Vjosa ‘nuk ndalet’, prezanton aderimin më të ri

Tashmë bartësja e listës së LDK-së, Vjosa Osmani ka prezantuar sot Kreshnik Çollakun si pjesë të rrugëtimit të saj politik për zgjedhjet e 7 qershorit.

Përmes një postimi, Osmani e ka cilësuar Çollakun si një figurë me përvojë në diplomaci, politikë dhe angazhim akademik, duke theksuar kontributin e tij në mbështetje të Kosovës dhe orientimit euro-atlantik të shqiptarëve.

Sipas saj, Çollaku për më shumë se 20 vite ka qenë pedagog universitar, ndërsa në periudha të rëndësishme për Kosovën ka shërbyer edhe në Ambasadën e Shqipërisë në Washington, duke kontribuar në forcimin e mbështetjes amerikane për Kosovën.

Osmani ka rikujtuar gjithashtu se ai ka qenë deputet i Partisë Demokratike të Shqipërisë dhe pjesë aktive e diplomacisë parlamentare, ku ka mbrojtur çështjen e Kosovës në forume rajonale dhe ndërkombëtare.

Ajo ka vlerësuar edhe rolin e tij si një nga themeluesit e Lëvizjes Studentore të Dhjetorit 1990 në Shqipëri, si dhe angazhimin e tij si këshilltar për politikë të jashtme në Presidencë.

“Ne besojmë se Kuvendi i Kosovës ka nevojë për njerëz me përvojë, integritet dhe vizion”, ka shkruar Osmani, duke i uruar mirëseardhje Çollakut në këtë rrugëtim politik./GazetaInfokus

Këta janë gjashtë kandidatët e vetëm të PSD-së për zgjedhjet e 7 qershorit

Anëtarja e Partisë Socialdemokrate, Teutë Rrusta ka bërë të ditur edhe emrat e gjashtë personave të vetëm që do të garojnë në zgjedhjet e 7 qershorit nga ky subjekt politik.

Ajo në Rubikon të Klan Kosovës, ka thënë se PSD-ja do të garojë vetëm me këta gjashtë kandidatë për deputetë, pasi sipas saj, synim kryesor ka kalimin e pragut.

“Do të garojmë vetëm me gjashtë emra. Është kryetari i partisë, Dardan Molliqaj, pastaj janë: Florin Krasniqi, Natyra Kuçi, Nol Nushi, Frashër Krasniqi, dhe unë (Teutë Rrusta)”, ka deklaruar ajo.

Ministria publikon çmimet e derivateve, nafta më lirë se dje

Edhe një shtet tjetër përfshihet në luftën kundër Iranit

Emiratet e Bashkuara Arabe, të cilat deri tani në konfliktin me Iranin kryesisht janë paraqitur si një nga objektivat kryesore të Teheranit, tani, sipas raportimit të The Wall Street Journal, janë përfshirë drejtpërdrejt në luftë.

Gazeta prestigjioze i referohet burimeve të njohura me situatën, të cilat pretendojnë se Emiratet kanë kryer sulme ushtarake në territorin iranian dhe kështu, nga roli i objektivit, pas SHBA-së dhe Izraelit, kanë kaluar në rolin e pjesëmarrësit aktiv në konflikt.

Sipas këtyre pretendimeve, operacioni që Abu Dhabi nuk e ka pranuar publikisht përfshinte një sulm ndaj një rafinerie në ishullin iranian Lavan në Gjirin Persik.

Sulmi, shkruan WSJ, ndodhi në fillim të prillit, afërsisht në kohën kur presidenti i atëhershëm amerikan Donald Trump fliste për armëpushim pas pesë javësh fushate intensive ajrore.

Burimet e WSJ-së pretendojnë se nga sulmi shpërtheu një zjarr i madh dhe se një pjesë e konsiderueshme e kapaciteteve të rafinerisë mbeti jashtë funksionit.

Teherani atëherë njoftoi se rafineria ishte goditur në një “sulm armiqësor”, pas së cilës pasoi një seri sulmesh iraniane me raketa dhe dronë ndaj Emirateve të Bashkuara Arabe dhe Kuvajtit. Sipas të njëjtave pretendime, Emiratet deri tani janë ekspozuar ndaj më shumë se 2800 dronëve dhe projektilëve iranianë — më shumë se çdo vend tjetër, përfshirë edhe Izraelin.

