Në maj të vitit 2025, ishte pikërisht Prive By Liberta Spahiu që raportoi ekskluzivisht për një romancë të re dhe mjaft surprizuese në showbiz-in shqiptar.

Ne zbuluam se aktorja shumë e dashur për publikun, Teuta Krasniqi, e njohur ndër të tjera për rolin e saj në serialin e dikurshëm hit “Çka ka shpija”, kishte nisur një lidhje dashurie me DJ Crax, i cili njihet gjerësisht si bashkëpunëtori dhe DJ i pandashëm i reperit Noizy. Asokohe dyshes iu desh kohë për të reaguar dhe e mbajtën jetën e tyre private larg syrit të mediave, por duket se fshehtësisë po i vjen fundi dhe raporti i tyre sapo ka marrë një konfirmim indirekt, por shumë të qartë para të gjithëve.

Gjithçka është zbuluar përmes një postimi të fundit në rrjetin social TikTok. DJ Crax ka ndarë me ndjekësit e tij një moment nga ashensori.

Në këtë postim, ai shfaqet duke filmuar nga lart-poshtë këmbët e një vajze që mban me litar një qenush, ndërsa mbishkrimi i videos thotë qartë: “Kojshikja e re do mem marr nqaf.” Teksa Crax është kujdesur në maksimum që të mos ia zbulojë fytyrën “kojshikes” së tij, duket se ai ka neglizhuar një detaj të rëndësishëm që fansave dhe mediave vigjilente nuk mund t’u shpëtonte asnjëherë.

Nga zëri i kapur në prapavijë të videos teksa ata komunikojnë, dallohet qartësisht se vajza me të cilën ai po bisedon është pikërisht Teuta. Për këdo që e ka ndjekur aktoren ndër vite në ekran, ai vokal dhe ajo e qeshur janë thjesht të pagabueshme. Ky moment, ndonëse i maskuar si një shaka e rastësishme me “fqinjën”, vërteton në mënyrë absolute atë që ne kishim raportuar muaj më parë.

Lidhja e tyre jo vetëm që vazhdon të jetë e fortë, por me sa duket tashmë ata po kalojnë në një fazë ku nuk e kanë më problem të ndajnë copëza të jetës së tyre të përbashkët me publikun, qoftë edhe në formën e ngacmimeve të tilla. /Prive By Liberta Spahiu

Këngëtarja e njohur Era Istrefi pritet të publikojë sot projektin e saj më të ri muzikor, një këngë që mban një domethënie jashtëzakonisht prekëse dhe emocionale për të.

Përmes një postimi në Instagram Story, Era ka zbuluar se ky projekt mban autorësinë e kantautorit të njohur Talay Riley, jeta e të cilit u ndërpre tragjikisht më parë.

Talay Riley, emri i vërtetë i të cilit ishte Mark Orabiyi, ishte një artist i vlerësuar me çmimin prestigjioz “Grammy”, i njohur për bashkëpunimet me yje botërorë si Dua Lipa, Jessie J dhe Usher.

Kantautori 35-vjeçar ndërroi jetë tragjikisht më 5 qershor, pasi u ther me thikë në kopshtin e një shtëpie në lindje të Londrës. Hetimet konfirmuan se shkak i vdekjes ishin plagët e marra nga një mjet i mprehtë në pjesën e kraharorit.

E prekur thellësisht nga kjo humbje, artistja shqiptare ka ndarë me ndjekësit e saj një mesazh mjaft të ndjerë:

“Jam e thyer shpirtërisht. Nesër publikoj ‘I’m Dying to Feel Alive’, një këngë e shkruar nga dikush, jeta e të cilit u ndërpre tragjikisht mjaft herët. Është e vështirë të shprehet me fjalë se sa joreale dhe e dhimbshme ndihet të dish se personi pas këtyre teksteve të bukura nuk do të jetë këtu për të parë ndikimin që ato do të kenë. Jam thellësisht mirënjohëse që kam punuar me të dhe që mbaj një pjesë të vogël të trashëgimisë së tij përmes kësaj kënge. Pusho në paqe. Fjalët e tua do të vazhdojnë të jetojnë përmes muzikës dhe përmes çdo njeriu që ke prekur.”

