PDK e rikthen një ulëse në Kuvend, kjo parti e humb një

Nga rezultatet e përmbledhura të publikuara në faqen zyrtare të Komisionit Qendror të Zgjedhjeve, Lëvizja Vetëvendosje ka marrë 50.65% apo 470 mijë e 127 vota.

Në vend të dytë del të jetë Partia Demokratike e Kosovës me 20.43% apo 189 mijë e 632 vota. Lidhja Demokratike e Kosovës ka 13.32% apo 123 mijë e 609 vota. Ndërsa me 5.53% apo 51 mijë e 312 vota është Aleanca për Ardhmërinë e Kosovës.

Sipas njoftimit të fundit të Komisionit Qendror të Zgjedhjeve, LVV ka arritur 57 ulëse në Kuvend.

PDK-ja 23, ndërsa LDK 14 dhe AAK 6 ulëse.

Nga ky ndryshim i fundit, mandatin e deputetit nga LDK-ja e ka humbur Fadil Hadergjonaj, ndërsa te PDK-ja është rikthyer Bekim Haxhiut.

/Reporteri.net/

Kryetari i kësaj partie konfirmon votën për “Qeverinë Kurti 3”

Kryetari i partisë për Liri, Drejtësi dhe Mbijetesë, Nenad Rashiq, ka konfirmuar se sipas rezultateve të deritanishme ka fituar një ulëse në Kuvend. Rashiq, në një intervistë për RTV21, tha se do ta votojë Qeverinë “Kurti 3”, por paraprakisht ka kërkuar një takim me Kurtin, në të cilin do t’i sqarohen disa çështje.

“Besoj se kemi siguruar një mandat, pasi diferenca e votave është e madhe dhe nuk jemi në rrezik sa i përket mandatit. Një mandat, por i vlefshëm. Unë kam përvoja të mira sa i përket bashkëpunimit me zotin Kurti. Ende nuk kemi biseduar për ndonjë lloj bashkëpunimi, por jam i sigurt se në ditët në vijim do të takohemi dhe do të bisedojmë. Jam i gatshëm për bashkëpunim, por normalisht ka detaje sa i përket përmirësimit të performancës. Nuk e shoh pengesën për vazhdimin e bashkëpunimit. Kushte nuk kemi për ta votuar Qeverinë Kurti 3, por ka kërkesa për korrigjime teknike për një drejtim më të mirë në interes të qytetarëve serbë. Vetë Kushtetuta thotë se një ministri duhet të udhëhiqet nga një ministër serb dhe të gjitha rrethanat po na drejtojnë drejt bashkëpunimit. Nuk e shoh pengesën në këtë moment që të vazhdojmë të bashkëpunojmë.”

Rashiq e ka lënë të hapur mundësinë e rizgjedhjes së tij si nënkryetar i Kuvendit, por fillimisht tha se është në pritje të vendimit të Gjykatës Kushtetuese, e cila duhet të sqarojë nëse posti i nënkryetarit të Kuvendit nga komuniteti serb i takon Listës Serbe, si shumicë në parlament, apo nëse ky post mund t’i takojë atij.

“Për momentin, Gjykata Kushtetuese është afër fundit të marrjes së një vendimi sa i përket ankesës së Listës Serbe. Nga ai vendim pres që të sqarohet saktë nëse partia më e madhe ka të drejtë që në mënyrë monopole ta ketë kandidatin e saj, apo nëse, si në rastin tim, mund të ketë një kandidat tjetër.”, tha ai.

Mbi 45% të votave të numëruara nga votat me kusht, këto janë rezultatet

Komisioni Qendror i Zgjedhjeve ka publikuar rezultatet e deritashme nga votimi me kusht, ku deri më tani janë procesuar 26 nga 57 vendvotime, apo 45.61% e totalit.

Sipas të dhënave të përditësuara, Lëvizja Vetëvendosje! kryeson me 51.95% të votave, ose 1 mijë e 935 vota.

Në vendin e dytë renditet Partia Demokratike e Kosovës (PDK) me 20.51%, përkatësisht 764 vota, ndërsa Lidhja Demokratike e Kosovës (LDK) ka marrë 11.14% ose 415 vota.

Aleanca për Ardhmërinë e Kosovës (AAK) ka siguruar 7.81% të votave, që përkthehet në 291 vota.

“Kurti s’e propozon Osmanin për presidente, ka një emër tjetër”

Gazetarja e Klan Kosovës, Ardiana Thaçi ka folur mbi mundësinë se vendi mund të shkojë sërish në zgjedhje, në qoftë se nuk zgjidhet presidenti.

Në emisionin “Ora Shtatë”, Thaçi tha se kryeministri në detyrë, në një mënyrë po iu bën presion partive politike për ta votuar presidentin, pasi sipas saj, ai nuk e ka në mend ta propozojë sërish Vjosa Osmanin në këtë post, transmeton Klankosova.tv.