 

 

Analisti i njohur politik i bashkohet AAK-së, kandidon për deputet

Opinionisti Avni Arifi në emisionin Rubikon me Adriatik Kelmendin në Klan Kosova, bëri të ditur se do t’i bashkohet listës së Aleancës për Ardhmërinë e Kosovës (AAK) për zgjedhjet e 7 qershorit.

“Ky është emisioni i fundit si opinionist, do t’i bashkohem Aleancës për Ardhmërinë e Kosovës në garën e 7 qershorit.” ka thënë Arifi.

Arifi poashtu tha se hera e fundit që ishte pjesë e garës për deputet ishte në vitin 2010, ndërsa tani kërkon votën e qytetarëve që të jetë deputet në zgjedhjet e parakohshme.

Agim Veliu godet lidershipin e LDK-së dhe tregon nëse do kandidojë

Agim Veliu ka bërë të ditur se nuk do të jetë pjesë e listës së LDK-së për zgjedhjet e 9 qershorit, shkruan DEMOS.

Veliu shtoi se “LDK është më e madhe se interesat meskine të dy njerëzve.”

Shkrimi i tij:

Të dashur anëtarë, aktivistë dhe simpatizantë të Lidhjes Demokratike të Kosovës,

E ndjej obligim moral, njerëzor dhe politik t’ju falënderoj secilin prej jush për besimin, sakrificën dhe qëndrueshmërinë që i keni dhënë LDK-së ndër vite.

Kësaj radhe nuk dua të flas për rrugëtimin tonë të përbashkët politik për më shumë se tri dekada e gjysmë. As për sfidat dhe sukseset e mëdha të bastionit të pathyeshëm të LDK-së dhe rugovizmit në Llap, deri para pesë vitesh.

Nuk dua të flas kronologjikisht as për goditjet ndaj meje dhe vetë degës në Podujevë në vitet e fundit nga lidershipi aktual i LDK-së, që erdhi në parti për ta administruar, jo për ta zhvilluar.

Nuk dua t’ua sjell në kujtesë as papërgjegjësinë e lidershipit që prodhoi përçarje të madhe dhe polarizim të skajshëm të anëtarësisë. E, nuk po përmend as humbjet e njëpasnjëshme zgjedhore dhe rënien drastike të elektoratit në Llap e kudo në Kosovë.

Dua të ndalem te momentumi aktual partiak, që po promovohet si “Bashkimi i madh”, e që çuditërisht po përfshinë të gjithë ata që u anatemuan dhe eliminuan nga lidershipi aktual: pra të mënjanuarit, të diferencuarit dhe të padëshiruarit u bënë të dëshiruar.

Nuk di në cilën kategori të “Bashkimit të madh” bëj pjesë unë, por e di që para zgjedhjeve të 28 dhjetorit 2025, publikisht pata shprehur vullnetin të jem pjesë e listës së kandidatëve për deputetë, me qëllim të mobilizimit dhe unifikimit të elektoratit. Por kryesia e Degës kishte refuzuar edhe ta nxjerrë në diskutim kandidaturën time, me arsyetimin se ishte “vendim i shefit të madh (Lumirit)” të mos jem pjesë e garës.

Ndërsa sot e njëjta kryesi, me bekimin e shefit, më paska propozuar të jem në listën e kandidatëve për deputetë. Madje pa më kontaktuar dhe pa më konsultuar fare.

Tash nuk di nëse paskam ndryshuar unë, apo ata?

Jo. As unë, as ata.

Kanë ndryshuar vetëm strategjitë për mbijetesën e tyre politike.

Ka ndryshuar edhe motoja, të cilën e solli në LDK e rikthyera nga aventuara e saj pesë vjeçare në kampin majtist. Ajo, bashkë me Lumirin, mashtrimin dhe përdorimin e madh e ambalazhuan në “Bashkim të madh të djathtistëve”.

Pikërisht për këto arsye, me respektin më të thellë për anëtarësinë e ndershme të LDK-së, deklaroj publikisht se refuzoj të jem pjesë e listës së kandidatëve për deputetë në zgjedhjet e 7 qershorit.

Unë nuk largohem nga LDK-ja, sepse është pjesë e jetës sime politike që nga themelimi i saj. Por, refuzoj të përdorem dhe të jem pjesë e një projekti që e largon partinë nga identiteti i saj institucional e shtetndërtues.

Jam i bindur se LDK do të çlirohet nga mentaliteti i OJQ-izimit politik dhe do të rikthehet në rolin e saj historik si forcë përgjegjëse shtetformuese.

LDK është më e madhe se interesat meskine të dy njerëzve.

