Arrestohet edhe një komisionere e VV-së për manipulim votash

Mbi 100 komisionerë të dyshuar për dallavere me vota janë ndaluar sot në një aksion të gjerë të Krimeve Ekonomike, në koordinim me Prokurorinë Themelore në Prizren.

Përveç komisionerit të PDK-së, Art Hasani (djali i kandidatit Nait Hasani) dhe një nga partia e Emilija Rexhepit, është ndaluar edhe një komisionere e Vetëvendosjes.

Avokati Gent Gjini, në emisionin “Kosova Today” ka deklaruar se klientja e tij, e arrestuar në cilësinë e komisioneres së Lëvizjes Vetëvendosje, ka nënshkruar një dokument pa e kuptuar përmbajtjen e tij.

“Duke qenë se rasti është kompleks, dhe kjo zonjë nuk ka pasur kurrë vepra penale më herët dhe ka rënë pre e mashtrimeve nga subjektet partiake”, tha Gjini.

Ai ka thënë se klientja e tij ka vepruar me naivitet, duke besuar se procesi zgjedhor ka qenë i rregullt.

“Kjo zonjë dhe shumë komisionerë të pafajshëm kanë rënë pre e këtyre manipulimeve, sepse me naivitet kanë nënshkruar një dokument ku thuhej se procesi zgjedhor ka shkuar në rregull. Vetëm pas rreth dy javësh është kuptuar se një kandidat kishte përfituar nga shtimi i votave”, ka deklaruar avokati.

Hamza kërcënon me përjatshtim nga partia këta kandidatë për deputet

Katër kandidatë për deputet të Partisë Demokratike të Kosovës, të projektuar për të fituar mandate në legjislaturën e ardhshme, janë kërcënuar me përjashtim nga partia.

Kryetari i PDK-së, Bedri Hamza ka paralajmëruar se deputetëve të cilëve u janë shtuar votat gjatë procesit të numërimit të tyre dhe “faktohen që janë pjesë të asaj” skeme, do t’u kërkohet mospranimi i mandatit.

“Ti mundesh me i pasë 50 mijë vota, 100 mijë vota, por nëse të janë shtuar votat dhe konstatohet dhe faktohet që ti je pjesë e asaj, nuk nuk mundesh të thuash ti se je deputet, kushdo qoftë ai dhe nga cilado parti”, tha Hamza të mërkurën në një intervistë me Adriatik Kelmendin, autorin e emisionit “Rubikon” në Klan Kosova. “Në parim nuk duhet me pranu mandatitn e deputetit”.

Sipas liderit të PDK-së, edhe nëse numri i votave të shtuara të kandidatëve për deputetë nuk ndikon në rënien e tyre nën pragun e 22 deputetëve të projektuar të PDK-së, partia do të distancohet nga keqpërdoruesit e dyshuar.

“Nëse konstatohet se ka qenë pjesë e këtij procesi nuk është e duhura që me pranu mandatin, por nëse e pranojnë unë si kryetar dhe si parti distancohemi”, paralajmëroi Hamza.

Hamza nuk ka përmendur emrat e kandidatëve për deputetë, por sipas rezultateve të përmbledhura të Komisionit Qendror të Zgjedhjeve (KQZ), aktualisht katër nga kandidatët që projektohen të zënë ulëse në legjislaturën e ardhshme, rezultojnë me 700 deri në rreth 3,300 vota të shtuara.

Ata janë Xhavit Haliti, Kujtim Gashi, Enver Hoxhaj dhe Nait Hasani.

Procesi i rinumërimit të votave, i cili ka përfunduar në vendvotimet e 19 komunave dhe po vazhdon në 19 komuna të tjera, ka rezultuar me heqjen e 719 votave për Xhavit Halitin, ish-deputetin e Partisë Demokratike të Kosovës.

Në listën e 22 kandidatëve më të votuar të PDK-së, Haliti renditet i 16-ti, një pozitë që e çon atë drejt Kuvendit.

Ish-ministrit të Punëve të Jashtme, Enver Hoxhajt, të renditur të tetin sipas votave të fituara në listën e PDK-së, rezulton t’i jenë minusuar 1,066 vota nga procesi i rinumërimit.

Kujtim Gashi, i renditur i 15-ti në listë, ka 2,426 vota më pak aktualisht, ndërsa rinumërimi po vazhdon deri në verifikimin e të gjitha vendvotimeve, ndërsa Nait Hasani ka 3,335 vota më pak. Hasani listohet kandidati i 10-të më i votuar në listë, edhe pas minusimit të mbi tre mijë votave.