“Unë mendoj që Kurti i ka dy opsione pse thotë ‘në rast se nuk zgjidhet presidenti do të shkojmë në zgjedhje’. E para, do t’i mbajë në presion partitë politike që të bëhen bashkë për të zgjedhur presidentin, që unë mendoj sipas bindjes time, dhe rolit se si e luan lojën politike zotëri Kurti, nuk është e propozuara e tij Vjosa Osmani. Unë mendoj se zotëri Kurti do ta ketë një emër tjetër”, tha Thaçi.

Kurti me plan tjetër për presidentin? Mushkolaj jep sinjale të forta

Analisti Imer Mushkolaj ka deklaruar në emisionin Debat Plus se nuk e sheh të mundshme që kryeministri Albin Kurti ta propozojë edhe për një mandat tjetër presidenten aktuale Vjosa Osmani.

“S’besoj se do të ketë zgjedhje për shkak se po flasim vetëm për një emër që ka shprehur interesim për t’u rizgjedhur në postin e presidentes, e kjo është zonja Osmani”, ka thënë Mushkolaj.

Ai ka shtuar se, sipas tij, deklaratat e Kurtit lënë të kuptohet se mund të ketë një emër tjetër konsensual për këtë post.

“Sinjali që e ka dërguar zoti Kurti nuk flet vetëm për zgjedhje. Edhe kur flet për zgjedhje, unë mendoj se është sinjal se megjithatë do të gjendet ose do të propozohet dikush që mund të ketë konsensus shumë më të gjerë sesa vetëm brenda Lëvizjes Vetëvendosje”, ka theksuar ai.

Mushkolaj ka shtuar se, për momentin, mungesa e emrave të tjerë konkretë e bën të vështirë analizën e situatës.

“Meqë nuk ka emra të tjerë për tani, është pak e vështirë të analizohet më tej, pasi nuk dihet se kush mund të jetë kandidati tjetër për postin e presidentit”, ka përfunduar Mushkolaj.

Deklarohen nga Presidenca për hetimin e pasurisë së Vjosa Osmanit

Pas raportimeve se Agjencia Kundër Korrupsionit ka nisur procedurën zyrtare të verifikimit të pasurisë së Presidentes së Kosovës, Vjosa Osmani, nga Presidenca kanë bërë të ditur se nuk kanë informacione të tilla.

Megjithatë siç tha Bekim Kupina, këshilltari i Osmanit, e mirëpresin çfarëdo verifikimi.

“Presidentja Osmani mirëpret çfarëdo verifikimi nga cilido institucion, që është i bazuar në pavarësi, paanshmëri, integritet, ligj dhe fakte të vërteta, por jo në fushata njollosjesh, të cilat dihet mirëfilli pse po ndodhi.”, tha Kupina per rtv21.

Pas raportimeve se Agjencia Kundër Korrupsionit ka nisur procedurën zyrtare të verifikimit të pasurisë së Presidentes së Kosovës, Vjosa Osmani, nga Presidenca për rtv21.tv kanë bërë të ditur se nuk kanë informacione të tilla.

Reshjet e mëdha të shiut, Komuna e Prishtinës del me njoftim për qytetarët

Komuna e Prishtinës, ka apeluar tek të gjithë qytetarët që të tregojnë kujdes të shtuar gjatë lëvizjes, të shmangin zonat e përmbytura dhe të raportojnë çdo situatë që paraqet rrezik për sigurinë publike.

Ky apel i pushtetit lokal të kryeqytetit, vjen pas reshjeve të mëdha që janë regjistruar në 24 orët e fundit.

“Bazuar në informacionet zyrtare nga Instituti Hidrometeorologjik i Kosovës, njoftojmë qytetarët e Kryeqytetit se gjatë 24 orëve të fundit janë regjistruar mbi 25 mm/m² reshje shiu, ndërsa reshjet pritet të vazhdojnë edhe në ditët në vijim me intensitet të ndryshueshëm:, thuhet në njoftim.

Si pasojë e reshjeve të mëdha të shiut mund të ketë:

• vështirësi në qarkullimin rrugor,

• mbingarkesë të kanalizimit dhe ujërave atmosferike,

• grumbullim të ujit në zona urbane dhe nënkalime,

• rrezik për rrëshqitje lokale të dheut në zona të ndjeshme.

“Institucionet përkatëse të Kryeqytetit janë në gatishmëri të plotë për monitorimin e situatës dhe ndërhyrje sipas nevojës. Për informata të mëtejme, ndiqni njoftimet zyrtare”.

 

 

Vërshimet në Kosovë, IMHK-ja del me njoftim

Reshjet e dendura të shiut që kanë rënë gjatë natës kanë shkaktuar vërshime në disa pjesë të Kosovës.

Instituti Hidrometeorologjik i Kosovës ka njoftuar se si pasojë e reshjeve të pandërprera të shiut gjatë ditëve të fundit, në disa zona të vendit, konkretisht në pjesën perëndimore (Gjakovë, Junik, Deçan, Malishevë, Klinë), si dhe në pjesën qendrore, janë shkaktuar vërshime lokale.

