Ky është burri nga familja Gashi që dyshohet për rastin

Një shtetas i Kosovës është arrestuar në Ulqin, pasi që dyshohet se mbrëmë ka vrarë bashkëshorten e tij jashtëmartesore.

Siç raportojnë mediat malazeze, bëhet fjalë për 46 vjeçarin Bashkim Gashi.

I dyshuari pas aktit i ka vënë zjarrin edhe shtëpisë ku jetonin.

Sipas raportimeve në mediat malazeze, ai ka pësuar lëndime nga zjarri dhe është dërguar fillimisht në Spitalin e Përgjithshëm në Bar për trajtim mjekësor, e më pas në Qendrën Klinike të Malit të Zi në Podgoricë, njofton policia.

Policia ka bërë të ditur se për një kohë shumë të shkurtër ka identifikuar dhe vënë nën kontroll personin e dyshuar për kryerjen e veprës penale “vrasje e rëndë”, në dëm të gruas me të cilën kishte lidhje, si dhe për zjarrvënie në vendngjarje, në shtëpinë ku jetonin së bashku, në lagjen Kodre të Ulqinit, transmeton Klankosova.tv.

“Rreth orës 00:30, në Departamentin e Sigurisë në Ulqin është raportuar se kishte shpërthyer zjarr në një objekt banimi në lagjen Kodre. Policia ka dalë menjëherë në vendin e ngjarjes, ku është gjetur trupi i pajetë i një personi të panjohur, i cili më vonë është identifikuar si D.N. (36), shtetase e Shqipërisë, thuhet në njoftim.

Thuhet se policia ka gjetur dhe ka vënë nën kontroll një person tjetër me lëndime të shkaktuara nga zjarri, i cili më vonë është identifikuar si Gashi.

Për rastin është njoftuar prokurori i shtetit në Prokurorinë e Lartë në Podgoricë. Policia, në koordinim me prokurorin kompetent, ka ndërmarrë të gjitha masat për zbardhjen e ngjarjes, ka mbledhur informacione nga disa persona dhe ka sekuestruar pamje nga kamerat e sigurisë, si dhe prova materiale nga vendi i ngjarjes që do të ekspertizohen.

Masat e deritanishme policore dhe prokuroriale sugjerojnë dyshimin se B.G. ka kryer veprën penale “vrasje e rëndë”, ka vënë zjarr në vendin e ngjarjes dhe është larguar nga vendi i ngjarjes, thuhet në njoftimin e policisë.

Hetimi në vendngjarje është kryer nga prokurori kompetent i Prokurorisë së Lartë në Podgoricë, me pjesëmarrjen e policisë dhe në prani të ekspertit përkatës. Prokurori i shtetit e ka kualifikuar veprën si “vrasje e rëndë”.

Shënim: Personi/personat e përmendur në këtë artikull, prezumohen të pafajshëm deri në një vendim të formës së prerë nga gjykata.

Ndërron jetë gjatë namazit të Bajramit Haxhi Shefki Latifi në xhaminë e Kmetocit

Një person raportohet të ketë ndërruar jetë sot gjatë përgatitjeve për faljen e Kurban Bajramit në ambientet e xhamisë së fshatit Kmetoc.

Lajmi për vdekjen e tij e kanë bërë të ditur familjarët e të ndjerit.

Njoftimi i plotë:

‎إنا لله وإنا إليه راجعون

“Të Allahut jemi dhe tek Ai do të kthehemi.”

Haxhi Shefki Latifi sot ndërroi jetë gjatë namazit të Bajramit, në ambientet e xhamisë së fshatit Kmetoc.

Do të mbahet gjatë mend si një person, zemra e të cilit ishte e lidhur me xhaminë. Dhe pikërisht këtë gjë ia mundësoi Allahu xh.sh., që vdekja e tij të jetë në xhami e jo diku tjetër.

Transmetohet nga Ebu Umame el-Bahiliu se i Dërguari i Allahut ﷺ ka thënë:

“Kur Allahu ia do të mirën një robi, e pastron atë para vdekjes.”

I thanë: “E çka konsiderohet pastrim për robin?”

Tha ﷺ:

“Një vepër e mirë, me të cilën Allahu e inspiron atë para se t’ia marrë shpirtin (para se të vdesë).”

{E shënon Taberaniu, ndërsa Shejh Albani e ka klasifikuar hadithin si sahih (të saktë).}

Vdes veprimtari i çështjes kombëtare, Hafiz Gagica

Ka vdekur veprimtari i çështjes kombëtare, Hafiz Gagica.

Lajmin për vdekjen e tij e kanë bërë të ditur miqtë e familjarët e të ndjerit.