Të premten, në aksionin kundër mashtrimeve zgjedhore të ndërmarrë nga Prokuroria e Prizrenit, policia ka arrestuar Art Hasanin, një komisioner zgjedhor në procesin e 28 dhjetorit dhe djali i kandidatit për deputet Nait Hasani.

KRM ”Pastrimi” aplikon çmimoren e re për grumbullimin e bërllokut

Kompania Rajonale e Mbeturinave KRM “Pastrimi” Sh.A. ka njoftuar qytetarët e Prishtinës për zbatimin e çmimores së re për shërbimin e grumbullimit dhe transportit të mbeturinave.

Ky ndryshim thuhet se vjen në përputhje me Rregulloren për Menaxhimin e Mbeturinave, të miratuar zyrtarisht nga Kuvendi Komunal i Prishtinës në dhjetor të vitit 2023, dhe të publikuar në Gazetën Zyrtare të Republikës së Kosovës.

Ky akt, sipas kompanisë, nënkupton përcaktimin e tarifave të standardizuara për shërbimin e grumbullimit dhe transportit të mbeturinave komunale, të cilat janë hartuar në përputhje me dispozitat ligjore dhe procedurat institucionale të qytetit tonë. Po ashtu reflekton kategorizimin e konsumatorëve, nga amvisëritë rezidente e jorezidente, tek bizneset e ndryshme sipas madhësisë dhe llojet e kontratave,  në mënyrë që shërbimi të ofrohet në mënyrë të barabartë, transparente dhe efikase për të gjithë, transmeton Klankosova.tv.

“Synimet kryesore të zbatimit të çmimores janë:

• sigurimi i një sistemi të qëndrueshëm financiar për funksionimin e shërbimit;
• rritja e transparencës dhe qartësisë në tarifim;
• mbështetja e ofrimit të një shërbimi të rregullt dhe cilësor për të gjithë konsumatorët;
• përmbushja e standardeve mjedisore dhe të shëndetit publik në territorin e Komunës së Prishtinës”, thuhet në njoftimin e tyre në Facebook.

“KRM “Pastrimi” po ashtu ka shprehur vlerësimin për bashkëpunimin e deritanishëm me qytetarët dhe subjektet ekonomike duke thënë se janë të gatshëm të ofrojnë çdo sqarim të mëtejshëm dhe informacion të nevojshëm për implementimin e çmimores.

“KRM “Pastrimi” e vlerëson lart bashkëpunimin me qytetarët dhe subjektet ekonomike dhe është e disponueshme për çdo sqarim të mëtejshëm, informim publik apo bashkëbisedim institucional në lidhje me çmimoren e miratuar. Qëllimi ynë kryesor mbetet garantimi i një qyteti më të pastër, një shërbimi më efikas dhe një procesi të drejtë tarifimi për të gjithë.

Ndalim prej 48 orësh për të gjithë të shoqëruarit për manipulim me vota në Prizren

Burime të besueshme bëjnë me dije se është konfirmuar masa e ndalimit prej 48 orësh për të gjithë personat e shoqëruar sot në Polici, në kuadër të hetimeve për manipulim të procesit të votimit në Prizren, ku mijëra vota dyshohet se janë transferuar nga një kandidat për deputet tek tjetri.

Sipas burimeve, masa e ndalimit pritet të zbatohet për të gjithë të ftuarit, me përjashtim të rasteve specifike, si persona me probleme serioze shëndetësore dhe ndonjë grua shtatzënë, ku mund të vendoset trajtim i ndryshëm procedural.

Megjithatë, sfida kryesore për organet e ndjekjes mbetet sistemimi i të ndaluarve, pasi siç mësohet nuk ka kapacitete të mjaftueshme në qendrat e ndalimit në Kosovë për një numër kaq të madh personash.

Burimet thonë se plani paraprak është që një pjesë e tyre të sistemohen në një sektor të burgut të Lipjanit, në hapësirën ku më parë ishin mbajtur edhe të ndaluarit në rastin e skandalit të BKS, si dhe në qendra të tjera të ndalimit ku mund të sigurohet vend.

Megjithatë, vendimi përfundimtar për vendosjen dhe shpërndarjen e tyre pritet të merret në koordinim të plotë mes Prokurorisë dhe Policisë, në varësi të numrit përfundimtar të personave që do të përfshihen në masën e ndalimit.

Hetimet për këtë rast po vazhdojnë, ndërkohë që burimet konfirmojnë se organet kompetente kanë në dispozicion edhe prova elektronike dhe filmime, që sipas tyre dokumentojnë dyshimet për ndërhyrje të organizuar në procesin e numërimit.

