Burri dhe vjehrra rrahin nusen në Lipjan

Një rast i dhunës në familje është raportuar mëngjesin e djeshëm në Lipjan.

Sipas Policisë, një grua ka raportuar se ka pësuar dhunë nga burri me të cilin bashkëjeton dhe nëna e tij, shkruan Reporteri.net.

Dy të dyshuarit janë arrestuar dhe dërguar në mbajtje, ndërsa viktima është kthyer tek familja e saj.

“Lipjan 13.01.2026 – 08:11. Është raportuar se viktima femër kosovare ka pësuar dhunë nga i dyshuari me të cilin bashkëjeton dhe nëna e tij. Viktima ka pranuar tretman mjekësor dhe është kthyer tek familja e saj. Dy të dyshuarit janë arrestuar dhe me vendim të prokurorit janë dërguar në mbajtje”, thuhet në raport./Reporteri.net

Paralajmërohen reduktime të rrymës në Kosovë

“Zafa” thirrje prokurorisë për shtesat: Vjedhje masive e miliona eurove

Politikani Zafir Berisha i ka bërë thirrje prokurorisë që të hetojë lidhur me përfitimet nga shtesat për fëmijë dhe lehona nga bashkatdhetarë që s’jetojnë në Kosovë.

Berisha me anë të një shkrimi në ‘Facebook’ ka shpërndarë një udhëzues për shtesa, ku specifikohet se të drejtë aplikimi kanë fëmijët deri në moshën 16-vjeçare që kanë shtetësi dhe janë banorë rezidentë të Kosovës, shkruan Insajderi.

“Prokuroria e shtetit të Kosovës duhet të lëviz, pasi është në dijeni se në fund të vitit të kaluar, ka ndodhën një vjedhje masive e miliona eurove nga taksat tona, prej disa hajdutëve që nuk jetojnë në Kosovë, të cilët duhet të dalin para organeve të drejtësis”, ka deklaruar Berisha.

“Falsifikimi dhe mashtrimi janë vepra penale që sanksionohen me ligj, prandaj duhet të mirren masa, pasi bëhet fjalë për disa hajdutë recidivistë”.

KQZ publikon rezultatet e para të rinumërimit, VV-ja e dyta

Komisioni Qendor i Zgjedhjeve ka filluar të procesojë rezultatin nga rinumërimi i disa vendvotimeve.

Rezultatet janë nga rinumërimi i dy vendvotimeve në komunën e Deçanit dhe një në të Gjakovës.

Sipas platformës së KQZ’së, nga numërimi i deritashëm po prin AAK me 51.19%, pasuar nga VV’ja me 31.88%, LDK me 11.11% dhe PDK me 4.63%

Në 10 komuna do të rinumërohen 100% e vendvotimeve, ndërsa në 28 prej tyre vetëm 10%. Ky proces pritet të zgjasë rreth dy javë, sipas KQZ’së.

Abdixhiku deklarohet për çështjen e presidentit, konfirmon votën për “këta kandidat”

Kryetari i Lidhjes Demokratike të Kosovës, Lumir Abdixhiku, ka folur edhe për çështjen e presidentit, pas takimit që mbajti me “rrethin e ngushtë” të kësaj partie.

Abdixhiku u shpreh i bindur se për këtë pozitë do të ketë shumë kandidatë, teksa shtoi se për t’i marrë 15 votat e kësaj partie, do të nevojitet marrëveshje.

“Në qoftë se dikush dëshiron marrëveshje politike me LDK’në, me LDK’në duhet të bisedojë edhe për çështjen e Presidentit. Ne i kemi 15 vota, ato që janë, nëse dikush dëshiron t’i ketë, duhet të bisedojë me Lidhjen Demokratike të Kosovës. Kur ulet të flasë me LDK’në, do të flasë për një kandidat që i përfaqëson interest e popullit të Kosovës, jo vetëm interest e një partie”, tha Abdixhiku.

Ai përsëriti që në krye të vendit duhet të jetë një figurë unifikuese.

“Besoj që shumë individë do të shprehin gatishmëri për një pozitë aq fisnike, por se kush e përfaqëson unitetin edhe kush e merr 80 votëshin, kjo mbetet të shihet brenda diskutimeve të partive politike”, tha Abdixhiku./Reporteri.net

Lumir Abdixhiku ofron dorëheqjen në Kuvendin e LDK-së

Kryetari i LDK-së, Lumir Abdixhiku në konferencën që mbajti për media pas takimit me nënkryetarët e partisë për të diskutuar për rezultatin e zgjedhjeve të 28 dhjetorit, ka bërë të ditur se do të ofrojë dorëheqje.

