Maliqi: Nuk ka prova që Kurti është “njeri i Serbisë”, por qëndrimet e tij ngjallin dyshime

Analisti Shkëlzen Maliqi ka komentuar zhvillimet politike në vend, duke u ndalur te roli dhe qëndrimet e kryeministrit Albin Kurti në raport me dialogun dhe situatën politike.

Ai thekson se nuk mund të thuhet se Kurti është “njeri i Serbisë”, pasi për një pretendim të tillë nevojiten prova të forta. Megjithatë, sipas tij, ekzistojnë elemente që ngrenë dyshime, duke përmendur përputhjen e qëndrimeve të Kurtit ndër vite me liderë serbë si Vojislav Koštunica dhe Aleksandar Vučić, veçanërisht në raport me kundërshtimin e Planit të Ahtisaarit dhe qasjen ndaj dialogut.

“S’mund të them se Kurti është njeri i Serbisë, sepse për këtë duhet të kihen provat e forta. Por ka diçka pse qëndrimet e tija ndër vite janë gati gjithnjë të përputhshme me ato të liderëve serbë, me Vojislav Koštunica – kundër planit të Ahtisarit, me Aleksandar Vučić – rreth opstrukcionit të dialogut dhe blerjes së kohës, ku duket se njëri tjetrit po i ndihmojnë…”, shprehet ai.

Maliqi vlerëson se këto qëndrime karakterizohen nga jofleksibiliteti, kundërshtimi i kompromiseve dhe prirja për të prodhuar kriza të vazhdueshme politike, duke i parë ato si mekanizma për ruajtjen e pushtetit. Sipas tij, kjo krijon perceptimin e një lloj koordinimi të heshtur që ndikon negativisht në zhvillimin demokratik dhe progresin e vendit.

Shkrimi i plotë:

S’mund të them se Kurti është njeri i Serbisë, sepse për këtë duhet të kihen provat e forta. Por ka diçka pse qëndrimet e tija ndër vite janë gati gjithnjë të përputhshme me ato të liderëve serbë, me Koshtunicën – kundër planit të Ahtisarit, me Vuçiqin – rreth opstrukcionit të dialogut dhe blerjes së kohës, ku duket se njëri tjetrit po i ndihmojnë… Çështja është se, dhe kjo lehtë dëshmohet, se ata janë joflaksibil dhe kundër kompromiseve, shkelës të rregullave dhe kushtetutave për shkak të ambicjeve autokratike në sistemet respektive të shteteve të tyre dhe karburantin për mbajtjen e pushtetit e kanë prodhimin e vazhdueshëm të krizave, prandaj duken sikur kanë marrëveshje mes tyre. Kuptohet, kjo nuk i amniston nga përgjegjësia për prodhimet populliste të krizave dhe kontributin në mbajtjen e drejtpeshimit që u jep shtytje proceseve antidemokratike dhe vendnumërimit ose, edhe më keq, regresit në zhvillimin e vendit.

Çelësi për largimin e Kurtit nga pushteti është trashja e provave se qeveria e tij dhe ai vetë janë pjesë e aferave koruptive, lidhjeve të çuditshme në promovimin dhe delegimin e pushtetit dhe kontrollin e institucioneve shtetërore dhe të sigurisë personave të paautorizuara, si Dejona Mihali… Po kështu duhet të kërkohet hetimi urgjent i pohimit të Florim Krasniqit, ish përkrahës i VV-së që kishte premtuar investime prej 50 milion dolarësh, dhe që së fundi ka pranuar publikisht se ai ka investuar për blerjen e pajisjeve kompjuterike për njësitin e laboratorit me argatët qenefa të LVV që prej vitesh helmojnë rrjetet sociale me fake news, shpfje dhe gjuhë të urrejtjes kundër të gjithë atyre që e kanë kritikuar VV-në ose që janë konsideruar rival të rezikshëm të sektit VV! Këto janë krime për të cilat mund të gjenden provat dhe që janë të dënueshme dhe prokuroria duhet, edhe pa denoncime, me i hetua dhe ndjek sepse ekziston prononcimi dhe kërkimfalja publike e “investitorit” të veprës penale.