Tarifat e reja të rrymës, vjen lajmi i fundit

Pos reduktimeve dhe telasheve të tjera me rrymën, qytetarët mund të përballen edhe me fatura më të shtrenjta.

Por, a do të ketë sërish shtrenjtim të energjisë elektrike ose jo nuk dihet krejt sigurt pasi deri sot ka afat për t’i propozuar tarifat.

Sipas Zyrës së Rregullatorit për Energji, akoma nuk dihet se sa përqind do fryhen faturat.

Besnik Bislimi konfirmon marrëveshjen me serbinë…

Kryenegociatori i Kosovës, Besnik Bislimi, tha se është arritur pajtim me Serbinë për funksionalizimin e komisionit të përbashkët për zbatimin e marrëveshjes për personat e zhdukur gjatë luftës në Kosovë.

Pas rundit të ri të dialogut në Bruksel, Bislimi deklaroi se tani mbetet që përfaqësuesit e delegacioneve të Kosovës dhe Serbisë të takohen “në javët në vijim dhe të përcaktojnë prioritetet e para për punën e komisionit të përbashkët”.

“Arritëm përfundimisht ta funksionalizojmë Komisionin e përbashkët për Personat e Pagjetur. Mbetet që në javët në vijim të takohen zëvendësit tanë dhe të përcaktojnë prioritetet e para të punës së Komisionit të përbashkët”, ka deklaruar Besnik Bislimi në fund të takimit.

Marrëveshja u arrit pas disa orësh bisedimesh që ndërmjetësi evropian në dialog, Peter Sorensen, zhvilloi veç e veç me Bislimin dhe kryenegociatorin e Serbisë, Petar Petkoviq.

Në fund të këtyre takimeve, në orët e mbrëmjes u mbajt një takim i përbashkët, në të cilin marrëveshja u formalizua.

Rundi i ri i dialogut u zhvillua pas vizitës së Sorensenit në Prishtinë dhe Beograd javën e kaluar.

Për çështjen e personave të zhdukur, kryeministri i Kosovës, Albin Kurti dhe presidenti i Serbisë, Aleksandar Vuçiq, më 2023 u pajtuan për Deklaratën e përbashkët për personat e zhdukur.

Palët u pajtuan për zbatimin e plotë të deklaratës së përbashkët për personat e zhdukur gjatë një takimi trepalësh mes kryenegociatorëve në dhjetor 2024 në Bruksel.

Takimi i parë ishte paraparë të mbahej në janar, por pala serbe nuk pranoi të merrte pjesë për shkak të veprimeve për mbylljen e zyrave që mbështeten nga Serbia në Kosovë.

Takimi i sotëm është i pari në kuadër të dialogut për normalizimin e marrëdhënieve ndërmjet Serbisë dhe Kosovës këtë vit.

Gjatë vizitës së tij në Prishtinë më 14 janar, Sorensen tha lidhur me dialogun se “kam shpresa se viti 2026 do të na japë atë që viti 2025 nuk na e dha”.

“Çfarë do të bëjmë ne është të sigurohemi që palët të ulen dhe të bisedojnë. Duhet ta gjejmë një mënyrë që kjo të ndodhë”, theksoi Sorensen në Prishtinë.

Ai tha se do të punojë për të gjetur një mënyrë që dy vendet fqinje të zhvillojnë bisedime të nivelit të lartë, në përpjekje për t’i normalizuar marrëdhëniet.

Kosova dhe Serbia nuk kanë zhvilluar takim të nivelit të lartë që nga viti 2023, pas rritjes së tensioneve mes tyre për shkak të një sulmi nga një grup serbësh të armatosur ndaj Policisë së Kosovës në veriun e banuar me shumicë serbe në shtator të atij viti.

Kurti – i cili pritet të jenë në krye të qeverisë së vendit edhe për një mandat të tretë katërvjeçar – e ka kushtëzuar vazhdimin e dialogut me dorëzimin e të dyshuarit për sulmin në Banjskë të Zveçanit që la një rreshter të vrarë, Millan Radoiçiq.

Radoiçiq ishte nënkryetar i Listës Serbe, partisë më të madhe të serbëve të Kosovës kur ndodhi sulmi dhe e mori përgjegjësinë për të. Beogradi nuk ka pranuar t’ia dorëzojë Kosovës atë, dhe thuhet se ai endet i lirë në Serbi.

Edhe Serbia ka kushtet e veta në dialog, siç e ritheksoi edhe Petkoviq pas takimit me Sorensenin më 16 janar në Beograd.