Detajet e ceremonisë mortore ende nuk janë bërë të ditur, teksa Gagica tash e disa kohë po luftonte me një sëmundje të rëndë.

Gagica, dha kontribut të madh gjatë viteve të ’90-ta në organizimin politik të diasporës shqiptare si dhe në mbështetjen e institucioneve të pavarura të Kosovës.

Ai u angazhua në mbrojtjen dhe çlirimin e Kosovës në ngritjen dhe fortësimin e sistemit paralel gjatë represionit të ushtruar nga Serbia, me çrast ishte bartës kryesor i organizimit të mërgatës në Gjermani e në Europë, duke marrë rol kyç në lidhjet mes Kosovës dhe shteteve të Europës, përmes një zyre që ai kishte në Shtuttgart.

Gagica pati rol vendimtar në organizimin dhe financimin në sistemin paralel të Kosovës në arsim, shëndetësi e furnizimit ushqimor duke qenë edhe nismëtar i demonstrateve të shqiptarëve në Gjermani.

Hafiz Gagica ishte kryetar i LDK-së për diasporë dhe një nga bashkëpunëtorët e afërt të ish-presidentit, Ibrahim Rugova.

Arrestohen 3 djemtë e familjes Halili, dyshohen për vrasjen e 20-vjeçarit

Tre persona janë arrestuar në Suedi, pas vrasjes së 20-vjeçarit Elion Veseli, i cili vdiq nga një përleshje mes disa shqiptarëve të tjerë në qendër të Kristianstad, gjatë këtij muaji.

Të arrestuarit janë tre persona të dyshuar për përfshirje në këtë rast tragjik dhe dyshimet e para lidhen me një konflikt mes familjeve të viktimës (Familja Veseli me prejardhje nga Mitrovica) dhe njërit prej të dyshuarve (Familja Halili me prejardhje nga Drenica).

Konflikti mes dy familjeve daton nga viti 2011, ndërsa për rastin ku  20 vjeçari (Elion Veseli) vdiq nga plagët e rënda të pësuara nga sulmi me thikë, ishin të arrestuar pesë persona, ndërsa sipas mediave suedeze, dy prej tyre janë liruar menjëherë, ndërsa tre të tjerët, janë mbajt në paraburgim.

KlanKosova.tv ka arritur ekskluzivisht të sigurojë aktvendimet, ku edhe bëhen të ditur emrat e tre personave të dyshuar, që tashmë ngarkohen për kryerjen e veprës “Vrasje”.

Emrat e personave janë: Besnik Halili (28-vjeçar), Aron Halili (25-vjeçar) dhe Nazmi Halili (29-vjeçar), të cilët janë vëllezër, ndërsa sot, (26.05.2026), Nazmi Halili kishte kërkuar seancë dëgjimore, ku me vendim të gjykatës, ai përsëri është dërguar në paraburgim.]

Pamje nga seanca dëgjimore e Nazmi Halilit
Sipas dokumenteve të dorëzuara nga prokuroria në gjykatë, pritet të duhen të paktën edhe gjashtë javë derisa NFC, Qendra Forenzike e Policisë, të përfundojë analizat e saj lidhur me provat e mbledhura, përfshirë edhe ekzaminimet e gjurmëve të ADN-së.

Ndërkohë, policia ka zhvilluar disa intervista dhe marrje në pyetje që nga dita kur vëllezërit u arrestuan më 12 maj, ndërsa pritet të zhvillohen edhe shumë intervista të tjera gjatë javëve në vazhdim.

Klankosova.tv poashtu ka mësuar se tre vëllezërit janë dërguar në burgje të ndryshme, në mënyrë që të shmangin kontaktin ndërmjet vete, ndërsa nuk ju lejohet kontakti me asnjë njëri tjetër përveç avokatëve të tyre mbrojtës.

Frotografi të tre të dyshuarave për vrasjen e Elion veselit
Po ashtu, në kuadër të hetimeve janë sekuestruar edhe telefonat mobilë, të cilët pritet t’i nënshtrohen analizimit dhe kontrollimit të përmbajtjes së tyre, proces që njihet si “zbrazje” e telefonave, për të siguruar prova shtesë për rastin.

Klankosova.tv ka mësuar pashtu se në vitin 2020 Besnik Halili (vëllau i mesëm), ishte dënuar edhe më herët së bashku me tre persona të tjerë për grabitjen e një  dyqani në Suedi, ngjarje  e ndodhur në shkurt të vitit 2017.

Nazmi Halili, Besnik Halili dhe Aron Halili gjatë seancës janë deklaruar të pafajshëm, mirëpo me vendim të gjykatës pas kërkesës së prokurorisë, tre personat janë dërguar në paraburgim, me arsyetimin se të njëjtit mund të zhdukin prova, ose në një mënyrë tjetër të ndërhyjnë në procesin hetimor.