Konfirmohet takimi Abdixhiku-Osmani, zbulohen detaje nga takimi

Nënkryetari i Lidhjes Demokratike të Kosovës, Lutfi Haziri, ka konfirmuar se kryetari i këtij subjekti, Lumir Abdixhiku, është duke mbajtur një takim me ish-presidenten Vjosa Osmani. Ai ka konfirmuar në “Konfront” të KTV-së të enjten se Abdixhiku e Osmani veçse janë dakorduar për bashkim në zgjedhjet e ardhshme.

“Edhe sonte në kuadër të arritjes së një qëllimi të përbashkët, për modalitetin dhe formën dhe për mënyrën se si do të arrihet një pajtim i ndërtimit të së djathtës dhe në listën e LDK-së, për këtë është çështje që vetë ata do ta bëjnë të ditur… Mund të konstatoj se pajtueshmëria për një garë ekziston tashmë, për modalitetin dhe formën do të bëhet me dije pasi të arrihet pajtueshmëri e plotë”, ka thënë Haziri.

Ai ka bërë të ditur se nuk është takimi i parë i Abdixhikut me Osmanin për këtë çështje.

Sipas tij, po bëhet fjalë për kthim në një garë të përbashkët, “në një front të përbashkët”. Ai ka refuzuar të konfirmojë nëse bëhet fjalë për kthim në parti pasi këto janë “çështje që po diskutohen”./koha.net

U nda nga jeta Astrit Dushi

U nda nga jeta në moshën 55-vjeçare Astrit Dushi, drejtor i “Paper Radio”, konfirmoi familja e tij.

Dushi me profesion ishte gazetar dhe themelues i 18 radiove. Ka qenë pjesë e këtij sektorit qysh prej fundit të viteve ’80-të. Kishte qenë viti 1989 kur ai për herë të parë do të lidhej me radion. Prej atëherë, radios nuk iu nda më kurrë duke themeluar edhe kanale unike si ai për muzikë klasike.

Me profesion gazetar kishte thënë se pasion e kishte radion, televizionin dhe sidomos muzikën. Dushi ishte cilësuar si një nga DJ-të e parë në Kosovë.

Varrimi i tij bëhet më 1 maj 2026 në orën 12:00 në varrezat e Arbërisë në Prishtinë, ndërsa e pamja do të mbahet tri ditë deri më 4.05.2026 nga ora 10:00 deri 17:00 në Hotel Grand.

Osmani i bashkohet LDK-së, nis takimi me Abdixhikun

Ish-presidentja Vjosa Osmani sapo është takuar me kryetarin e Lidhjes Demokratike të Kosovës, Lumir Abdixhiku.

Takimi është duke u zhvilluar në restorantin “Casa Rita” në lagjen Taukbashqe të Prishtinës.

Dy liderët politikë pritet të merren vesh për rrugëtimin e përbashkët në zgjedhjet e ardhshme të jashtëzakonshme parlamentare, të cilët do të mbahen më 7 qershor.

Burime të Paparacit kanë thënë se ky është vetëm fillimi i asaj që është proklamuar si “bashkimi i madh i LDK-së”.

Ka disa javë prej se kryetari i Lidhjes Demokratike të Kosovës ka nisur një iniciativë politike për bashkimin e LDK-së, të cilin shpesheherë e ka thirrur si “bashkimi i të djathtës politike”.

Në thelb, nisma e Lumir Abdixhikut synon ribashkimin nën ombrellën e LDK-së të njerëzve të larguar nga partia gjatë viteve të fundit, me një pjesë të madhe që kishte kaluar në Lëvizjen Vetëvendosje.