“Trajtuam të gjitha çështjet politike dhe të ardhmen që na pret në vijim. Siç ju kam njoftuar edhe sonte, ju njoftoj se në konsultim kemi vendosur që të thërrasim kryesinë e LDK-së dhe pastaj Kuvendin e LDK-së, e kam obligim moral e politike që të marr përgjegjësinë dhe ta shtroj tutje organizimin politik të LDK-së, nëpërmjet ofrimit te Kuvendi i LDK-së dorëheqjen”, tha Abdixhiku.

KQZ merr vendim që të rinumërohen votat

Komisioni Qendror i Zgjedhjeve mori vendim për rinumërimin e 914 vendvotimeve nga 2,557, në të cilat është zhvilluar procesi i rregullt i votimit më 28 dhjetor 2025.

Ky vendim i KQZ-së erdhi pas paraqitjes së një raporti nga verifikimi i votave të kandidatëve për 2% të vendvotimeve nga zgjedhjet e parakohshme për Kuvendin e Kosovës, të cilat janë mbajtur më 28 dhjetor 2025.

Sipas këtij raporti, më 10 janar 2026, Sekretariati i KQZ-së ka bërë shikimin e videoincizimeve të kamerave në vendosura në tavolinat e numërimit në Qendrat Komunale të Numërimit dhe është evidentuar se ka raste të mospërputhjeve të votave për kandidatë. Pas këtyre evidentimeve, SKQZ ka bërë verifikimin e brendshëm të fletëvotimeve për kandidatë në 2% të vendvotimeve apo 52 vendvotime nga të gjitha komunat e Republikës së Kosovës. Deri në përfundim të ditës së hënë, 12 janar 2026, janë verifikuar 33 vendvotime, ku rezulton se votat e kandidatëve të numëruara në Qendrat Komunale të Numërimit nuk pasqyrojnë numrin e votave të kandidatëve të evidentuara në fletëvotime.

Andaj, duke u mbështetur në këto gjetje, KQZ mori vendim për rinumërimin e 914 vendvotimeve që i takojnë të gjitha komunave të Republikës së Kosovës. Në 10 komuna do të rinumërohen 100% të vendvotimeve (Dragash, Kaçanik, Lespoaviq, Prizren, Skënderaj, Shtime, Ferizaj, Vushtrri, Mamushë dhe Ranillug), ndërkaq në 28 komunat tjera, do të rinumërohen nga 10% e vendvotimeve (Deçan, Gjakovë, Gllogoc, Gjilan, Istog, Klinë, Fushë Kosovë, Kamenicë, Mitrovicë e Jugut, Lipjan, Novobërdë, Obiliq, Rahovec, Pejë, Podujevë, Prishtinë, Shtërpcë, Suharekë, Viti, Zubin Potok, Zveçan, Malishevë, Junik, Hani i Elezit, Graçanicë, Partesh, Kllokot dhe Mitrovicë e Veriut).

Kryesuesi i KQZ-së, Kreshnik Radoniqi bëri të ditur se nëse pas rinumërimit do të vërtetohen manipulimet eventuale me votat e kandidatëve, KQZ do të procedojë në organet kompetente anëtarët e ekipeve të numërimit.

Sipas KQZ-së, rinumërimi i këtyre vendvotimeve do të zhvillohet në Qendrën e Numërimit dhe Rezultateve dhe do të fillojë më 13 janar 2026, në orën 18:00.

“Këshilli për Operacione Zgjedhore ka kërkuar nga sekretariati të bëjë një verifikim të brendshëm të fletëvotimeve. Më pas me datën 12 sekretariati ka filluar të bëjë këtë verifikim, ku janë numëruar 33 vendvotime, janë verifikuar votat e kandidatëve në këto vendvotime dhe në bazë të të gjeturave ka rekomanduar tek Këshilli për Operacione Zgjedhore rinumërimin e 10 për qind të kutive të vendvotimeve në të gjithë Kosovën, kurse për 10 komuna ka rekomanduar numërimin e qind për qind të kutive në këto 10 komuna, Prizren, Ferizaj, Shtime, Skenderaj, Shtime, Vushtrri, Dragash, Mamushë, Kaçanik, Leposaviç dhe Raniullg, rinumërimi qind për qind të vendvotimeve kurse në komuna të tjera deri në 10 të vendvotimeve.  Në bazë të atij procesi të verifikimit të rezultateve ka dalë një shmangie që ka qenë shqetësuese për ne. Pra ka pasë deri 714 vota për kandidat që kanë ndryshuar gjatë verifikimit në çdo komunë të vetëm dy subjekteve, por ka pasë në disa komuna shmangie, në disa prej tyre janë normale se janë brenda kuadrit të gabimeve njerëzore, pro ka qenë shqetësuese që në disa komuna ka qenë një trend jo normal. Andaj për të siguruar transparencë dhe saktësi të procesit të numërimit që kanë ndodhur në QKN Këshilli për Operacione Zgjedhore i rekomandon KQZ-së që të miratojnë rekomandimin që në 10 komuna të bëhet rinumërimi i kutive në të gjitha vendvotimet, kurse në komuna tjera të bëhet deri në 10 për qind të kutive të numërimit”, tha Krasniqi.

