Vazhdon përplasja brenda LDK-së, nga krahu i Përparim Ramës kërkohet dorëheqja e Lumir Abdixhikut: Zgjedhje e lidership i ri

Rezultati i zgjedhjeve të 7 qershorit, po vazhdon të sjellë pakënaqësi e përplasje përbrenda LDK-së. Së fundmi, nga krahu i Përparim Ramës kanë kërkuar dorëheqjen e kreut të partisë, Lumir Abdixhiku.

Është Bajram Gecaj ai i cili ka shkruar se LDK-ja ka nevojë për “dorëheqje përnime” dhe lidership të ri.

Gecaj  në postimin e fundit, ka thënë se Abdixhiku duhet të hapë rrugë për zgjedhjen e një lideri të ri të partisë.

“Unë i përkas atij eshaloni njerëzish që kanë besuar fuqishëm në lidershipin e Lumir Abdixhikut dhe që e kemi përkrahur me bindje të plotë, edhe atëherë kur shumë qendrestarë na thoshin se po gabonim. Sot ka ardhur momenti ta falënderojmë për mundin, përkushtimin dhe kontributin e tij, dhe në mënyrën më qytetare e më dinjitoze t’i kërkojmë të hapë rrugë për provën tonë të radhës, zgjedhjen e një lideri të ri”, ka shkruar Gecaj ndër të tjera.

Postimi i plotë:

DORËHEQJE PËRNIME …
… dhe fillim i procesit për zgjedhjen e lidershipit të ri. Në fakt, këto zgjedhje dëshmuan se ky proces është dashur të nisë që në Kuvendin e 31 janarit. Megjithatë, për procese të mira dhe të nevojshme asnjëherë nuk është vonë.
Unë i përkas atij eshaloni njerëzish që kanë besuar fuqishëm në lidershipin e Lumir Abdixhikut dhe që e kemi përkrahur me bindje të plotë, edhe atëherë kur shumë qendrestarë na thoshin se po gabonim. Sot ka ardhur momenti ta falënderojmë për mundin, përkushtimin dhe kontributin e tij, dhe në mënyrën më qytetare e më dinjitoze t’i kërkojmë të hapë rrugë për provën tonë të radhës, zgjedhjen e një lideri të ri.
Edhe unë personalisht e kam provuar dy herë garën parlamentare. Herën e parë isha shumë afër, ndërsa herën e dytë pak më larg. Megjithatë, reflektova dhe vendosa të mos hyj më në garë, ndonëse dega ime më kishte ofruar përsëri kandidimin dhe dëshira ime për t’u zgjedhur deputet ishte e madhe. Doja të përballesha fuqishëm me gjithë atë orkestër servilësh në Kuvendin e Kosovës. Por populli thotë se “nuk ka gjë më të mençur sesa t’ia dish takatin vetes.”

AAK-ja asnjëherë nuk ka kaluar në vendin e parë apo të dytë dhe si e tillë është pajtuar me pozitën e tretë apo të katërt. Por ne nuk mund të pajtohemi me këtë realitet, sepse ne jemi Lidhja Demokratike e Kosovës. Jemi partia e parë demokratike në Evropën Lindore dhe këtë duhet ta dëshmojmë vazhdimisht.

Koha dhe rrethanat kërkojnë nga ne të ndërtojmë një proces dinjitoz: ta përcjellim me respekt lidershipin e kaluar dhe ta zgjedhim me vizion, energji dhe besim lidershipin e ri. Vetëm kështu mund ta rikthejmë LDK-në aty ku e ka vendin, në ballë të besimit qytetar dhe të udhëheqjes së shtetit.