Klankosova.tv ka kontaktuar Policinë Suedeze në këtë rajon ditë më parë, për të marrë informacione të reja, por zyrtari për komunikim nuk e ka dhënë asnjë detaj, meqë hetimi ende vazhdon.

Osmani: Deputetët e LVV-së që kanë shpifur ndaj meje do t’i ballafaqoj në gjykatë

Ish-presidentja e Kosovës dhe kandidatja e LDK-së për presidente, Vjosa Osmani, ka deklaruar se do t’i ndjekë në rrugë ligjore deputetët e Lëvizjes Vetëvendosje, të cilët sipas saj kanë shpifur dhe kanë bërë denigrime ndaj saj.Në emisionin “Këndi i Debatit” në Tëvë1, Osmani tha se fushata e sulmeve dhe shpifjeve ndaj saj po zhvillohet edhe përmes profileve të rreme në rrjetet sociale, por sipas saj, burimi i tyre dihet.

“Tash ata fshihen prapa profileve të rreme, por dihet se ku e kanë burimin, sepse e kanë pasur gjithmonë në të njëjtin vend. Ne jemi duke i adresuar ato në polici dhe në organet e rendit, por siç kam paralajmëruar, do t’i adresoj edhe në gjykatat e vendit tonë”, ka deklaruar Osmani.Ajo shtoi se këtë ballafaqim do ta vazhdojë për aq kohë sa të jetë e nevojshme.

“Këtë ballafaqim do ta vazhdoj gjatë tërë jetës sime. Nëse ata dëshirojnë të fyejnë, të ofendojnë, të godasin ulët dhe të shpifin deri në ato përmasa që nuk i ka bërë asnjë politikan më herët, atëherë kjo është një betejë jetësore. Nuk ka të bëjë vetëm me politikë, por me mbrojtjen e vlerave njerëzore”, u shpreh ajo.Osmani theksoi se nuk do të tërhiqet nga paditë ndaj deputetëve të LVV-së për deklaratat që i konsideron shpifëse.

“Deputetë të VV-së kanë publikuar një sërë shpifjesh ndaj meje dhe për secilën prej tyre, kurdo që gjykatat tona të gjejnë kohë të merren me to, unë do të ballafaqohem në gjykatë. Fatkeqësisht procedurat po zgjasin shumë, por për çdo shpifje dhe tentim denigrimi do të përballem në gjykatë”, tha Osmani.Ajo shtoi se nuk do të lejojë që puna dhe angazhimi i saj për shtetin të njollosen.

“Nuk e kam ndërmend që punën, dinjitetin dhe jetën e ndershme që ia kam kushtuar këtij vendi ta lejoj të njolloset”, përfundoi Osmani.

Gruda i PDK-së: Prokuroria të nisë hetimet, buxheti i shtetit po përdoret për blerje votash

Vendimi i fundit i Qeverisë në detyrë për ndarjen e dy milionë eurove për linjat e fluturimit “për destinacionet që i shërbejnë mërgatës”, ka nxitur reagime të shumta nga eksponentë të partive politike, si dhe pjesëtarë të shoqërisë civile.

Ndaj këtij vendimi, ka reaguar ashpër edhe kandidati për deputet nga radhët e PDK-së, Përparim Gruda.

Ai ka thënë se vetëm 12 ditë para zgjedhjeve, Qeveria po ndan dy milionë euro nga buxheti i shtetit për të blerë vota.

Gruda ka thënë se ekzekutivi në detyrë po keqpërdor buxhetin e shtetit për fushatë, me ç’rast ai ka ftuar prokurorinë që të nisë hetimet.

“Në foto shihet vendimi i Qeverisë së Kosovës, i datës 26 maj 2026, për ndarjen e mjeteve në kuadër të masës ‘Mbështetja e Mërgatës’, për subvencionimin e linjave ajrore. Ky është keqpërdorim i pastër i parasë publike për interesa partiake. Kur pushteti përdor buxhetin e Kosovës për fushatë, zgjedhjet nuk janë më as të lira dhe as të ndershme. Prokuroria e Shtetit duhet të nisë menjëherë hetime për këtë skandal dhe për përgjegjësit e këtij vendimi. Heshtja në këtë rast do të ishte bashkëfajësi”, ka shkruar Gruda.

“Hajn i flliqt”, Kajtazi me reagim të ashpër pas vendimit të Qeverisë

Gazetari e analisti Vehbi Kajtazi ka reaguar pas vendimit të fundit të Qeverisë në detyrë për ndarjen e dy milionë eurove për fluturimet e mërgatës.