Rreth dy javë më parë, në mesin e procesit politik të zgjedhjes së presidentit, Abdixhiku tha se fokusi kryesor i tij ishte përqendruar pikërisht te nisma rreth “bashkimit të së djathtës” nën një strehë politike.

Ish-presidentja Osmani është emri që peshon më së rëndi nga të larguarit nga LDK-ja.

Ajo pritet të rikthehet në Lidhjen Demokratike të Kosovës gati shtatë vjet pasi e braktisi partinë për shkak të mosmarrëveshjeve me lidershipin e asokohshëm.

Osmani mbetet gruaja më e votuar në histori të Kosovës në zgjedhje parlamentare, pasi në zgjedhjet e shkurtit të vitit 2021 – si bartëse e listës së koalicionit LVV-Guxo – siguroi 300 mijë vota.

“Kurti si kryeministër 6 vjet nuk i realizoi premtimet, vjen para dëshmorëve”, flet mërgimtari që nuk ia dha dorën Kurtit

Kryeministri në detyrë i Kosovës, Albin Kurti, ka bërë homazhe te varrezat e dëshmorëve në disa fshatra të Drenicës.

Gjatë homazheve në Gllobar të Drenasit, nga përshëndetja me qytetar, njëri nga ta nuk pranoi t’ia zgjasë dorën Kurtit.

Ky mërgimtar, pas kësaj situate foli për Frontal në T7.

“Nuk kam ardhë për kryeministrin, kam ardhë për dhëndrin dhe vëllain e tij që kanë ra heronjë në Kosovë…Në atë moment erdhi Albin Kurti, njeriu i ka edhe emocionet e veta…Kur te mendon që erdhi një kryeministër që është që 6 vjet në premtime të shkon mendja a e meriton ai përshëndetjen tem…”, tha mërgimtari në emisionin Frontal, transmeton Express.

“Nuk e meritoi, 6 vjet kryeministër…. premtimet nuk janë bërë”, shtoi mërgimtari për arsyen e tij që s’i foli Kurtit.

Video:

Fejohet motra e Gjestit, kush është personi që i ka marrë zemrën

Fejohet Blerina, motra e Gjestit, teksa artisti është më afër se kurrë rikthimit të shumëpritur në muzikë!

​Prej kohësh Blerina zgjodhi të tërhiqej plotësisht nga zhurma e rrjeteve sociale. Ajo kishte nevojë për qetësi, larg syrit të publikut. I vetmi vend ku ajo mban kontakt me ndjekësit është Snapchat-i.

​Pikërisht aty, ajo po ndan momente të ngrohta me personin e zemrës, që e ka ndihmuar të rigjejë buzëqeshjen. Por si u zbulua lajmi? Fejesa u konfirmua falë vetë fansave të Gjestit! Ata i kishin dërguar një buqetë me lule dhe një letër me urime për fejesën, të cilat Blerina i publikoi.

Ndonëse tashmë nuk e fsheh unazën, ajo ka zgjedhur me të drejtë ta mbajë partnerin më privat meqenëse nuk dihet më shumë për identitetin e tij apo historinë e tyre të njohjes dhe dashurisë.

​Ndërsa e motra rigjen veten, vetë Gjesti ka gjetur forcën për një projekt të jashtëzakonshëm. Një imazh enigmatik i një deleje rozë nga labeli Three60”, ku etiketohet ai dhe DJ Gimbo, ka paralajmëruar diçka të madhe.

​Nga Prive By Liberta Spahiu përmes rubrikës “E vërtetë, e pavërtetë” u konfirmua se artisti po punon intensivisht për një EP me plot 5 këngë. Ky projekt pritet të jetë rikthimi i tij më i fuqishëm!

​A jeni gati për këtë epokë të re të Gjestit? /Prive By Liberta Spahiu

Zjarrfikësi për Albin Kurtin: Mashtrues të doli fytyra, asgjë s’ke bërë për ne!

