“Dështuam si shoqëri”, Muharremi: Kosovarët ia dhanë mbi 50 për qind një partie që ka dëshmuar që s’di të qeverisë

Analisti politik, Shenoll Muharremi, ka thënë se kemi gabuar si shoqëri, duke zgjedhur një parti me mbi 50 për qind, e cila tashmë me vite në qeverisje e ka dëshmuar se as nuk di të qeverisë, as të menaxhojë ekonominë, energjinë e arsimin.

“E megjithatë, kosovarët, me apo pa vetëdije, i dhanë mbi 50% një partie të vetme që ka dëshmuar se as arsimin, as ekonominë, as energjinë, as diplomacinë… nuk di ta menaxhojë dhe që për pesë vite nuk ka zhvilluar asnjë projekt të vetëm madhor zhvillimor”, ka shkruar ai ndër të tjera.

Postimi i tij i plotë:

Zgjodhëm një parti me mbi 50%, e cila tashmë me vite në qeverisje e ka dëshmuar se as nuk di të qeverisë, as të menaxhojë ekonominë, energjinë e arsimin.

Masovikisht u shpërblye dhe u zgjodh një qeveri e parti që e rriti varfërinë vitet e fundit dhe çmimet u rritën aq shumë sa fuqia blerëse e qytetarit u gjunjëzua. Importi u rrit dramatikisht dhe deficiti në mallra shkoj në 6 miliardë euro në vit. Çmimet e energjisë u rritën 3 herë duke shkaktuar kaos dhe inflacion kronik me pasoja të mëdha negative për bizneset, ekonominë dhe familjet.
Në një botë që po ndryshon me shpejtësi dhe në një rend ndërkombëtar që po shthurret, Kosova votoi masovikisht për një parti që nuk di të kultivojë marrëdhënie të mira me aleatët që realisht e garantojnë sovranitetin dhe kufijtë e saj. Një parti që nga mosdija e futi Kosovën nën masa të BE-së dhe e detyroj SHBA-në të pezulloj Dialogun Strategjik me Kosovën.

Mbi 50% për një parti që ka dëshmuar se nuk di të menaxhoj as arsimin, se gjatë mandatit rezultatet e PISA, por edhe Raporti Vjetor i BE-së për Kosovën kanë konfirmuar që fëmijët tanë janë disa vite mbrapa atyre Europian në shkollim.

SHBA tani sapo ka paralajmëruar edhe tërheqjen nga dhjetëra organizata ndërkombëtare, që konfirmon ndryshimin dinamik të rendit botëror që e njohëm. Ndërsa kryeministrja e Danimarkës deklaroi se, nëse SHBA e anekson Greenlandën, NATO mund të mos ekzistojë më.

Në këto rrethana rajonale dhe globale, pasiguria për të ardhmen e vendit nuk ka qenë kurrë më e madhe gjatë 25 viteve të fundit.

E megjithatë, kosovarët, me apo pa vetëdije, i dhanë mbi 50% një partie të vetme që ka dëshmuar se as arsimin, as ekonominë, as energjinë, as diplomacinë… nuk di ta menaxhojë dhe që për pesë vite nuk ka zhvilluar asnjë projekt të vetëm madhor zhvillimor.

Po, dështuam si shoqëri.

Merret vendimi, kjo komunë jep 600 euro për çdo lindje

Kryetari i Rahovecit, Smajl Latifi ka nënshkruar vendimin për rritje të subvencionimit për çdo lindje, në 600 euro.

Nga 500 sa ishte më parë, Latifi ka marrë vendim që nga janari i këtij viti të jetë 600 euro.

Ndërsa shton se deri në fund të mandatit do të rritet në 750 euro.

Postimi:

Nis zbatimi i zotimit tim publik, rritet subvencionimi për çdo lindje në 600€

Sot, nënshkrova vendimet e para për subvencionimin e dy lindjeve në Qendrën Kryesore të Mjekësisë Familjare (QKMF) “Dr. Fahredin Hoti” në Rahovec.

Nga janari i këtij viti, çdo lindje e realizuar në repartin e maternitetit të QKMF-së “Dr. Fahredin Hoti”, do të mbështetet nga Komuna e Rahovecit me 600€, nga 500€ sa ishte më parë, ndërsa deri në fund të mandatit, në përputhje me zotimin e dhënë, subvencionimi do të rritet në 750€.