“Nese kjo shoqni qe paguan taksa e duron edhe kete krim te ketij hajni, atehere e paçim ne pushtet sa te kete jete. Ky hajn, eshte aq i guximshem saqe krejt taksat tona t’i vjedhe per interesa te tij elektorale”, ka thënë Kajtazi në reagimin e tij.

Ai ka tërhequr një paralele, duke thënë se në QKUK ka mungesë të barnave, për shkak që sipas tij janë vjedhur taksat.

“Nderkohe, ne QKUK dergjen pacient ne mungese te barnave, sepse ky hajn ka vendos qe taksat tona me i vjedh. Hanj i flliqt!”, thuhet në postimin e Kajtazit.

Murati tregon pse u ndanë 2 milionë euro për mërgatën

Ministri në detyrë i Financave, Hekuran Murati, ka arsyetuar pakon prej 2 milionë eurosh të ndarë për mbështetjen e mërgatës me rritjen e çmimit të kerozinës.

Murati, në emisionin “Pressing”, ka pretenduar se kjo nuk ka të bëjë me fushatë.

Sipas tij, me rënien e numrit të pasagjerëve në Aeroportin e Prishtinës bien edhe të hyrat e shtetit.

“Kjo ka të bëjë me aviokompanitë, për të cilat është parë e nevojshme të ketë një skemë mbështetëse. Nuk ka të bëjë me fushatë, por me sezonën e verës.

Këtë e bëjmë çdo vit, sikurse e kemi bërë edhe me kartonin e gjelbër. Për shkak të tronditjeve globale dhe rritjes së çmimit të kerozinës, shumica e aviokompanive i kanë shitur një pjesë të biletave më herët, ndërsa tani çmimi është rritur dhe ato kanë tendencë t’i anulojnë fluturimet.

Kjo është për mërgatën, por vlen për gjithë sezonin. Mërgata vjen pas zgjedhjeve. Nëse përfundojmë me anulimin e këtyre fluturimeve, bie numri i pasagjerëve në Aeroportin e Prishtinës dhe kjo ndikon në të hyrat e shtetit. E dyta, ka ndikim edhe në ekonomi”, u shpreh ai.

Del vendimi i plotë, çka po synon qeveria me 2 milionë Eurot për fluturimet e mërgatës

Dy javë para zgjedhjeve, Qeveria në detyrë në krye me Albin Kurtin ka ndarë 2 milionë euro për mbështetjen e linjave të fluturimit për mërgatën.

Por, çka synohet të bëhet saktësisht me këto 2 milionë euro?

Sipas vendimit të Qeverisë, do të shtohen linja të reja në destinacionet prej të cilave udhëton më shumë mërgata, për periudhën e mbetur të sezonit veror të aviacionit, shkruan Reporteri.net.

Kurti e merr një vendim për mërgatën në prag të zgjedhjeve, ndan dy milionë euro

Qeveria në detyrë ka mbajtur mbledhje elektronike, ku ndër të tjera ka marrë vendim që t’i ndajë dy milionë euro për mbështetjen e linjave të fluturimit për destinacionet që shërbejnë mërgatën.

“Qeveria në detyrë e Republikës së Kosovës, ka zhvilluar sot mbledhje elektronike, në të cilën ka: Ndarë mjete buxhetore në shumë prej 2,000,000.00 euro (dy milionë euro), për zbatimin e Masës 4.5 ”Mbështetja e Mërgatës” të Pakos së Ringjalljes Ekonomike, për mbështetjen e linjave të fluturimit për destinacionet që shërbejnë mërgatën tonë”, thuhet në njoftimin e qeverisë, shkruan Insajderi.

Në mesin e vendimeve të tjera, Shoqatës së Matematikanëve të Kosovës i janë ndarë 8,000 euro për pjesëmarrjen në Olimpiadën e 67-të Ndërkombëtare të Matematikës 2026, e cila do të mbahet më 21 korrik 2026 në Shanghai të Kinës.

Po ashtu, “Kosova Global Talent Center” do të mbështetet me 70,876.79 euro për pjesëmarrjen e 26 nxënësve në finalen e NEO Science Olympiad, që do të mbahet në korrik 2026 në New York të SHBA’ve.

Ndërkohë, Shoqatës së Kimistëve të Kosovës i janë ndarë 3,500 euro për pjesëmarrje në Olimpiadën Ndërkombëtare të Kimisë 2026, e cila do të zhvillohet nga 10 deri më 19 korrik në Tashkent.

Qeveria gjithashtu ka aprovuar listën e anëtarëve potencialë të Komisionit të Pranimit për Ministrinë e Punëve të Brendshme.