Pozoi me Kurtin pa ‘aminin’ e kryetarit, vjen hakmarrja e Abdixhikut ndaj “Xhafës”

“Më mbani për fjale, më pritni pas datës 9 nëntor se nuk e lë pa e trajtu këtë rast”, kishte deklaruar Lumir Abdixhiku në një paraqitje televizive kur ishte pyetur për veprimet që do të ndërmerrte ndaj anëtarit të kryesisë Xhafer Tahiri, pasi ai kishte lidhur koalicion me Lëvizjen Vetëvendosje.

Edhe pse me pesë muaj vonesë, kryetari Abdixhiku nuk i ka harruar veprimet e Tahirit.

Abdixhiku ka vendosur t’i hakmerret ‘Xhafës’ me largim nga kryesia e Lidhjes Demokratike të Kosovës.

Të mërkurën, LDK bëri të ditur se kanë bërë ndryshimin e kryesisë së partisë. Në listën me emrat e rinj të kryesisë nuk figuron edhe emri i Xhafer Tahirit, i cili për shumë vite ishte pjesë e kësaj listë.

Përpos Xhafer Tahirit, kryetari Abdixhiku ka lënë jashtë kryesisë edhe emra tjerë të njohur të partisë si Driton Selmanaj, Besa Gaxherri, Arben Gashi e Rrezarta Krasniqi.

Lumir Abdixhiku e Xhafer Tahiri e kishin prishur miqësinë e tyre pas zgjedhjeve të fundit lokale në tetor të vitit që lamë pas.

Xhafer Tahiri, i cili kishte kandiduar për kryetar të Komunës së Vushtrrisë, kishte arritur marrëveshje për koalicion në balotazh me kandidatin e LVV-së, Sylejman Mehollin.

Marrëveshja mes dy partive LDK e LVV ishte nënshkruar gjatë një ceremonie në qendër të qytetit në prezencë të kryetarit të Vetëvendosjes, Albin Kurti.

Kreu i LDK-së, Abdixhiku kishte thënë se Tahiri nuk kishte marrë leje nga niveli qendror i partisë për ujdinë me Vetëvendosjen dhe se kjo do t’i kushtonte me përjashtim nga partia.

Prokuroria Speciale kërkon burgim të përjetshëm për tre terroristët e Banjskës

Prokuroria Speciale ka kërkuar dënim maksimal – burgim të përjetshëm – për të akuzuarit në rastin e sulmit në Banjskë, duke e cilësuar si të vetmin dënim proporcional me peshën e veprës penale

Prokurori i rastit, Naim Abazi, në fjalën përfundimtare tha se në raste të tilla mesazhi juridik duhet të jetë i qartë dhe i prerë.

“Në një rast si ky, ku kemi të bëjmë me një sulm të armatosur kundër Policisë së Republikës së Kosovës dhe kundër rendit kushtetues, mesazhi juridik duhet të jetë i qartë, i prerë dhe i padiskutueshëm. Sulmet e organizuara dhe të armatosura kundër institucioneve shtetërore nuk tolerohen dhe dënohen me ashpërsinë më të lartë të paraparë me ligj. Nëse në një rast me këto përmasa, me këtë shkallë të organizimit dhe me këtë pasojë fatale nuk aplikohet dënimi maksimal, atëherë dëmtohet ndjeshëm efekti parandalues i ligjit penal dhe krijohet perceptimi i rrezikshëm i relativizimit të cenimit të rendit kushtetues.

Në aspektin e proporcionalitetit, duke marrë parasysh natyrën terroriste të veprës, pasojën fatale të shkaktuar, rrezikshmërinë e lartë shoqërore të operacionit, organizimin para-ushtarak të strukturuar, cenimin e drejtpërdrejtë të rendit kushtetues dhe mungesën e rrethanave lehtësuese relevante, prokuroria vlerëson se dënimi i vetëm proporcional dhe në përputhje me peshën e veprave penale është burgimi i përjetshëm”, tha ai.

Prokurori Abazi theksoi se duke marrë parasysh natyrën terroriste të veprës, pasojat dhe rrezikshmërinë e lartë, dënimi i vetëm proporcional është burgimi i përjetshëm.

Në fund, ai kërkoi nga gjykata që t’i shpallë fajtorë të akuzuarit Blagoje Spasojeviq, Vladimir Toliq dhe Dushan Maksimoviq, dhe ndaj secilit të shqiptohet dënimi maksimal, jo më pak se burgim i përjetshëm.

“Çdo dënim më i ulët do të ishte disproporcion i qartë me gravitetin dhe pasojat dhe rrezikshmërinë e veprimit dhe nuk do të përmbushte as funksionin ndëshkues e as parandalues të sanksionit penal. Në bazë të të gjitha provave të administruara gjatë shqyrtimit gjyqësor dhe në bazë të analizës së plotë juridike të elementeve objektive dhe subjektive të veprës penale, si dhe në bazë të përgjegjësisë individuale të secilit prej të pandehurve, në kuadër të bashkimit, Prokuroria Speciale i propozon gjykatës që të shpallë fajtorë Blagoje Spasojeviq, Vladimir Toliq dhe Dushan Maksimoviq për vepra penale për të cilat akuzohen dhe ndaj secilit prej tyre të shqiptojë dënimin maksimal të paraparë me ligj, jo më pak se burgimi i përjetshëm”, tha ai.