Zoti e ruajt LDK-në!

Lladrovci reagon ndaj mospërfshirjes së Limajt në listë të PDK-së

Fatmir Limaj nuk do të jetë pjesë e listës së Partisë Demokratike të Kosovës për zgjedhjet e parakohshme të 7 qershorit.

Kryetari i PDK-së, Bedri Hamza, në konferencë për media pas mbledhjes së Kryesisë së PDK-së, të hënën ka dhënë disa arsye për këtë refuzim të kërkesës së Limajt për bashkëpunim.

Hamza ka thënë se e mirëpresin kontributin e Limajt dhe Nismës Socialdemokrate për Partinë Demokratike në zgjedhjet e 7 qershorit, por se kësaj here Limaj dhe asnjë nga anëtarët e Nismës, nuk do të jenë pjesë e listës së PDK-së për deputetë.

“E presim dhe e mirëpresim kontributin që do të japë Fatmir Limaj dhe Nisma Socialdemokrate. Kësaj radhe nuk do të jetë pjesë e listës së PDK-së”, ka thënë Hamza. “Sigurisht se z. Limaj në të ardhmen, në procese të rregullta të brendshme zgjedhore, është i mirëpritur të jetë pjesë e PDK-së. Sa i përket garimit në këtë listë, është qëndrim i përgjithshëm që fillimisht duhet të ndodhë një përkrahje për PDK-në, vullnet i mirë nga ana e Nismës Socialdemokrate, pastaj në zgjedhjet e ardhshme do t’i trajtojmë në mënyrë të duhur. Kësaj radhe Limaj s’do të jetë pjesë e listës së PDK-së”.

Sipas Hamzës, Limaj në letrën që ia ka dërguar PDK-së  për bashkëpunim nuk ka kërkuar që të jetë i përfshirë në listë.

Hamza ka thënë se një pjesë e madhe e kandidatëve që do të jenë në listë të PDK-së do të garojnë për herë të parë për deputetë.

Ndaj vendimit të kryesisë së PDK-së, ka reaguar kryetari i Drenasit, Ramiz Lladrovci. Vendimin e ka quajtur ripërsëritje të ndikimit, por pa dhënë emra.

“U ripërsërit modeli i ndikimit në Kryesinë e PDK-së. Kreatorët e kësaj fryme, nuk po i bëjnë shërbim Kosovës e as PDK-së. Për ta paraqitur Bedriun humbës dhe Fatmirin jomeritor në Listë, janë ata që nuk patën guxim të ballafaqohen me pozitën dhe qytetarin ndër vite. Anëtarësia e gjerë, simpatizantët dhe qytetarët, do të jenë në përkrahje të PDK-së, të heronjve tanë të luftës e paqes dhe të Bedri Hamzës!”, ka thënë Lladrovci në reagimin e tij në Facebook.

Hamza para mediave i është përgjigjur reagimit të kryetarit të Drenasit, Ramiz Lladrovci. Ai ka thënë se kryetari Lladrovci nuk është anëtar i Kryesisë, por vetëm i Këshillit.

“Kryetari Lladrovci është anëtar i Këshillit por nuk është anëtar i Kryesisë së Partisë Demokratike të Kosovës”, ka thënë Hamza.

Limaj i ka dërguar PDK-së kërkesë për bashkëpunim më 8 maj, një ditë pasi ka përfunduar afati i KQZ-së për paraqitje të subjekteve politike për pjesëmarrje në zgjedhje.

“Nisma Socialdemokrate dhe unë, si kryetar i saj, kemi shprehur vazhdimisht, si para këtyre zgjedhjeve ashtu edhe në vazhdimësi, gatishmërinë për bashkëpunim dhe bashkim politik në funksion të krijimit të një alternative të fuqishme dhe përfaqësuese për qytetarët e Republikës së Kosovës”, thuhet në letrën e Limajt ndër të tjera.

Nisma, kryetar i të cilës është Fatmir Limaj në zgjedhjet e 28 dhjetorit 2025 nuk ka arritur ta kalojë pragun zgjedhor, e në ato të shkurtit po të vitit 2025, në kolaicion me AAK-në, kanë fituar 8 ulëse – 5 AAK-ja dhe 3 Nisma.

Në fakt, Limaj ishte pjesë e PDK-së prej themelimit të kësaj partie, por më 2014 ai dhe disa funksionarë të tjerë të lartë janë larguar për të themeluar partinë Nisma.