Kryenegociatori serb tha se përparimi në dialogun e ndërmjetësuar nga blloku varet nga gatishmëria e Kosovës për ta themeluar një asociacion të komunave me shumë serbe.

Kosova dhe Serbia veçse arritën marrëveshje për rrugën drejt normalizimit, e njohur si Marrëveshja e Ohrit, më 2023, por nuk janë duke e zbatuar atë.

Ndër pikat e marrëveshjes është edhe themelimi i Asociacionit të komunave me shumicë serbe në Kosovë, por Prishtina nuk ka ndërmarrë hapa për ta përmbushur këtë kërkesë. /Rel

Limaj i humb 50 vota në “konakun” e tij

Procesi i rinumërimit të votave për kandidatët për deputetë në disa komuna ka përfunduar, përfshirë edhe komunën e Malishevës.

Pas këtij procesi, kryetarit të Nismës Socialdemokrate, Fatmir Limajt, i janë hequr 50 vota. Limaj, i cili pretendonte të kalonte pragun zgjedhor, nuk arriti të fitojë as në vendlindjen e tij.

Më shumë vota se Nisma në Malishevë ka marrë Lëvizja Vetëvendosje.

Sipas rezultateve përfundimtare pas rinumërimit, Limaj si kandidat ka grumbulluar gjithsej 6,885 vota në këtë komunë.

Kjo komunë drejt zgjedhjeve të jashtëzakonshme për Asamble të Komunës, Kryesuesi u zgjodh me një ditë vonesë

Kuvendi Komunal i Junikut ka gjasa të shkojë drejt zgjedhjeve të jashtëzakonshme për këshilltar lokal. MAPL me ligjin për Vetëqeverisjen Lokale obligohet ta njoftojë Qeverinë kur Komunat dështojnë ta zgjedhin Kryesuesin e Kuvendit të tyre brenda 30 ditësh nga themelimi.

Kuvendi i Junikut e kreu këtë votim në ditën e 31-të. Me ligj, Qeveria mund ta shpërndajë kuvendin lokal, që shkaku i shkeljes së afatit të përcaktuar me ligj konsiderohet jofunksional.

Ruzhdi Shehu më 12 dhjetor 2025 dha betimin për mandatin e dytë në krye të Junikut. Pos tij, në të njëjtën seancë u betuan edhe 15 asamblistët e Kuvendit Komunal, të dalë nga zgjedhjet e 12 tetorit 2025, duke themeluar kështu legjislaturën e re lokale në komunën e vogël të rajonit të Dukagjinit.

Për dallim nga Shehu që me betimin para Kuvendit Komunal nisi funksionalizimin e mandatit të ri në krye të qytezës, përfaqësuesit e zgjedhur të asamblesë së Junikut kishin për obligim ta kryenin edhe një detyrë: Zgjedhjen e kryesuesit të tyre. Brenda afatit të caktuar. Në rastin e kundërt u rrezikohet mandati të 15-ve.

Ligji për Vetëqeverisjen Lokale që rregullon funksionimin e Komunave dhe Kuvendeve të tyre Komunale, parasheh që kjo të bëhet brenda 30 ditësh nga themelimi i tyre.

Në rast se nuk ndodhë, i njëjti ligj, nënparagrafin a) të paragrafit të dytë të nenit 50, me automatizëm parasheh që Kuvendi i Komunës konsiderohet jofunksionues, shkruan gazeta online Reporteri.net.

Kuvendi i Junikut kryesuesin e zgjodhi tek më 12 janar 2026. 31 ditë pas betimit të kryetarit dhe këshilltarëve komunal, që nënkupton themelimin e legjislaturës së re lokale.

Në krye të saj u vu Leonard Llolluni i AAK-së, i cili i siguroi edhe votat e LVV’së, duke ia marrë kështu opozita postin e rëndësishëm LDK-së, e cila me Ruzhdi Shehun qeverisë komunën.

Ligji për Vetëqeverisjen Lokale, në paragrafin 3 të Nenit 50, thotë se në raste të tilla kur kuvendi komunal konsiderohet jofunksional, pasi ka dështuar që brenda 30 ditësh ta zgjedhë Kryesuesin, Ministria përgjegjëse për qeverisje lokale [MAPL] e njofton Qeverinë e Republikës së Kosovës për mosfunksionimin e komunës.

“Qeveria mund ta shpërndajë kuvendin e komunës jofunksionues”, thuhet në të njëjtin paragraf.

