja e energjisë elektrike, Kushtetuesja rrëzon vendimin e Supremes

Gjykata Kushtetuese e Republikës së Kosovës ka konstatuar shkelje të së drejtës për gjykim të drejtë dhe të paanshëm në një rast që lidhet me tregun e lirë të energjisë elektrike, duke shpallur të pavlefshëm një vendim të Gjykatës Supreme dhe duke e kthyer çështjen për rishqyrtim.

Bëhet fjalë për rastin KI322/25, të fituar para Gjykatës Kushtetuese nga Zyra Ligjore Basha Kraja LLC, e cila përfaqësoi klientin në këtë procedurë. Në këtë rast, Gjykata Kushtetuese vlerësoi se Gjykata Supreme kishte cenuar të drejtën për qasje efektive në gjykatë, duke refuzuar të shqyrtojë në substancë një padi që kishte të bënte me një Udhëzues të nxjerrë nga Zyra e Rregullatorit për Energji (ZRRE).

Kontesti lidhej me një udhëzues të ZRRE-së që, sipas pretendimeve të paraqitura në gjykatë, kishte prodhuar pasoja të drejtpërdrejta juridike dhe ekonomike për operatorët ekonomikë, duke ndikuar në kalimin e tyre nga shërbimi universal i furnizimit me energji elektrike në tregun e lirë.

Sipas pretendimeve të paraqitura nga pala paditëse, udhëzuesi kishte ndryshuar në substancë kriteret e përcaktuara me Ligjin për Energjinë Elektrike, pavarësisht se ishte paraqitur si një dokument me karakter udhëzues. Për këtë arsye, ishte kërkuar që ligjshmëria dhe efektet e tij të shqyrtoheshin në mënyrë të plotë nga gjykatat.

Megjithatë, Gjykata Supreme kishte refuzuar ta shqyrtonte çështjen në substancë, duke u fokusuar kryesisht në formën juridike të aktit dhe duke vlerësuar se ai nuk përbënte akt që mund të kontestohej në procedurë gjyqësore.

Në aktgjykimin e saj, Gjykata Kushtetuese theksoi se gjykatat nuk mund të kufizohen vetëm në emërtimin ose formën e një akti, por duhet të analizojnë edhe efektet reale juridike që ai prodhon. Sipas saj, qasja e ndjekur nga Gjykata Supreme kishte qenë tepër formaliste dhe nuk kishte adresuar ndikimin konkret që udhëzuesi mund të kishte në të drejtat dhe interesat juridike të palës.

Kushtetuesja vlerësoi se mosshqyrtimi i substancës së pretendimeve dhe fokusimi vetëm në formën e dokumentit kishte cenuar të drejtën për qasje efektive në gjykatë, e garantuar me Kushtetutën e Republikës së Kosovës dhe standardet evropiane për të drejtat e njeriut.

Për pasojë, Gjykata Kushtetuese shpalli të pavlefshëm Aktvendimin e Gjykatës Supreme me numër P.A. nr. 24/2025 dhe urdhëroi kthimin e çështjes për rishqyrtim.

Ky aktgjykim konsiderohet i rëndësishëm jo vetëm për palët e përfshira në këtë rast, por edhe për zhvillimin e jurisprudencës kushtetuese në Kosovë. Ai riafirmon parimin se mbrojtja gjyqësore e të drejtave nuk duhet të pengohet nga formalizmat procedurale kur në pyetje janë të drejta dhe interesa reale juridike.

Njohës të çështjeve juridike vlerësojnë se vendimi dërgon një mesazh të qartë se institucionet dhe gjykatat duhet të vlerësojnë përmbajtjen dhe efektet konkrete të akteve administrative dhe rregullatore, e jo vetëm formën e tyre, veçanërisht kur ato mund të ndikojnë drejtpërdrejt në pozitën juridike dhe ekonomike të qytetarëve apo operatorëve ekonomikë.

Përfaqësuesit e Zyrës Ligjore Basha Kraja LLC kanë vlerësuar se aktgjykimi përbën një hap të rëndësishëm në avancimin e parimeve kushtetuese që lidhen me qasjen në drejtësi dhe mbrojtjen efektive gjyqësore të të drejtave, duke theksuar se drejtësia nuk mund të kufizohet vetëm në formalizma procedurale kur një akt prodhon pasoja konkrete juridike dhe ekonomike.