 

Dyshime për mashtrim me sigurime, detaje rreth arrestimit të Sami Mazrekut

Ish-drejtori i Byrosë Kosovare të Sigurimeve, Sami Mazreku bashkë me ish-drejtorin e Financave në BKS, Valon Berisha, dyshohen t’iu kenë lëshuar para qytetarëve të ndryshëm në emër të sigurimeve në vlera mijëra euro.

Nga këto para, qytetarët një pjesë të tyre dyshohet t’ua kenë dhënë vetë atyre në cash, shkruan sot Betimi për Drejtësi bazuar në burime brenda organeve të drejtësisë.

Ata dyshohen se kanë lëshuar fatura për dëme që nuk kanë ndodhur fare.

Mazreku dhe Berisha u arrestuan në aksionin që po zhvillohet nga Krimet Ekonomike të Policisë së Kosovës me Prokurorinë Themelore në Prizren.

Aksioni është në vazhdim dhe deri tani janë arrestuar disa persona nën dyshimin që kanë përfituar kundërligjshëm.

Krimet Ekonomike të Policisë zbarkojnë në disa qytete të Kosovës – po kërkohen mbi 40 persona

Krimet Ekonomike të Policisë së Kosovës të udhëhequra nga shumë prokurorë janë duke realizuar një aksion të gjerë në gjithë vendin, raporton Gazeta Sinjali.

Lajmin për Gazetën Sinjali e ka konfirmuara edhe Petrit Kryeziu, kryeprokurori i Prizrenit, i cili tha se është duke e udhëhequr aksionin në Prishtinë.

“Aksioni është i gjerë dhe përfshinë të dyshuar në të gjithë Kosovën. Target kemi më shumë se 40 persona”, tha Kryeziu për Gazetën Sinjali.

Gazeta Sinjali merr vesh se aksioni është duke u zhvilluar lidhur me kryerjen e veprave penale “keqpërdorim i besimit”, “keqpërdorim i autorizimeve në ekonomi”, “ndihmë në keqpërdorim të besimit” dhe falsifikim të dokumentit”.

Ende nuk dihen më shumë detaje për aksionin, por Gazeta Sinjali do të ju mbaj të informuar me rastin.

E trishtë: Kjo është gruaja që vdiq dje në QKUK, dyshohet se konsumoi detergjent

Një ngjarje e rëndë dhe tronditëse është shënuar dje në fshatin Grejkoc të Suharekës, ku një grua ka ndërruar jetë pasi dyshohet se ka konsumuar detergjent për pastrimin e banjove.

Ngjarja siç merr vesh Sinjali dyshohet se ka ndodhur dje paradite dhe është kuptuar pasi gruaja është dërguar në Emergjencën e Spitalit Rajonal në Prizren, në gjendje të rënduar, e cila më pas është bartur për QKUK.

Mirëpo, rreth orës 16:00 të ditës së djeshme, familja ka pranuar informatën se Samire Lushaj, ka ndërruar jetë në QKUK-Prishtinë, pavarësisht përpjekjeve të stafit mjekësor.

Me urdhër të Prokurorit të Departamentit për Krime të Rënda, është iniciuar rasti “Hetim i vdekjes”, ndërsa për rastin janë njoftuar edhe njësitet e Hetimeve Rajonale në Prizren, të cilat do të vazhdojnë procedurat hetimore.

Ndërsa, Prokurori kujdestar, ka urdhëruar që trupi i pajetë të dërgohet në Institutin e Mjekësisë Ligjore (IML) për obduksion.

Rasti mbetet nën hetime, ndërsa pritet që obduksioni të sqarojë rrethanat e sakta të vdekjes.

Përfundon numërimi i votave me postë, këto janë rezultatet e përmbledhura

Mbrëmjen e sotme ka përfunduar në tërësi numërimi i votave me postë për zgjedhjet e parakohshme parlamentare të 28 dhjetorit.

Nga të dhënat e publikuara në platformën e KQZ-së, bëhet e ditur se LVV-ja është e para me 72.62%, ndërsa pas saj është LDK me 10.27%, PDK me mbi 9.14%, dhe AAK me 3.93%.

