Kosova preket nga të nxehtit afrikan! Ja kur nisin ditët e nxehta verore

Duke filluar nga kjo fundjavë, e veçanërisht të dielën më 1 qershor, rajoni i Ballkanit, përfshirë Kosovën dhe veçanërisht Maqedoninë e Veriut, pritet të përfshihet nga një valë ajri të ngrohtë që vjen nga Afrika.

Kjo do të sjellë rritje të ndjeshme të temperaturave, duke sjellë temperaturat e ajrit të verës.

Në fundjavë, në Kosovë temperaturat do të shkojnë deri në 26 gradë, ngjashëm do të jetë edhe në Maqedoni.

Nga e diela, temperaturat në rajon do të jenë si të verës, duke u ngjitur në intervalin 20-28 gradë Celsius.

Nesër do të mbyllen hyrjet kryesore të Prishtinës

Të enjten e 29 majit hyrjet kryesore të Prishtinës do të mbyllen për dy orë nga bizneset, në shenjë proteste ndaj liberalizmit të tregut të energjisë elektrike, që pritet të hyjë në fuqi më 1 qershor.

Në një kërkesë për bizneset, Oda Ekonomike e Kosovës ka njoftuar se për dy orë do të ketë protestë paqësore, teksa ka paralajmëruar se ato do të vazhdojnë deri në plotësim të kërkesave të bizneseve që të shtyhet dalja në treg të lirë dhe që të niset dialogu për të gjetur zgjidhje të pranueshme që tranzicioni të ndikojë sa më pak në sektorin privat.

Nga ora 10:00 deri në orën 12:00 do të bllokohen këto hyrje të Prishtinës.

Lokacionet e bllokimit:

Hyrja nga Veterniku – Hyrja nga Gjilani – do të bllokohet hyrja nga Albi Mall e poshtë Veternikut – Kështu bllokohen të gjitha hyrjet (Ferizaj, Gjilan, Aeroport)

Hyrja nga Fushë-Kosova – Hyrja nga Mitrovica – do të bllokohet hyrja prej rrethit të Madh te Lakrishtja (Dukagjini tower) – Kështu bllokohen të gjitha hyrjet nga Mitrovica dhe Fushë-Kosova

Hyrja nga Podujeva – Hyrja në lagjen e Vranjevcit – te ish-Humanisti – Udhëkryqi te banka Raiffeisen – bllokohen hyrje-daljet nga Podujeva, por edhe lëvizjet nga Dragodani në drejtim të Shkabaj/Orlloviq.

Rrugët do të bllokohen nga automjetet e kompanive që do të preken nga vendimi për dalje në treg të lirë.

Nëse kërkesat nuk plotësohen, Oda Ekonomike ka paralajmëruar protesta me kohëzgjatje deri në 4 orë dhe bllokim të plotë të hyrjeve në Prishtinë.

“Në mungesë të reagimit institucional: protesta do të vazhdojë çdo ditë, gjatë gjithë ditës, deri në reflektim dhe veprim konkret nga institucionet përgjegjëse”, thuhet në njoftim.

Zyra e Rregullatorit të Energjisë nuk ka sqaruar se si do të ndikojë në tarifat e energjisë dalja në treg të hapur e konsumatorëve me mbi 10 milionë euro qarkullim ose me mbi 50 punëtorë. Por sipas Odës Ekonomike, në treg të lirë janë ofertat me çmime prej 200 për qind më të larta.

Serbët protestojnë në Leposaviq

Para palestrës sportive në Leposaviq, të cilën organet komunale të Kosovës e morën dje nga organet paralele serbe nën juridiksionin e tyre dhe ndërruan bravën e derës hyrëse, sot është mbajtur një protestë.

Rreth orës 10:00, aty u mblodhën përfaqësues të klubeve sportive serbe, të cilët deri dje aty ushtronin me fëmijët.

Atyre iu bashkuan edhe qytetarë të tjerë për të përkrahur protestën, transmeton Paparaci.