Matjet e fundit: Ky është rezultati që po i parashikohet VV-së në zgjedhjet e 7 qershorit

Analisti Shenoll Muharremi ka treguar se ka parë tri matje të opinionit publik që flasim për rezultatin e zgjedhjeve të 7 qershorit.

Duke mos dhënë shumë detaje, ai ka bërë me dije se këto matje tregojnë se VV-ja nuk i ka punët mirë.

Në profilin e tij në Facebook, Muharremi ka shkruar se matjet po tregojnë se VV-ja sillet rreth rezultatit të zgjedhjeve të 9 shkurtit të vitit të kaluar.

“Një problem të madh e ki këto zgjedhje, dije. Ma shumë po të shkon rezultati drejt 9 shkurtit sesa drejt asaj që po e kërkon. Jo një, por tri matje të opinionit publik që i pashë këto ditë ashtu sugjeronin. Lirisht nisja me e pi kafen 40-she”, ka shkruar ai.

Konfirmohet linja e deleve në Kosovë/ AUV-i merr masa urgjente në të gjithë vendin

Në fshatin Delloc të Suharekës është konfirmuar prezenca e sëmundjes “lija e deleve/dhive (Sheep Pox/GoatPox)”

Lajmin e ka bërë të ditur Agjencia e Ushqimit dhe Veterinarisë, duke u bazuar në analizat diagnostike të kryera nga vet Agjencia, shkruan IndeksOnline.

“Mostrat e marra dhe të analizuara në Laboratorin e Ushqimit dhe Veterinarisë kanë vërtetuar praninë e kësaj sëmundjeje. Menjëherë pas konfirmimit, ekipet e AUV-së, në bashkëpunim me veterinerët privatë dhe akterët e tjerë relevantë, kanë ndërmarrë masat e nevojshme për kontrollimin e situatës dhe parandalimin e përhapjes së mëtejshme të sëmundjes” thuhet në njoftim.

Ky është njoftimi i plotë:

Bazuar në rezultatet e analizave diagnostike të kryera nga Agjencia e Ushqimit dhe Veterinarisë (AUV), është konfirmuar prania e sëmundjes Lija e Deleve/Dhive (Sheep Pox/Goat Pox) në një fermë të deleve në fshatin Delloc, Komuna e Suharekës.

Mostrat e marra dhe të analizuara në Laboratorin e Ushqimit dhe Veterinarisë kanë vërtetuar praninë e kësaj sëmundjeje. Menjëherë pas konfirmimit, ekipet e AUV-së, në bashkëpunim me veterinerët privatë dhe akterët e tjerë relevantë, kanë ndërmarrë masat e nevojshme për kontrollimin e situatës dhe parandalimin e përhapjes së mëtejshme të sëmundjes.

Bazuar në Ligjin Nr. 2004/21 për Veterinarinë, Ministria e Bujqësisë, Pylltarisë dhe Zhvillimit Rural përmes Agjencia e Ushqimit dhe Veterinarisë, vendos masat e përgjithshme për kontrollin, parandalimin dhe luftimin e sëmundjes Lija e Deleve/Dhive (Sheep Pox/GoatPox) në Kosovë.

Masat zbatohen në gjithë territorin e republikës se Kosovës ( varësisht nga situata masat mund të ndryshojnë)

I. Masat e përgjithshme:

a) Ndalohet lëvizja e kafshëve dele dhe dhi nga fermat,  tregtimi në tregje  dhe  shitblerja;

b) Fermat në të cilat konfirmohet prezenca e sëmundjes, vendosen ne masë izolimi/karantine të plot. U ndalohet çdo lëvizje hyrje dalje.

c) Obligohen fermerët mbajtës të deleve dhe dhive që për çdo ndryshim të gjendjes shëndetësore të kafshëve, menjëherë të njoftojnë veterinarin. Praktikat veterinare janë të obliguar të zbatojnë protokollet shëndetësore veterinare për parandalimin dhe luftimin e kësaj sëmundje

d) Fermerët mbajtës të deleve dhe dhive të aktivizojnë masat e biosigurisë ne fermat e tyre.

e) Të përcaktohen lokacionet për Groposjen e kafshëve të ngordhura nga Komunat;

f) AUV vazhdon me hulumtimin epidemiologjik, marrjen e mostrave dhe kryerjen e testimeve laboratorike;

II. Përjashtimisht nga pika I e këtij vendimi, lejohet lëvizja kafshëve nga fermat e lira nga kjo sëmundje deri në thertore të licencuara,  me pëlqimin paraprak të inspektorit veterinar të Agjencisë së Ushqimit dhe Veterinarisë.