Pas kësaj, jo rrallë herë udhëheqës dhe anëtarë të tjerë të dy partive kanë sulmuar njëri-tjetrin.

Hamza para mediave i është përgjigjur reagimit të kryetarit të Drenasit, Ramiz Lladrovci. Ai tha se kryetari Lladrovci nuk është anëtar i Kryesisë por vetëm i Këshillit.

“Kryetari Lladrovci është anëtar i Këshillit por nuk është anëtar i Kryesisë së Partisë Demokratike të Kosovës”, deklaroi Hamza pa e komentuar qëndrimin e Lladrovcit.

Musliu ankohet pse rruga mban emrin “Astrit dhe Arbënor Dehari”: Çfarë heroizmi kanë bo ata?

Ganimete Musliu, ish-deputete e PDK-së, ka folur në lidhje me një rrugë që mban emrin e dy aktivistëve të vdekur të VV-së, Astrit dhe Arbënor Dehari.

Musliu ka pyetur se pse kjo rrugë mban emrin e këtyre dy aktivistëve të VV-së.

“Çfarë heroizmi kanë bo ata” – ishte pyetja e Musliut.

LDK në Podujevë e propozi Agim Veliun për deputet, vjen reagimi i Abdixhikut

Kreu i LDK’së, Lumir Abdixhiku, e ka cilësuar si “hap të mbarë” nominimin e Agim Veliut për deputet nga Dega e LDK’së në Podujevë, shkruan Reporteri.net.

Ai ka thënë se nominimi nga dega është dëgjim i vullnetit të anëtarësisë.

“Falënderoj Degën e Podujevës për unitetin, pjekurinë dhe përgjegjësinë e treguar në këtë moment të madh bashkimi për Lidhjen Demokratike të Kosovës. Nominimi nga dega i ish-kryetarit të saj, Agim Veliut, është dëgjim i vullnetit të anëtarësisë dhe një hap i mbarë në ndërtimin e bashkimit të madh për të cilin jemi angazhuar të gjithë”, ka shkruar Abdixhiku.

Ai ka shtuar se LDK-ja gjithmonë ka ditur të bëhet më e fortë atëherë kur ka ditur të bëhet bashkë.

“Dhe ky është mesazhi më i mirë që mund t’u japim sot qytetarëve tanë; se mbi çdo dallim, mbi çdo pakënaqësi e mbi çdo periudhë të kaluar, qëndron shtëpia jonë e përbashkët politike, Lidhja Demokratike; dhe përgjegjësia jonë ndaj Republikës”, thuhet në postim.

Veliu u propozua  për deputet nga Kryetari i Degës, Ekrem Hyseni./Reporteri.net

 

Agim Veliu përfshihet në listën e LDK-së

Në mbledhjen e mbajtur sot nga Kryesia e Degës së Lidhja Demokratike e Kosovës në Podujevë, janë votuar kandidatët për deputetë për zgjedhjet e 7 qershorit.

Kështu ka bërë të ditur kryetari i Degës së LDK-së në Podujevë, Ekrem Hyseni, përmes një postimi në facebook, ku ka theksuar rëndësinë e unitetit dhe bashkimit brenda subjektit politik.

Sipas Hysenit, me qëllim të unifikimit të strukturave dhe elektoratit të LDK-së, ai ka propozuar që pjesë e listës së kandidatëve për deputetë nga Llapi të jetë edhe Agim Veliu.

Përveç Veliut, në garën për deputetë nga Dega e LDK-së në Podujevë do të jenë edhe Arjeta Salihu Abazi, Alisa Jetullahu, Zaim Thaçi si dhe vetë Ekrem Hyseni.

“Në mbledhjen e sotme të Kryesisë së Degës së LDK-së në Podujevë, janë votuar njëzëri kandidatët për deputetë për zgjedhjet e 7 qershorit. Me qëllim të unifikimit të të gjithëve, si kryetar i Degës së LDK-së në Podujevë, kam propozuar që ndër kandidatët për deputet nga Llapi, të jetë edhe Agim Veliu, e në këtë garë po ashtu janë edhe katër kandidatë tjerë nga Dega jonë: Arjeta Salihu Abazi, Alisa Jetullahu, Zaim Thaçi dhe unë Ekrem Hyseni. Është momenti i të gjithë atyre që duan e që besojnë të kontribuojnë në këtë rrugëtim! Le të bashkohemi të gjithë, sepse LDK-ja është e të gjithëve!”, ka shkruar Hyseni./IndeksOnline/