Ky projekt, i cili lansohet gjatë ditës së sotme, pritet të shpërfaqë një anë më melankolike dhe tejet personale të Erës, duke u kthyer në një tribut të ndjerë për të nderuar kujtimin dhe talentin e jashtëzakonshëm të të ndjerit Talay Riley. /Prive By Liberta Spahiu

Vdekja e papritur e aktores së njohur turke, Ece İrtem, ka tronditur thellë familjen dhe fansat e saj, veçanërisht pasi ngjarja e rëndë ndodhi vetëm një ditë pas ditëlindjes së saj të 35-të. Sipas raportimeve fillestare nga mediat turke, aktorja ndërroi jetë në moshën 35-vjeçare në shtëpinë e saj në Turqi, ku si shkak paraprak dyshohej një herë një infarkt.

Pas lajmit tragjik, në rrjetet sociale filluan të qarkullonin thashetheme nëse shkaku i vdekjes lidhej me ndonjë mbidozë apo konsum alkooli. Dyshimet u nxitën nga publikimi i një dëshmie të supozuar të nënës së aktores, Nuriye İrtem, dhënë për policinë. Sipas këtij raportimi të paverifikuar, nëna kishte treguar se ato kishin qenë në një festë ditëlindjeje pranë shtëpisë, kishin prerë tortën dhe ishin kthyer në banesë rreth orës 20:36, ku Ece kishte marrë ilaçet antidepresive përpara se të flinte.

Dëshmia e rreme që qarkulloi në media

Në deklaratën e pretenduar që pushtoi mediat, thuhej se nëna kishte deklaruar: “Kur hyra në dhomën e saj në mëngjes, pashë një lëng të dyshimtë që i dilte nga goja. Ajo kishte konsumuar shumë alkool dhe po përdorte gjithashtu antidepresivë të fortë”. Kjo bëri që publiku të aludonte menjëherë për një përzierje fatale të substancave, duke krijuar një valë të madhe thashethemesh mbi orët e fundit të jetës së aktores 35-vjeçare.

Reagon avokati: “Deklarata është e rreme, nëna është në shok”

Megjithatë, e vërteta që qëndron pas këtij pretendimi është krejt ndryshe. Avokati turk i familjes, ka përgënjeshtruar menjëherë lajmet, duke deklaruar se dëshmia që po qarkullon nuk pasqyron aspak të vërtetën. Ai sqaroi se pas vdekjes së aktores nëna e saj nuk ka dhënë ende asnjë deklaratë zyrtare për autoritetet hetimore, pasi ndodhet në gjendje të rëndë shoku dhe nën mbikëqyrje mjekësore. Avokati i bëri thirrje publikut të mos bazohet mbi këto thashetheme, ndërsa saktësoi se ende nuk ka një konfirmim zyrtar mjekoligjor për shkakun e saktë të vdekjes. /Prive By Liberta Spahiu

Vetëm pak ditë pasi bënë publike ndarjen e tyre, Brikena dhe Mateo kanë befasuar ndjekësit duke u shfaqur sërish krah njëri-tjetrit në një fotografi të përbashkët. Mirëpo, ky ribashkim nuk ka të bëjë me jetën e tyre private. Dyshja ka treguar se përtej ndryshimeve në marrëdhënien e tyre emocionale, ata do të ruajnë një raport profesional.

Arsyeja e këtij pozimi është projekti i tyre i ri televiziv. Prej ditësh është konfirmuar se të dy do të jenë pjesë e formatit të njohur veror “Top Arena” në Top Channel.

Në imazhin e publikuar nga moderatori Edi Manushi, Mateo dhe Brikena shihen duke pozuar së bashku me stafin, plot buzëqeshje. Ky detaj dëshmon se ata janë gati të nisin këtë rrugëtim të ri televiziv pa lënë që ndarja të ndikojë në punën e tyre.

Tashmë statusi i tyre është i qartë: bashkëpunëtorë të përkushtuar në ekran për të dhuruar një super sezon televiziv.

/Prive By Liberta Spahiu