III. Urdhërohen të gjithë menaxheret e tregjeve që nga momenti i hyrjes në fuqi të këtij vendimi të pezullojnë punën për tregtimin e kafshëve të imta dele dhe dhi.

IV. Obligohen Policia e Kosovës, organet Komunale që në koordinim dhe         bashkëpunim me AUV-në  të bëjnë mbikëqyrjen e zbatimit të masave.

V. Masat hyjnë në fuqi menjëherë.

Raportoni në numrin:

0800 500 95   Pa pagese 24h

Çfarë është sëmundja Lija e deleve/dhive?

Lija e dhenve (e njohur edhe si sheeppox/goatpox) është një sëmundje virale shumë ngjitëse që prek delet dhe dhitë. Ajo shkaktohet nga një virus i familjes Capripoxvirus dhe është ndër sëmundjet më të rënda për këto specie, me pasoja të mëdha ekonomike.

Simptomat?

• Temperaturë e lartë (40–42°C)

• Humbje oreksi dhe plogështi

• Rrjedhje nga hunda dhe sytë

• Lezione (puçrra, plagë) në lëkurë, sidomos në kokë, veshë, bark dhe rreth organeve gjenitale

• Vështirësi në frymëmarrje (nëse prek mushkëritë)

• Në disa raste: diarre dhe dobësim i përgjithshëm

Si transmetohet?

• Kontakt i drejtpërdrejtë me kafshë të infektuara

• Sekrecione (pështymë, rrjedhje nga hunda)

• Përmes mjedisit të kontaminuar (stallat, mjetet, transporti)

Kjo sëmundje nuk është zoonotike, nuk përbën rrezik për shëndetin e njerëzve dhe nuk transmetohet nga kafsha tek njeriu.

AUV mbetet e përkushtuar në monitorimin e situatës dhe zbatimin e të gjitha masave të parapara për mbrojtjen e shëndetit të kafshëve.

56 vjeçari nga Podujeva kapet në flagrancë me 15 vjeçaren, arrestohet nga Policia

Një rast i rëndë që përfshin një vajzë të mitur është zbuluar pas ndërhyrjes së Policisë së Kosovës në Podujevë, ku një burrë 56-vjeçar ka përfunduar në pranga nën dyshimin për sulm seksual.

Ngjarja ka ndodhur pasditen e 29 majit në rrugën “Met Podujeva”, pasi Policia kishte pranuar informacion se një person i moshës madhore ndodhej në shoqëri të një vajze të mitur në afërsi të ish-“Corner Bar”.

Sipas burimeve të besueshme nga strukturat e afërta me hetimin, njësitë policore kanë reaguar menjëherë dhe, me të arritur në lokacion, kanë hasur të dyshuarin G. G, 56-vjeçar, bashkë me një vajzë 15-vjeçare. Siç rezulton nga hetimi preliminar, në momentin e arritjes së Policisë në vendin e ngjarjes, zyrtarët kanë vërejtur të dy duke u përqafuar.

Pas ndërhyrjes, i dyshuari është ndaluar dhe është shoqëruar në Stacionin Policor në Podujevë, ku është intervistuar në praninë e avokatit mbrojtës.

Ndërkohë, e mitura me inicialet A.B. është intervistuar në cilësinë e viktimës, në praninë e përfaqësuesve të Qendrës për Punë Sociale.

Me urdhër të Prokurorit kujdestar, rasti është iniciuar si “Sulm seksual”, ndërsa ndaj G. G është caktuar masa e ndalimit prej 48 orësh.

Hetimet janë në zhvillim dhe organet kompetente po punojnë për zbardhjen e plotë të rrethanave të këtij rasti.

Pagat, Murati jep njoftimin e rëndësishëm

Ministri në detyrë i Financave, Hekuran Murati, ka deklaruar se paga mesatare në Kosovë është rritur për 53 për qind gjatë mandatit të Qeverisë Kurti, duke iu referuar të dhënave të publikuara nga Agjencia e Statistikave të Kosovës.

Sipas tij, paga mesatare bruto në vend për vitin 2025 ka arritur në 713 euro, që paraqet një rritje prej 247 eurosh krahasuar me nivelin e vitit 2020, kur Qeveria Kurti mori mandatin.