Një nga përfaqësuesit e klubit sportiv ka deklaruar: „Jemi këtu të tregojmë pakënaqësinë për mbylljen e palestrës dhe “mohimin e të drejtës” që fëmijët tanë të merren me sport“, raporton Kossev

Në protestë morën pjesë edhe fëmijët, prindërit e tyre dhe trajnerët.

Në afërsi të objektit, si dhe përpara tij, ndodheshin patrulla të Policisë së Kosovës.

Të tubuarit, në shenjë pakënaqësie, fishkëllenin dhe thërrisnin „Ua“.

Siç konfirmoi një nga të pranishmit për KoSSev, protesta sapo ka përfunduar. Megjithatë, para palestrës sportive kanë mbetur ish-punëtorët e organeve ilegale serbe.

E rëndë: Ky është mërgimtari që humbi jetën tragjikisht në Itali, ishte duke shkuar në punë

Ai vdiq menjëherë teksa po shkonte në punë, i goditur nga makina e një studenti që kishte dalë jashtë kontrollit. Edmond Gjoci, 39 vjeç, banues në Tuoro të Italisë, i martuar dhe baba i një vajze 5-vjeçare, po ecte në buzë të rrugës rajonale 71 në Riccio.

Një “Lancia Y” u përplas mbi të dhe e rrëzoi përtokë si një birilë. Në tragjedinë që ndodhi këtë mëngjes në orën 7:45, ekziston hija e një shpërqendrimi fatal, kur fatet e një nxënësi 19-vjeçar të shkollës së mesme nga zona dhe një punëtori ferme u kryqëzuan në mënyrën më të tmerrshme.

I riu, i nënshtruar testeve, rezultoi negativ për alkool dhe çdo substancë tjetër. Kështu, midis hipotezave që po shqyrtohen nga Karabinierët, përveç sëmundjes së papritur, një avarie motorike ose një ngjarjeje të paparashikuar, ekziston edhe mungesa e përqendrimit gjatë drejtimit të automjetit.

Ndoshta për një kontroll të parëndësishëm, për të parë celularin, ose për diçka tjetër. Por për momentin nuk ka asgjë të sigurt në hetimin e hapur në mënyrë të pashmangshme nga prokuroria për vrasje rrugore. Përveç se, në fakt, këmbësori humbi jetën menjëherë dhe makina e vogël gri përfundoi jashtë rrugës pas përplasjes. Ai gjithashtu goditi një tabelë anës rrugës.

Që nga rindërtimi i parë i dinamikës, studenti e përshkonte të gjithë karrexhatën në mënyrë diagonale: vinte nga ana e Terontolës dhe po shkonte në drejtim të Cortonës. Makina dhe telefoni celular u sekuestruan. 39-vjeçari nga Trasimeno, me origjinë nga Shqipëria, por që jetonte në Tuoro prej rreth dhjetë vitesh, një person i thjeshtë dhe i njohur, vuri re vetëm automjetin që po shkonte drejt tij, por pa shmangur përplasjen fatale. Ai nuk arriti ta shpëtonte veten.

Ishte në buzë të rrugës së ngarkuar, pasi kishte mbërritur me autobus nga shtëpia: kishte një takim për të shkuar në punë, me sa duket në Pergo. Kur mbërritën makina mjekësore Alfa 3 dhe ambulanca, Edmond Gjoci ishte tashmë i vdekur.

Pas intervistimit disa orësh, reagon Peci: Mbi qiellin e kësaj toke e këtij populli, ka Zot!

Ministri në detyrë i Bujqësisë, Faton Peci, ka reaguar pas intervistimit disa orësh që e pati dje nga organet hetuese.

“Jam i bindur që epilogu i këtij procesi do të jetë i njohur për ju sikurse është i njohur për rreth 30 mijë fermerë, që përfitojnë në baza vjetore subvencione dhe grante e që njëherit janë dëshmitarët më të vëmendshëm në çdo cep të Kosovës. Ata, më së miri e dinë se në funksion të kujt, e kam kryer detyrën zyrtare”, ka shkruar ai.