“Jo drogës në Parlament” – Propozohet “narko-test” për Deputetët

Burim Ramadani i AAK-së, kërkon që deputetëve të rinj të Kuvendit të Kosovës t’u bëhet narko-testi.

Ai thotë se kjo duhet të ndodhë posa të certifikohen rezultatet.

“Shumë e nevojshme është të bëhet Narko-Testi, menjëherë pasi të certifikohen rezultatet.Sigurt që disa duhet të drejtohen në QKUK për ndihmë në rehabilitim, ndërsa të tjerët vazhdojnë në ulëset në Parlament. #JoDROGES #Siguri”, ka konsideruar Ramadani.

Incident i rëndë në një kopsht në Pejë, edukatorja sulmohet me mjet të fortë nga nxënësi

Një rast i rëndë ka ndodhur sot në Pejë, ku një nxënës ka goditur edukatoren e tij me një shufër metalike, duke i shkaktuar lëndime trupore.

Sipas Policisë së Kosovës, rreth orës 10:40, autoritetet janë njoftuar për incidentin që ka ndodhur në një institucion parashkollor në Pejë. Si pasojë e goditjes me mjet të fortë, edukatorja ka pësuar lëndime dhe është dërguar për trajtim mjekësor në Emergjencën e Spitalit të Pejës.

Në vendin e ngjarjes kanë dalë njësitë e Policisë së Kosovës, si dhe prokurori i shtetit, për të hetuar rrethanat e incidentit.

“Sot në orën 10:40, Policia është njoftuar se në një kopsht, një nxënës me një shufër metalike e ka goditur edukatoren me mjet të fortë, duke i shkaktuar lëndime. E njëjta është dërguar në emergjencën në Pejë. Në vendin e ngjarjes kanë dalë Policia dhe Prokurori”, tha për Indeksonline Fadil Gashi, zëdhënës i Policisë së Kosovës për rajonin e Pejës.

Ndërkohë, Indeksonline mëson se rasti ka ndodhur në kopshtin “Pëllumbat e Paqes”, institucion parashkollor në Pejë, ndërsa sipas burimeve, mosha e fëmijës është rreth 7 vjeç./

Ky është i dyshuari për tentim-vrasjen e dy shtetasve serbë dhe një avokati kosovar në Deçan

Një incident i rëndë me armë zjarri ka ndodhur pas mesnatës në Deçan, ku tre persona kanë mbetur të plagosur, ndërsa i dyshuari është arrestuar në vendin e ngjarjes.

Sipas informatave, rreth orës 00:15 të datës 13.01.2026, është raportuar për të shtëna me armë zjarri në një lokal.

Menjëherë pas pranimit të informacionit, njësitet policore kanë dalë në vendin e ngjarjes, ku kanë hasur një zyrtar policor jashtë detyre, i cili kishte arritur ta arrestojë të dyshuarin.

Në brendi të kafiterisë, policia ka gjetur të shtrirë tre viktimat, të cilat dyshohet se ishin plagosur nga arma e zjarrit. Të plagosurit janë identifikuar si Daut Cacaj, Dejan Simiq dhe Radovan Millosheviq.

Në vendngjarje kanë dalë edhe ekipet e emergjencës nga QKMF-Deçan, të cilët u kanë dhënë ndihmën e parë viktimave, të cilat më pas janë dërguar për trajtim mjekësor në Spitalin e Pejës.

Rastit i janë përgjigjur gjithashtu hetuesit e Stacionit Policor në Deçan, njësia e hetimeve rajonale të Pejës, si dhe Prokurori kujdestar nga Prokuroria Themelore në Pejë.

Gjatë ekzaminimit të vendit të ngjarjes, policia ka sekuestruar armën e dyshuar si mjet i përdorur në rast, si dhe tri gëzhoja të së njëjtës armë.

I dyshuari, Ismet Zukaj, është ndaluar për 48 orë me urdhër të Prokurorit kujdestar, ndërsa rasti është iniciuar si “Vrasje e mbetur në tentativë” dhe hetimet po vazhdojnë.

Gazeta Sinjali do t’ju mbajë të informuar me detaje të reja rreth këtij rasti.

Shënim: Personat e apostrofuar në këtë artikull prezumohen të pafajshëm derisa fajësia e tyre të mos provohet me vendim të formës së prerë nga gjykata.