Si rezultat, IHMK thotë se disa lumenj dhe përrenj kanë dalë nga shtretërit e tyre.

IHMK ka njoftuar se reshjet pritet të vazhdojnë dhe do të jenë me intensitet të ndryshëm.

“Këto reshje, me intervale dhe intensitet të ndryshëm, pritet të vazhdojnë edhe gjatë ditëve në vijim, duke mundësuar paraqitjen e vërshimeve lokale, probleme në komunikacion, në sistemet e kanalizimit, si dhe vështirësi në trafik”, thuhet në njoftim.

Aktualisht, lumenjtë kryesorë të vendit, veçanërisht ata në pjesën qendrore, lindore dhe jugore (Ibri, Sitnica, Lepenci, Morava e Binçës), paraqesin ngritje të lehta të nivelit të ujit./Reporteri.net.

 

Emër tjetër konsensual për President përveç Vjosa Osmanit? Kështu përgjigjet Albin Kurti

Vjosa Osmani do edhe një mandat si presidente e vendit, por Albin Kurti parashikon se kjo do të ishte vështirë e realizueshme. Ai iu përgjigj dje edhe pyetjes nëse do të preferonte ndonjë emër tjetër “më konsensual” për President.

Albin Kurti sheh “mundësi jo vetëm teorike, por edhe praktike” që Kosova të shkojë sërish në zgjedhje, pasi të konstituohet Kuvendit dhe të formohet qeveria e re.

Kryeministri në detyrë e sheh të nevojshëm një takim me presidenten Vjosa Osmani, e cila një ditë pas zgjedhjeve të jashtëzakonshme parlamentare ku Lëvizja Vetëvendosje fitoi 50% të votave, shfaqi ambicien e saj për mbetur ende në karrigen e shefes së shtetit.

Por Kurti foli dje në një intervistë për KosovaPress për vështirësitë që kjo të ndodhë.

“Tash, ne e kemi parë deklarimin e presidentes. Së pari duhet ta formojmë Kuvendin dhe qeverinë. Gjithashtu duhet të votojmë buxhetin. Unë besoj që këta janë hapat më të rëndësishëm. Pra, janë tre hapa para se të vijmë te rizgjedhja e presidentes. Dhe unë besoj që nga këta tre hapa ne do të shohim se si janë gjasat përpara. Unë kam deklaruar që është e rëndësishme që po ashtu të ulemi me presidenten dhe t’i diskutojmë të gjitha gjërat”.

“Nevojitet ky takim për shkak se 80 veta në sallë është vështirësi e konsiderueshme. Ju po e keni parasysh që herën e kaluar s’i bëmë dot 61. 80 është numër shumë më i madh se 61. Dhe përderisa kësaj radhe ne 61 i kemi, 80 nuk i kemi. Dhe këto marrëveshje ndërkombëtare, të cilat po përpiqemi t’i kalojmë sa më shpejt, unë besoj që gjithashtu do të mund të na japin indikacione për rrugën përpara. Por nuk besoj që është e drejtë, as e dobishme, që të flasim për hapin e katërt pa i parë këta tre të parët”, tha ai.

I pyetur nëse preferon ndonjë emër tjetër “më konsensual” për president, Kurti tha se tash për tash kjo s’mund të diskutohet.

“Nuk mund të diskutojmë për hapin e katërt pa këta tre të parët. Për besë, është shumë e rëndësishme që të përqendrohemi te këta tre hapat e parë: konstituimi i Kuvendit, votimi i qeverisë dhe kalimi i buxhetit 2026”.

Ai tha se nuk e di se çfarë qëndrimesh do të mbajnë partitë e opozitës në javët dhe muajt në vijim.

“Është e qartë që as marrëveshjet ndërkombëtare dhe as rizgjedhjen e presidentes, zgjedhjen e presidentit, ne nuk mund t’i kalojmë pa pasur edhe deputetë nga opozita”, tha Kurti.

Osmani e ka përmbledhur synimin e saj për të mbetur presidente e vendit edhe për 5 vitet e ardhshme me frazën “vazhdimësi e punëve të mira” dhe “të përbashkëta” me Kurtin, aleatin e saj me të cilin jo rrallë ka pasur mospajtime, të cilat së fundmi i relativizoi.

Lajm i hidhur: Vdes njëri nga ushtarët e parë të UÇK-së

Ka ndërruar jetë njëri nga ushtarët e parë të Ushtrisë Çlirimtare të Kosovës në Prekaz të Epërme të Skenderajt, Sami Mismi, shkruan portali rajoni.org.

I ndjeri ka dhënë kontribut për lirinë e vendit tonë dhe ishte pjestar i dalluar i Ushtrisë Çlirimtare të Kosovës.

Lajmin për vdekjen e Samisë e ka dhënë për rajoni.org familja Misimi.

Për varrimin e të ndjerit familja do të njoftoj me kohë.