Shpërndarja e Kuvendit të Komunës, në këtë rast, nënkupton me automatizëm shkuarjen në zgjedhje të jashtëzakonshme vetëm për 15 përfaqësuesit e Kuvendit të Junikut, por jo edhe për Kryetar të Komunës, i cili në balotazhin e 9 nëntorit siguroi edhe katër vitet e ardhshme në krye të Junikut, shkruan gazeta online Reporteri.net.

“Zgjedhjet e reja për kuvendin e komunës mbahen në pajtim me ligjin për zgjedhjet komunale”, thuhet në paragrafin e 4 të Nenit 50 të Ligjit për Vetëqeverisje Lokale.

Të pyetur rreth kësaj situate të krijuar në Junik, Ministria e Administrimit të Pushtetit Lokal, të enjten, deri në publikimin e këtij artikulli, nuk kanë kthyer përgjigje nëse janë duke e shqyrtuar rastin dhe nëse Kuvendi Komunal atje do të shkojë në zgjedhje të reja, të jashtëzakonshme. As Qeveria e Kosovës nuk tregoi nëse janë njoftuar nga MAPL-ja për situatën në Junik dhe nëse do ta shpërndajë kuvendin e komunës jofunksionues.

Bazuar në Ligjin për Zgjedhjet Lokale, data e shpalljes së zgjedhjeve nëpër komuna, pas shpërbërjes së Kuvendit Komunal, kur janë të parakohshme shpallen nga Presidenti i vendit, jo më vonë se 10 ditë nga shpërbërja e Asamblesë, nëse brenda 5 ditësh nuk parashtrohet ndonjë ankesë tek Gjykata Kushtetuese.

“Zgjedhjet e parakohshme nuk mund të mbahen më herët se tridhjetë (30) ditë dhe jo më vonë se dyzetepesë (45) ditë pas shpërbërjes”, thuhet në paragrafin 4 të Nenit 4 të Ligjit për Zgjedhjet Lokale.

“Zgjedhjet e parakohshme qeverisen përmes ligjeve të njëjta dhe rregullat e KQZ-së sikurse edhe zgjedhjet tjera, përveç se KQZ-ja mund të ndryshojë afatet kohore në rast se kjo nevojitet për shkak të rrethanave”.

Për dallim nga Juniku, Mitrovica e Jugut e “evitoi rrezikun për zgjedhje të reja komunale” duke mbledhur Kuvendin lokal në mbrëmjen vonë të 12 janarit 2026, para se të hynin në ditën e 31-të të afatit. Aty Kryesues u zgjodh Safet Kamberi i LDK-së që arriti marrëveshje bashkëqeverisëse me Faton Pecin, kryetarin e komunës nga LVV-ja.

Këta janë kandidatët e LVV-së që humbën afro 300 vota nga rinumërimi në Malishevë

Rinumërimi i plotë i kutive të votimit po vazhdon edhe sot në Qendrën e Numërimit dhe Rezultateve (QNR). Nga gjithsej 75 vendvotime në Komunën e Malishevës, deri më tani janë rinumëruar 67 prej tyre, shkruan Insajderi

Të dhënat e deritanishme tregojnë se kandidati i Lëvizjes Vetëvendosje që ka humbur më së shumti vota nga rinumërimi është Valon Hoti me 277 vota më pak.

Pas tij renditet Gani Krasniqi.

Lista e kandidatëve të LVV-së me humbje votash në Malishevë është si më poshtë:

• Gani Krasniqi – 253 vota
• Adnan Rrustemi – 62 vota
• Albin Kurti – 47 vota
• Albulena Haxhiu – 22 vota
• Glauk Konjufca – 22 vota

Rinumërimi i votave: Fetah Paçarizi shtyhet “kokë më kokë” me këtë kandidat të PDK’së për heqje votash

Fenomeni i heqjes së votave tek Partia Demokratike e Kosovës është shfaqur edhe në Komunën e Malishevës.

Teksa janë rinumëruar 71 nga 75 kuti apo 94,67 për qind të votave në Malishevë, janë shtuar dyshime për manipulim të votave, shkruan Insajderi.

Tek Partia Demokratike e Kosovës, numër i madh i votave i janë hequr kandidatit për deputet nga ky subjekt politik, Gazmend Maliqaj. Pra, 878 sosh.

Pas tij qëndron kandidati tjetër për deputet i PDK’së, Adnan Thaçi, me 689 vota të hequra.

Numër i madh i votave iu është hequr edhe kandidatit të famshëm të PDK’së, Fetah Paçarizit. Atij iu janë minusuar 610 vota. Numri total i votave të hequra në nivel vendi si shkak i rinumërimit i Paçarizit është 6,638.