Deklarimi i fundit i Kurtit për çështjen e Presidentit

Kryeministri i Kosovës Albin Kurti është deklaruar për media për çështjen e presidentit.

Kurti ka thënë shkurt se janë në komunikim me partitë opozitare.

“Jemi në komunikim me kryetarët e partive opozitare, kur ka rezultate atëherë ju njoftojmë”, ka deklaruar Kurti.

Vazhdon të bie çmimi i naftës në Kosovë, kaq kushton sot

Çmimi i derivateve të naftës nis të bie në vendin tonë. Sot, çmimi maksimal i lejuar për naftë  shkon deri në 1.76 euro – centë për litër.

Siaps Ministrisë së Industrisë, Ndërmarrësisë, Tregtisë dhe Inovacionit çmimi i benzinës për sot maksimalisht është deri në 1.44 euro – centë për litër dhe gazi 0.89 euro – centë për litër.

Pas sulmit të 28 shkurtit në Iran, çmimet e karburanteve janë shtrenjtuar edhe në vendin tonë, ku çmimi për një liter naftë arriti në 1.91 euro ditë më parë në Kosovë.

Miratohet vendimi i Qeverisë, ka të bëjë me FSK-në

Komisioni për Çështje të Sigurisë dhe Mbrojtjes ka miratuar me të gjitha votat për vendimin e Qeverisë për dërgimin e Forcës së Sigurisë së Kosovës (FSK) jashtë vendit, si pjesë e Forcës Ndërkombëtare Stabilizuese në Gaza.

Deputetja e PDK-së, Ganimete Musliu, tha se ky vendim dëshmon pjekurinë e shtetit dhe kapacitetin e FSK-së për të marrë përgjegjësi ndërkombëtare.

“Forca e Sigurisë së Kosovës, për ushtarin e Kosovës, është një strukturë serioze, profesionale dhe gjithmonë më e gatshme që të marrë përgjegjësi përtej kufijve të vendit. Kërkesa e FSK-së për pjesëmarrje në operacione jashtë vendit, e miratuar nga Qeveria e Republikës së Kosovës, është në proces shqyrtimi në Kuvend; është një hap i rëndësishëm që tregon pjekurinë e shtetit tonë dhe besimin që kemi ndërtuar në kapacitetet tona mbrojtëse. Mbështetja e FSK-së në këtë rrugëtim duhet të jetë e plotë dhe pa dilema, prandaj edhe në emër të Partisë Demokratike të Kosovës ofrojmë mbështetje të plotë, duke besuar fuqishëm që aty ku është Forca e Sigurisë së Kosovës, është dinjiteti, profesionalizmi dhe disiplina”, tha ajo.

Deputetja e VV-së, Shqipe Selimi, theksoi se FSK-ja është e gatshme të kontribuojë në misione paqeruajtëse krah aleatëve ndërkombëtarë.

“Forcës së Sigurisë së Kosovës që tashmë është e gatshme të jetë partnere dinjitoze krah Shteteve të Bashkuara të Amerikës dhe aleatëve të saj në një mision paqeje në Gaza, por jo vetëm atje, por është e gatshme që të jetë kontribuese në të gjithë botën kudo që është e nevojshme. Ne si shtet, si kuvend, jemi të detyruar që t’i sigurojmë ligje dhe marrëveshje ndërkombëtare të cilat i mbrojnë ata, nuk e cenojnë integritetin e tyre. Jemi përgjegjës që tashmë edhe e kemi bërë si kuvend dhe si qeveri që të mbështeten financiarisht me mjete, të kenë trajnime dinjitoze. Këtë po e bëjmë dhe do ta bëjmë në vazhdimësi. Dhe edhe njëherë i mbështesim të gjithë ata ushtarë të Forcës së Sigurisë së Kosovës që do të jenë në një mision paqeje”, tha ajo.

Deputeti i LDK-së, Fadil Hadergjonaj, e cilësoi si lajm të mirë për Kosovën pjesëmarrjen në këtë mision, duke kërkuar mbështetje të plotë për pjesëtarët e FSK-së.