Postimi i plotë:

Të dashur qytetarë, miq e familjarë;

U jam mirënjohës për shprehjen e shqetësimit si dhe për solidaritetin e treguar gjatë ditës së djeshme, me rastin e intervistimit tim nga organet e rendit dhe drejtësisë.

Me theks të vecantë, ju drejtohem 133,987 qytetarëve që më kanë dhuruar gjënë më të shenjtë; besimin!

Jam i bindur që epilogu i këtij procesi do të jetë i njohur për ju sikurse është i njohur për rreth 30 mijë fermerë, që përfitojnë në baza vjetore subvencione dhe grante e që njëherit janë dëshmitarët më të vëmendshëm në cdo cep të Kosovës. Ata, më së miri e dinë se në funksion të kujt, e kam kryer detyrën zyrtare.

Çdo shkronjë, fjalë, si në të shkruar ashtu edhe e thënë, është e qasshme për secilin që ka interesim.

Kosova, si vend i bekuar ka një popull të mrekullueshëm, e mbi qiellin e kësaj toke e këtij populli, ka Zot!

Rusia kërcënoi me luftë të tretë botërore, i kundër përgjigjet SHBA-ja

I dërguari i presidentit amerikan, Donald Trump, Keith Kellogg, ka qortuar të mërkurën një zyrtar të lartë rus për nxitjen e frikës nga Lufta e Tretë Botërore, pasi Trumpi paralajmëroi se presidenti rus, Vladimir Putin “po luante me zjarrin” për Ukrainën.

Teksa forcat ruse po vazhdonin sulmet e rënda mbi Ukrainë, Trumpi, ka thënë në një postim në “Truth Social”, se Putini po luan me zjarrin dhe paralajmëroi se gjëra “vërtetë të këqija” do t’i kishin ndodhur tashmë Rusisë nëse nuk do të ishte Trumpi, raporton Reuters.

“Ajo që Vladimir Putini nuk e kupton është se nëse nuk do të isha unë, shumë gjëra vërtet të këqija do të kishin ndodhur tashmë në Rusi, dhe dua të them ‘vërtetë keq’. Ai po luan me zjarrin”, ka shkruar Trumpi në postim të martën.

Zyrtari i lartë rus i sigurisë, Dmitry Medvedev, një ish-president, hodhi menjëherë poshtë kritikat e Trumpit.

“Sa i përket fjalëve të Trumpit për Putinin ‘që po luan me zjarrin’ dhe ‘gjëra vërtet të këqija’ që po i ndodhin Rusisë. Unë di vetëm një gjë vërtetë të keqe – LUFTA E Tretë Botërore. Shpresoj që Trumpi ta kuptojë këtë!”, ka shkruar Medvedev në anglisht në platformën e mediave sociale X.

Behrami ironizon me Kurtin për keqpërdorimet: Hajnia nuk është më në pyetje as në pikëpyetje

Deputeti i PDK-së, Artan Behrami, ka reaguar ndaj zhvillimeve të fundit ku është përfshirë Ministria e Bujqësisë.

Referuar intervistimit në Prokurorinë Speciale të të parit të asaj ministrie, Behrami ka ironizuar me një citat të liderit të Vetëvendosjes, mirëpo këtë herë duke përmendur hajninë

”Hajnia nuk është më në pyetje as në pikëpyetje. Nga i pari deri tek i fundit po vjedhshin.

Veç kur po i nxojnë, qysh ka lë fjalë Bekë Berisha: “Po u idhnojshin

Kosova nën kërcënim – Këto janë lëvizjet e rrezikshme të Serbisë

Ministri i Mbrojtjes i Kosovës, në detyrë, Ejup Maqedonci, në një intervistë për A2CNN, u është përgjigjur kërcënimeve direkte të lëshuara nga Serbia për luftë dhe pushtim.

Ai theksoi se kërcënimet janë reale dhe se Beogradi zyrtar ka vendosur 70 për qind të ushtrisë në kufirin tonë, por garantoi se FSK-ja, bashkë me aleatët amerikanë dhe të NATO-s, do të mbrojnë çdo pëllëmbë tokë të Kosovës.