Murati ka theksuar se gjatë periudhës 2014-2019 paga mesatare ishte rritur për 74 euro, apo 18 për qind, duke shtuar se rritja gjatë qeverisjes së tanishme ka qenë tri herë më e madhe sesa gjatë qeverive të udhëhequra nga Isa Mustafa dhe Ramush Haradinaj.

“Këtë e thonë të dhënat zyrtare të ASK-së”, ka shkruar Murati, duke u bërë thirrje mediave dhe analistëve që, kur flasin për rritjen e pagave, t’u referohen statistikave zyrtare për të siguruar informim sa më të saktë të qytetarëve./Zëri

E trishtë: Vdes i riu shqiptar me motoçikletë

Pas aksidentit me një veturë, derisa po lëvizte me motoçikletë, ndërroi jetë 20 vjeçari, transmeton Portalb.mk.

Aksidenti ndodhi në orë e mbrëmjes, ndërsa nga audio incizimet shihet se si aksidenti ndodhi në orën 22:22.

Aty u përfshi një veturë dhe dy motorë, ashtu qe njeri i mbijetoi aksidentit, ndërsa Muzafer Fetahi ndërroi jete.

E sulmoi nënën e tij, arrestohet i riu

Një rast i dhunës në familje është raportuar të premten në Vushtrri, ku një grua dyshohet se është sulmuar fizikisht nga djali i saj.

E gjithë, sipas policisë, kjo erdhi si pasojë e një mosmarrëveshjes mes dy personave, transmeton Klankosova.tv.

I dyshuari është arrestuar dhe pas intervistimit me vendim të prokurorit është dërguar në mbajtje.

“Je mirë, s’ke nevojë për psikiatër” – burri dyshohet se e tërhoqi zvarrë dhe e rrahu gruan

Një grua nga Fushë Kosova ka përfunduar viktimë e dhunës në familje, pasi dyshohet se u sulmua fizikisht nga bashkëshorti i saj vetëm pse kishte planifikuar të shkonte në një vizitë te psikiatri.

Burime të besueshme nga strukturat e afërta me hetimin bëjnë të ditur se rasti ka ndodhur pasditen e së premtes në rrugën e Uglarit, ku Policia është njoftuar për një incident brenda familjes.

Sipas deklarimit të viktimës R. M, ajo kishte pasur një termin të rregullt mjekësor te psikiatri, por bashkëshorti i saj, A. M, nuk e kishte lejuar të largohej nga banesa.

Madje, sipas dëshmisë së saj, ai e kishte tërhequr zvarrë dhe e kishte goditur me shuplaka, duke e kthyer me forcë brenda shtëpisë. Viktima ka deklaruar se gjatë incidentit i dyshuari i ishte drejtuar me fjalët: “Je mirë, nuk ke nevojë të shkosh te psikiatri”.

Pas denoncimit, Policia ka ndërmarrë veprimet hetimore dhe ka intervistuar palët e përfshira në rast.

Me urdhër të Prokurorit kujdestar për Dhunë në Familje, rasti është iniciuar si “Dhunë në familje”, ndërsa A. M është dërguar në ndalim për 48 orë në Qendrën e Paraburgimit.

Hetimet lidhur me rastin janë duke vazhduar.

Lajm i mirë për shoferët – bie për disa centë çmimi i naftës

Për tri ditë me radhë, nga sot, çmimet e derivateve në Kosovë do të shiten me çmime të njëjta.

Sipas njoftimit të Ministrisë së Industrisë, Ndërmarrësisë, Tregtisë dhe Inovacionit, çmimi i naftës nga sot do të shitet për 1.52 euro për litër, benzina për 1.43 euro për litër dhe gazi 0.74 euro.

Në njoftim thuhet se këto çmime vlejnë edhe për të dielën dhe të hënën.

Të premten çmimi i naftës ishte 1.55 euro për litër, tre centë më shtrenjtë se sot. Benzina ishte 1.49 euro, gjashtë centë më shtrenjtë se sot.

Nafta u shtrenjtua prej kur më 28 shkurt Shtetet e Bashkuara të Amerikës dhe Izraeli nisën luftën me Iranin, shtet që menjëherë mbylli Ngushticën e Hormuzit, e cila shfrytëzohet si rrugë detare për 20 për qind të naftës në nivel botëror.