Aktualisht, nga rezultatet e përmbledhura, LVV ka 51.01% të votave, duke fituar 57 ulëse në legjislaturën e 10-të.PDK është e dyta me 20.24%, duke fituar 22 ulëse.

LDK e treta me 13.26% ndërsa ka siguruar 15 ulëse, dhe AAK e katërta me 5.50% apo 6 ulëse.

Publikohet një fotografi e Kusari-Lilës me politikanen serbe në Solothurn, një muaj pas Banjskës

VOX Kosova ka siguruar një fotografi që, sipas burimeve të këtij mediumi, konfirmon se deputetja dhe shefja e Grupit Parlamentar të VV-së, Mimoza Kusari-Lila, ishte “politikanja e lartë e Kosovës” e përmendur në raportimet paraprake për takimin e zhvilluar me një politikane të lartë serbe në Zvicër.

Sipas raportimit, gjatë atij takimii cili thuhet se është mbajtur rreth një muaj e gjysmë pas sulmit në Banjskë Kusari-Lila ka komunikuar në mënyrë “aq familjare, sa ka habitur të pranishmit”.

Megjithatë, mënyra e komunikimit dhe koha kur është mbajtur ky takim, pra, pak javë pas incidentit të rëndë në Banjskë kanë ringjallur reagime dhe diskutime në skenën politike kosovare.

Bora zbardh këtë qytet të Kosovës

Pas reshjeve intensive të shiut që shkaktuan përmbytje në disa zona të Kosovës, tashmë ka nisur reshje bore, duke krijuar një peizazh të bardhë.

Meteo Ballkan ka publikuar një video nga Podujeva, ku shihet qartë se bora po bie me dendësi dhe po zbardh qytetin shumë shpejt.

Në mbishkrimin e videos thuhet: “Podujeva zbardhet shumë shpejt”.

Institutit Hidrometeorologjik i Kosovës ka paralajmëruar ulje e temperaturave, reshje bore dhe rrezik nga ngricat në Kosovë.

E rëndë: Ndërron jetë një grua 43-vjeçare, dyshohet se shkak ishte…

Një grua 43-vjeçare nga Komuna e Suharekës ka ndërruar jetë të martën në Spitalin Rajonal të Prizrenit, pasi dyshohet se kishte konsumuar preparate kimike.

Lajmin e ka konfirmuar Shaqir Bytyqi, zëdhënës i Policisë së Kosovës për rajonin e Prizrenit. Sipas tij, Policia është njoftuar më 7 janar 2026, rreth orës 11:40, se një femër nga fshati Grejkovc ishte dërguar në spital në gjendje të rëndë shëndetësore, me dyshimin për konsumim të substancave kimike.

Më pas, rreth orës 15:00, Policia ka pranuar informatën nga Qendra Klinike Universitare e Kosovës (QKUK) se viktima nuk ka arritur të mbijetojë dhe ka ndërruar jetë.

Një mashkull 36-vjeçar gjendet i vdekur në rrugë

Një person është gjetur i vdekur në rrugën “Ukshin Hoti”, në Prizren, të mërkurën.

Lajmi për Gazetën Online Reporteri.net e ka konfirmuar nga Shaqir Bytyqi, zëdhënës i Policisë së Kosovës për rajonin e Prizrenit.

Ai ka thënë viktima është F,Th, mashkull, 36-vjeçar nga Mamusha.

“Sot me datën 07.01.2026, rreth orës 12:40, Policia ka pranuar informatën se në rrugën “Ukshin Hoti”, në lagjen Arbana në Prizren, një person dyshohet se nuk ka shenja jete. Menjëherë, patrullat policore kanë dalë në vendin e ngjarjes, së bashku me ekipin e emergjencës. Nga ekipi mjekësor është konstatuar vdekja e personit. Viktima është identifikuar si F.Th., mashkull, rreth 36 vjeçar, nga Mamusha.”, tha ai.

Sipas tij, Policia në koordinim dhe konsultim me Prokurorin e Shtetit, po ndërmerr të gjitha veprimet e nevojshme hetimore me qëllim të sqarimit dhe zbardhjes së plotë të rrethanave të rastit.