“Ne i shohim gjithmonë si të mundshme këto kërcënime. Ne e shohim gjithmonë të mundshme që Serbia në një moment mund të ndërmarrë veprime për të destabilizuar rajonin. Kjo është edhe arsyeja pse ne jemi të përkushtuar që të ndërtojmë një forcë ushtarake të aftë për të mbrojtur territorin e Kosovës, për të mbrojtur jetën e qytetarëve tanë dhe për të kontribuar për paqen dhe stabilitetin në botë, duke përqafuar gjithmonë vlerat e NATO-s, vlerat perëndimore dhe duke shtyrë përpara interesat, të cilat i kemi si vendet demokratike.

Ne në vazhdimësi e ngremë si shqetësim prezencën e bazave të përparme operacionale të ushtrisë dhe xhandarmërisë serbe përgjatë vijës kufitare me Republikën e Kosovës. Diku 70% e të gjitha kapaciteteve ushtarake të ushtrisë së Serbisë janë të vendosura në jug të territorit të saj, pra jo larg Republikës së Kosovës. Kësaj duke i shtuar edhe këto 48 bazat e përparme që ne gjithmonë vlerësojmë se paraqesin kërcënim.

Kur fqinji t’i vendosë në kufi forcat ushtarake, në një farë forme apo një tjetër, e kërcënon sigurinë dhe stabilitetin e atij vendi. Kjo nuk po bëhet rastësisht. Dhe, kur e kemi gjithë këtë prezencë dhe kemi një mbështetje të grupeve kriminale dhe terroriste siç ishte ai i Radoiqiçit, që tentoi aneksim të veriut të vendit tonë, tregon për qasjen agresive që Serbia vijon ta ketë në raport me Republikën e Kosovës”, tha Maqedonci./A2CNN/

Pas kritikës së Trump, zyrtari rus: Di vetëm një gjë që është shumë e keqe, Lufta e Tretë Botërore

Kremlini ka reaguar ndaj presidentit amerikan, Donald Trump, pas deklaratës së tij drejtuar homologut të tij, Vladimir Putin, ku ai tha se po luan me zjarrin.

Zëvendëskryetari i Këshillit të Sigurisë së Federatës Ruse, Dmitry Medvedev, që është një nga njerëzit më të besuar të Vladimir Putin, komentoi duke thënë se “do të ishte shumë keq” nëse Lufta e Tretë Botërore shpërthente, në përgjigje të postimit të Trump.

Medvedev iu referua deklaratave të Trump për Putin, i cili kishte thënë se presidenti rus po “luan me zjarrin” dhe se “gjëra të këqija” do të kishin ndodhur në Rusi. Ai shtoi: “Unë di vetëm një gjë që është vërtetë shumë e keqe – Lufta e Tretë Botërore. Shpresoj që Trump ta kuptojë këtë!”

Trump kishte paralajmëruar se presidenti rus po “luan me zjarrin” në një postim të tij në platformën Truth Social. “Ajo që Vladimir Putin nuk e kupton është se nëse nuk do të ishte për mua, shumë gjëra të këqija do të kishin ndodhur tashmë në Rusi, dhe dua të them gjëra vërtetë të këqija,” shkroi Trump.

“72 mijë euro në ditë për transportin e energjisë nga Maqedonia – fituesi, djali i një gjenerali serb”

Janina Ymeri e Lidhjes Demokratike të Kosovës, ka nxjerrë të dhënat ku sot vetëm transporti i energjisë elektrike nga Maqedonia e Veriut në Kosovës ka kushtuar hiç më pak se 72 mijë euro dhe fitues i këtij transporti djal i një gjenerali serb.

“Transporti i Energjisë Elektrike (vetëm transporti), brenda ditës sot, nga Maqedonia deri në Kosovë, mbi 72,000 Euro. Një ndër fituesit e këtij transporti, djali i gjeneralit serb. Hajde tash postoni për Veriun, krejt VV-ja edhe tregoni sa po punoni për neve. Me pas punu për neve sa keni punu për serb, sot e kishëm kalu zhvillimin e Kroacisë”, shkroi ajo.