Arianit Hamzaj, me profesion zjarrfikës ka reaguar ndaj pamjeve ku një qytetar i cili po merrte pjesë në homazhet për 27-vjetorin e masakrës në fshatrat përreth Drenicës, nuk ia zgjati dorën kryeministrit në dorëheqje, Albin Kurtit.

Përmes një postimi në Facebook, zjarrfikësi ka shpërndarë fotografinë e këtij momenti, përmes së cilës Kurtin, e ka quajtur “mashtrues”.

Sipas tij, zjarrfikësit janë lënë në mëshirën e Zotit, pa uniforma e mjete, dhe për këtë, fajtore është qeveria.

“Mashtruesit i doli fytyra. Unë si zjarrfikës i Kosovës, jam ndier tepër i bullizuar nga ana e juaj e në veçanti në këto ditë të fundit dhe gjatë gjithë mandatit tuaj, mashtrues. Na ke përqesh në mënyrë absurde me thënien “president nga shoqata e zjarrfikësve” andaj me këtë foto të përshëndes. Na ke lënë në mëshirën e Zotit, as uniforma e as mjete, asgjë nuk ke bërë për ne”, ka shkruar zjarrfikësi.

“Ish-prokurori Smith kërkoi burgim të përjetshëm për krerët e UÇK-së

Avokati i Popullit, Naim Qelaj, ka mbajtur sot një konferencë për media ku ka prezantuar një Raport të organizatës britanike “Bar of Human Rights Committee”, sa i përket procesit gjyqësor që po ndodh në Gjykatë Speciale kundër krerëve të UÇK’së.

Qelaj në mes të shumë shqetësimeve që janë evidentuar nga britanikët, ka përmendur edhe një takim të ish-kryeprokurorit Jak Smith me një kor diplomatik, e ku ish-kryeprokurori amerikan ka kërkuar burg të përjetshëm për Hashim Thaçin, Rexhep Selimin, Jakup Krasniqin e Kadri Veselin.

Avokati i Popullit ka përmendur edhe deklarimet e bëra nga kryetarja e Gjykatës Speciale, Ekaterina Trendafilova, se lirimi i mundshëm i krerëve të UÇK’së përbën rrezik.

“Konstatimi nga kryetarja e Gjykatës se nëse lirohen këta persona paraqesin rrezik dhe duhet të mbahen në paraburgim ngre shqetësime serioze jo vetëm për prezumimin e pafajësisë por edhe për integritetin e procesit dhe lirimin e parakohshëm”, ka thënë Qelaj.

Qelaj ka thënë këto deklarime përbejnë shqetësime serioze për prezumimin e pafajësisë, integritetin e procesit dhe për lirimin e parakohshëm. Takimi i përmendur, sipas Avokatit të Popullit ishte mbajtur pa e njoftuar fare mbrojtjen.

PDK-ja nuk vendos ‘vija të kuqe’ për Vetëvendosjen

Ish-deputeti i Partisë Demokratike të Kosovës, Rrahman Rama, ka deklaruar se partia që përfaqëson nuk ka vija të kuqe për askënd derisa ka folur për zgjedhjet e jashtëzakonshme që do të mbahen më 7 qershor.

Ai ka shtuar se ndonëse PDK-ja synon të garojë e vetme, mbetet e hapur për bashkëpunime të mundshme me partitë e tjera.

“PDK-ja ka qenë e gatshme në çfarëdo date e çfarëdo rrethanash për zgjedhjet. PDK-ja hyn si çdoherë në zgjedhje, tani janë këto parapërgatitjet, realisht në këto dy vjetët e fundit na ka rënë shumë shpesh të mbajmë zgjedhje por sido që të jetë ky është realiteti. PDK-ja gjithmonë ka qenë dhe do të jetë e hapur, po mundohemi të kemi figura të reja brenda listës sonë, PDK-ja garon e vetme por nëse ka gatishmëri nga partitë e tjera, ne do të jemi të hapur. Gjithmonë kemi thënë se nuk kemi vija të kuqe për askënd”, ka thënë ai.