 

“Të gjithë sfidave në vazhdimësi qoftë individualisht qoftë si ekip në gara të ndryshme, stërvitje të ndryshme, në aspektin e edukimit profesional dhe herë, dhe është një lajm i mirë për vetë Kosovën por natyrisht edhe për forcën e sigurisë së Kosovës, e cila do të prezantojë në këtë mision që është domethënë hera e parë që ne marrim pjesë në një mision të kësaj natyre, të paqes, ku janë edhe në kuadër të shumë ushtrive të tjera. Ne si Lidhje Demokratike e Kosovës mbështesim këtë mision, mbështesim FSK-në, në të njëjtën kohë kërkojmë që këta pjesëtarë që do të zbarkojnë në këtë forcë, në kuadër të forcës stabilitetit në Gaza, ta kenë mbështetjen e plotë qoftë në aspektin logjistik qoftë aspektin e pajisjeve”, tha ai. /Ekonomiaonline

Sulmon policët dhe arratiset nga dritarja e stacionit

Një incident i rëndë është regjistruar në Prishtinë, ku një person i kërkuar nga policia ka arritur të arratiset në mënyrë dramatike nga ambientet e stacionit policor.

Ngjarja ka ndodhur më 13 prill rreth orës 17:30, në Stacionin Policor “Jugu”.

Siç mëson Sinjali, bëhet fjalë për F.I, i cili ishte në kërkim policor dhe ishte shoqëruar për intervistim nga njësia e hetimeve.

Sipas informatave, gjatë qëndrimit në stacion, i njëjti fillimisht ka sulmuar zyrtarët policorë, e më pas ka arritur të arratiset duke kërcyer nga dritarja e katit të dytë.

Gjatë ikjes, ai ka dëmtuar edhe një automjet zyrtar të njësisë së trafikut, përpara se të largohej nga rrethojat e stacionit.

Burime bëjnë të ditur se i dyshuari është larguar në drejtim të lagjes “Kalabria”.

I njëjti konsiderohet recidivist i veprave penale dhe ndaj tij ka urdhër-arrest aktiv.

Njësitet policore janë vënë në ndjekje të tij, ndërsa kërkimet për kapjen e tij janë në vazhdim.

Shënim: Personat e apostrofuar në këtë artikull prezumohen të pafajshëm derisa fajësia e tyre të mos provohet me vendim të formës së prerë nga gjykata.

Bie çmimi i naftës në Kosovë

Ministria e Industrisë, Ndërmarrësisë dhe Tregtisë e Kosovës (MINT) ka bërë të ditur çmimet maksimale të lejuara për derivatet e naftës, të cilat do të jenë në fuqi për datën 14 prill 2026.

Nafta sot do të shitet me çmimin 1.78 centë sipas vendimit të publikuar nga MINT, 6 centë më lirë sesa ditën e djeshme

Në vendimin e publikuar, çmimi maksimal i lejuar për benzinë është 1.44 centë, kurse për gazin 89 centë.

Këto janë çmimet maksimale të derivateve për sot në Kosovë

Ministria e Industrisë, Ndërmarrësisë dhe Tregtisë e Kosovës (MINT) ka bërë të ditur çmimet maksimale të lejuara për derivatet e naftës, të cilat do të jenë në fuqi për datën 13 prill 2026.

Nafta sot do të shitet me çmimin 1.84 centë sipas vendimit të publikuar nga MINT.

Në vendimin e publikuar, çmimi maksimal i lejuar për benzinë është 1.44 centë, kurse për gazin 89 centë.

Tragjike: Ky është 32 vjeçari që humbi jetën në vetaksidentin

Një vetaksident i rëndë ka ndodhur mëngjesin e sotëm në fshatin Dobrushe të Istogut, ku një person ka humbur jetën.

Viktima është një 32-vjeçar me inicialet E.O., raporton Klankosova.tv.

Detaje për rastin ka dhënë zëdhënësi i policisë për rajonin e Pejës, Fadil Gashi, i cili bëri të ditur se vdekja e viktimës është konstatuar nga ekipi mjekësor në vendin e ngjarjes.

Sipas tij, dyshohet se shoferi ka humbur kontrollin mbi automjetin dhe ka goditur një shtyllë betoni.

“Një veturë është e përfshirë. Vdekja e viktimës është konstatuar nga mjeku kujdestar. Në vendin e ngjarjes kanë dal policia, ekipi mjekësor, e po ashtu edhe zjarrfikësit të cilët e kanë bërë edhe nxjerrjen e trupit të pajetë”, tha Gashi për Klankosova.tv.

“Rasti po hetohet nga hetuesit e aksidenteve. Trupi i pajetë i viktimës pritet të dërgohet në IML”, shtoi ai./Klankosova.tv

Sot i jepet lamtumira e fundit 24-vjeçarit që humbi jetën në aksidentin fatal në Gjilan

Sot i jepet lamtumira e fundit 24-vjeçarit Arbnor Selami Mehmeti, i cili humbi jetën në një aksident tragjik me motoçikleta në Gjilan.

Ceremonia e varrimit do të mbahet pas faljes së namazit të ikindisë, rreth orës 16:20, në varrezat e fshatit Livoç i Ulët, ku familjarë, miq dhe qytetarë do t’i japin lamtumirën e fundit të ndjerit.

Arbnori humbi jetën si pasojë e një aksidenti të rëndë që ndodhi në rrugën Gjilan–Cernicë, ku përplasja mes dy motoçikletave rezultoi fatale për të riun, ndërsa dy persona të tjerë mbetën të lënduar.