Rama ka konsideruar që gjatë të gjithë procesit të dështuar për zgjedhjen e presidentit ka pasur lojëra nga partia në pushtet. Sipas tij, gjatë gjithë procesit ka munguar seriozitet dhe konkretizimi i diskutimeve.

“Pas takimit të parë që Hamza ka pasur me Kurtin, e kam besuar që do të vijmë në këtë situatë ku jemi. Nuk kemi parë gatishmëri, mënyra e komunikimit përmes mesazheve për në parti serioze nuk është realisht, ka përdorur edhe emra të familjes Jashari, por po kërkon një marrëveshje në politikë kërkohet kompromis. Loja ka qenë që kush kujt po ja lë kilen që themi ne popullorçe. Nuk kemi pasur një marrëveshje serioze, krejt këto kanë qenë lojëra gjatë këtij procesi. Hajde ulemi diskutojmë, por siç them unë. Duhet të jemi shumë më seriozë, më konkretë”, është shprehur ai.

Ish-deputeti i PDK-së gjithashtu theksoi se roli i opozitës është të sfidojë pushtetin dhe jo ta mbështesë atë, duke shtuar se Kosova do të duhej ta kishte zgjedhur presidentin pa shkuar në zgjedhje, por tani vendi tashmë ndodhet në një fazë të re zgjedhore.

“Roli ynë është për ta sfiduar pozitën. Nuk ka asnjë parti opozitare në botë që e rehabiliton pushtetin, por e sfidon. Kosova për mendim timin është dashur ta ketë presidentin, nuk është dashur të shkojë në zgjedhje. Tani jemi në fazë zgjedhore, ka përfunduar ajo periudhë”, ka deklaruar Rama.

Derisa ka folur për gjykimin e ish-krerëve të UÇK-së në Hagë, Rama ka konsideruar se qeveria aktuale nuk ka qenë aktive sa duhet në lidhje me këtë proces.

“Nëse ata do të dënohen, do të dënohet Kosova. Kemi përgjegjësi për të ngritur zërin për atë proces që të jetë transparent. Kam pritur që Qeveria aktuale do të bëjë shumë më shumë për ata njerëz që janë atje, por fatkeqësisht nuk e kemi parë atë gatishmëri dhe nuk kanë qenë aktivë realisht sa duhet në raport me këtë proces. Nganjëherë edhe inatet politike duhet t’i lëmë anash”, ka thënë ai.

A do të jetë Limaj pjesë e listës së PDK-së? – deklarohet Bedri Hamza

Kryetari i Partisë Demokratike të Kosovës, Bedri Hamza, ka bërë të ditur se lista zgjedhore e PDK-së për zgjedhjet e jashtëzakonshme të 7 qershorit do të përfshijë emra dhe figura të reja.

Hamza foli para mediave pasi u pyet nëse pjesë e listës do të jetë edhe Fatmir Limaj me bashkëpunëtorët e tij nga Nisma Socialdemokrate.

“PDK-ja do të garojë në zgjedhje si PDK dhe me listën e saj. Brenda listës sigurisht që do të ketë risi, emra dhe figura të tjera”, deklaroi ai.

Pas takimit me ushtruesen e detyrës së presidentes, Albulena Haxhiu, ku u diskutua për datën e zgjedhjeve, Hamza tha se PDK-ja është e gatshme për procesin zgjedhor, pavarësisht nëse ai mbahet më 31 maj apo më 7 qershor.

“Sipas nesh, çdo datë brenda afateve kushtetuese është e pranueshme, qoftë 31 maji apo 7 qershori. Ne jemi të përgatitur për zgjedhje. Shumica e partive politike në takim kanë qenë të përcaktuara për datën 7 qershor, por duhet marrë parasysh edhe puna dhe përgatitjet e KQZ-së. Prandaj jemi fleksibilë për cilëndo nga këto data”, u shpreh Hamza.